Homeசெய்திகள்விளையாட்டுதொடர்ந்து 2-வது ஆண்டாக வெண்கலப் பதக்கம் வென்று இந்திய மகளிர் ரக்பி அணி சாதனை!

தொடர்ந்து 2-வது ஆண்டாக வெண்கலப் பதக்கம் வென்று இந்திய மகளிர் ரக்பி அணி சாதனை!

-

- Advertisement -

ஆசிய ரக்பி எமிரேட்ஸ் 20 வயதுக்குட்பட்டோருக்கான 7 பேர் ரக்பி தொடரில் இந்திய மகளிர் அணி தொடர்ந்து இரண்டாவது ஆண்டாக வெண்கலப் பதக்கம் வென்று சாதனை படைத்துள்ளது.

ஒடிசா மாநிலம் புவனேஸ்வரில் உள்ள கலிங்கா மைதானத்தில் நடைபெற்ற இந்தத் தொடரில், இந்திய மகளிர் அணி அரையிறுதிப் போட்டியில் மலேசியாவை எதிர்கொண்டது. மிகவும் விறுவிறுப்பாக நடைபெற்ற இந்த ஆட்டத்தில் இந்திய அணி 12-14 என்ற புள்ளிக்கணக்கில் நூலிழையில் தோல்வியடைந்தது.

இலங்கையை வீழ்த்தி வெண்கலம்

இதனைத் தொடர்ந்து வெண்கலப் பதக்கத்துக்கான போட்டியில் இலங்கை அணியை இந்தியா எதிர்கொண்டது. தொடக்கம் முதலே ஆதிக்கம் செலுத்திய இந்திய மகளிர் அணி, 27-0 என்ற புள்ளிக்கணக்கில் அபார வெற்றி பெற்று வெண்கலப் பதக்கத்தைக் கைப்பற்றியது.

இந்திய அணியில் சம்ருத்தி கடம் இரண்டு முறை ட்ரை மூலம் புள்ளிகளைப் பெற்றார். அதிதி லோந்தே, அக்சயா என்.எஸ்., அனிதா முர்மு ஆகியோர் தலா ஒரு ட்ரை பதிவு செய்தனர். தீபாலி ததே கூடுதல் புள்ளியையும் பெற்றுத் தந்தார்.

இதன் மூலம் கடந்த ஆண்டு பீகார் மாநிலம் ராஜ்கிரில் நடைபெற்ற தொடரிலும் வெண்கலம் வென்ற இந்திய மகளிர் அணி, இந்த ஆண்டும் அதே சாதனையைத் தொடர்ந்து இரண்டாவது முறையாகப் பதக்கம் வென்றுள்ளது.

ஆண்கள் அணி 7-வது இடம்

இந்திய ஆண்கள் அணி தனது கடைசி குழு ஆட்டத்தில் சீன தைபே அணியிடம் 5-12 என்ற புள்ளிக்கணக்கில் தோல்வியடைந்தது. தொடர்ந்து சிங்கப்பூர் அணிக்கு எதிரான ஆட்டத்திலும் 5-29 என்ற கணக்கில் தோற்றது.

இதையடுத்து 7-வது மற்றும் 8-வது இடத்துக்கான போட்டியில் தாய்லாந்து அணியை 24-7 என்ற புள்ளிக்கணக்கில் வீழ்த்திய இந்திய ஆண்கள் அணி, ஒட்டுமொத்தமாக 7-வது இடத்தைப் பிடித்தது.

இரு பிரிவுகளிலும் ஹாங்காங் சாம்பியன்

இந்தத் தொடரின் ஆண்கள் மற்றும் பெண்கள் ஆகிய இரு பிரிவுகளிலும் ஹாங்காங் சீனா அணி சாம்பியன் பட்டம் வென்றது. இரு பிரிவுகளிலும் மலேசிய அணி இரண்டாவது இடத்தைப் பிடித்தது.

ஆண்கள் பிரிவில் சீன தைபே அணி வெண்கலப் பதக்கம் வென்ற நிலையில், பெண்கள் பிரிவில் இந்திய அணி வெண்கலப் பதக்கத்தைக் கைப்பற்றி நாட்டிற்குப் பெருமை சேர்த்துள்ளது.

செரீனா வில்லியம்ஸின் சாதனையை முறியடித்த மிர்ரா ஆண்ட்ரீவா! 19 வயதில் டபிள்யூடிஏ பைனல்ஸில் புதிய வரலாறு!

MUST READ