செயற்கை நுண்ணறிவு (AI) தொழில்நுட்பம் எவ்வளவுதான் வளர்ந்தாலும், நீதிமன்றத்தில் தீர்ப்பு வழங்கும் இடத்தில் மனிதர்தான் இருக்கப் போகிறார். எனவே, இளம் வழக்கறிஞர்கள் கணினி மற்றும் செயற்கை நுண்ணறிவை மட்டும் நம்பாமல், கடினமாக உழைத்து தங்களது அறிவாற்றலையும் சிந்தனைத் திறனையும் வளர்த்துக்கொள்ள வேண்டும் என்று சென்னை உயர்நீதிமன்ற நீதிபதி எஸ். சௌந்தர் அறிவுறுத்தியுள்ளார்.
பாரத் சட்டக் கல்லூரியின் 44-வது பட்டமளிப்பு விழா!
சென்னை சேலையூரில் உள்ள பாரத் உயர்கல்வி மற்றும் ஆராய்ச்சி நிறுவனத்தின் கீழ் இயங்கி வரும் பாரத் சட்டக் கல்லூரியின் 44-வது பட்டமளிப்பு விழா நடைபெற்றது.
இந்த விழாவில் சென்னை உயர்நீதிமன்ற நீதிபதிகள் எஸ். சௌந்தர், எம். வேணுகோபால் மற்றும் கல்லூரித் தலைவர் டாக்டர் ஜெ. சுந்தீப் ஆனந்த் ஆகியோர் சிறப்பு விருந்தினர்களாகக் கலந்து கொண்டு மாணவர்களுக்குப் பட்டங்களை வழங்கினர்.
216 மாணவர்களுக்கு பட்டங்கள் வழங்கல்!
இந்தப் பட்டமளிப்பு விழாவில் மொத்தம் 216 மாணவர்களுக்குப் பட்டங்கள் வழங்கப்பட்டன. இதில் பாரத் சட்டக் கல்லூரியைச் சேர்ந்த மூன்று மாணவர்கள் தங்கப் பதக்கங்களைப் பெற்றுச் சாதனை படைத்தனர்.
AI-ஐ மட்டும் நம்பாதீர்கள்: இளம் வழக்கறிஞர்களுக்கு அறிவுரை!
பட்டம் பெற்ற மாணவர்களிடையே உரையாற்றிய உயர்நீதிமன்ற நீதிபதி எஸ். சௌந்தர், சட்ட அறிவு, சுயமாகச் சிந்திக்கும் திறன் மற்றும் தொழில்முறைத் தகுதி ஆகியவற்றை வளர்த்துக்கொள்வதன் அவசியத்தை வலியுறுத்தினார்.
கணினிகள் மற்றும் செயற்கை நுண்ணறிவு தொழில்நுட்பங்களை அளவுக்கு அதிகமாகச் சார்ந்திருக்காமல், வழக்கறிஞர்கள் தங்களது சொந்த அறிவாற்றலையும் சிந்தனைத் திறனையும் மேம்படுத்திக்கொள்ள வேண்டும் என்று அறிவுறுத்தினார்.
மேலும், எத்தனை செயற்கை நுண்ணறிவு தொழில்நுட்பங்கள் வந்தாலும் நீதிமன்றத்தில் தீர்ப்பு வழங்கும் இடத்தில் ஒரு மனிதர்தான் இருக்கப் போகிறார். எனவே, இளம் வழக்கறிஞர்கள் வெறும் கணினியை மட்டும் நம்பாமல் கடின உழைப்பைச் செலுத்தி நீதிமன்றத்தில் சிறப்பாகச் செயல்பட்டால்தான் சிறந்த வழக்கறிஞர்களாகத் திகழ முடியும் என்று நீதிபதி எஸ். சௌந்தர் அறிவுரை வழங்கினார்.