ரணம் படத்திலிருந்து அடுத்த பாடல் வெளியீடு

வைபவ் நடிப்பில் உருவாகி இருக்கும் ரணம் படத்திலிருந்து இரண்டாவது பாடலை படக்குழு பகிர்ந்துள்ளது.

கோலிவுட்டில் வளர்ந்து வரும் நடிகர்களில் ஒருவரான வைபவ், வெங்கட் பிரபு இயக்கிய சரோஜா திரைப்படத்தின் மூலம் திரைத்துறைக்கு அறிமுகமானார். பிரபல இயக்குநர் வெங்கட் பிரபுவின் பட்டறையில் உள்ள முக்கிய நடிகர் வைபவ். வெங்கட் இயக்கும் பெரும்பாலான படங்களில் இடம்பெற்று விடுவார் நடிகர் வைபவ். சரோஜா படத்தின் வெற்றியைத் தொடர்ந்து, மேயாதா மான், கப்பல், பபூன், ஆர்.கே.நகர், அரண்மனை, ஆர்.கே.நகர், உள்ளிட்ட பல திரைப்படங்களில் அவர் நடித்திருக்கிறார். இதில் மேயாத மான் திரைப்படம் ரசிகர்கள் மத்தியில் நல்ல வரவேற்பை பெற்றுக் கொடுத்தது.

வைபவ் நடிப்பில் தற்போது உருவாகி இருக்கும் புதிய திரைப்படம் ரணம். ஷெரிஃப் இந்த படத்தை எழுதி இயக்கியுள்ளார். கிரைம் திரில்லர் கதைகளத்தில் இத்திரைப்படம் உருவாகி உள்ளது. மிதுன் மித்ரா ப்ரொடக்ஷன்ஸ் நிறுவனத்தின் சார்பில் இந்த படத்தை மது நாகராஜன் தயாரித்துள்ளார். படத்தில் வைபவுடன் இணைந்து தான்யா ஹோப் மற்றும் நந்திதா உள்ளிட்டோர் முக்கிய கதாபாத்திரங்களில் நடித்துள்ளனர். இத்திரைப்படத்திற்கு கொரெல்லி இசை அமைத்துள்ளார்.

இப்படத்தின் டீசர் மற்றும் பாடல் ஏற்கனவே வெளியாகி வரவேற்பை பெற்ற நிலையில், தற்போது படத்திலிருந்து அடுத்த பாடல் வெளியாகி உள்ளது. பிரபல நடிகர் அசோக் செல்வன் இந்த பாடலை வெளியிட்டு உள்ளார். ரணம் திரைப்படம் வரும் 23-ம் தேதி திரையரங்குகளில் வெளியாகிறது.