தமிழ்நாட்டில் மாநிலப் பாடத்திட்டத்தில் பயிலும் மாணவர்களின் மருத்துவக் கல்வி வாய்ப்புகள் நீட் தேர்வால் கடுமையாகப் பாதிக்கப்பட்டுள்ளதாக திராவிடர் கழகத் தலைவர் ஆசிரியர் கி.வீரமணி குற்றம்சாட்டியுள்ளார். மாநிலப் பாடத்திட்டத்தில் பயிலும் சுமார் 90 சதவிகித மாணவர்களுக்கு அநீதி இழைக்கப்படுவதாகவும், சுமார் 10 சதவிகிதம் மட்டுமே உள்ள சிபிஎஸ்இ மாணவர்கள் 56 சதவிகிதத்துக்கும் அதிகமான மருத்துவ இடங்களைப் பெறுவதாகவும் அவர் தெரிவித்துள்ளார்.
இதுதொடர்பாக அவர் வெளியிட்டுள்ள அறிக்கையில் கூறியிருப்பதாவது:
நீட் தேர்வால் பாதிக்கப்படும் மாநிலப் பாடத்திட்ட மாணவர்கள்!
மருத்துவக் கல்லூரி சேர்க்கைக்கு நீட் நுழைவுத் தேர்வு ஒன்றிய அரசால் கட்டாயமாக்கப்பட்டபோதே, அது ஒடுக்கப்பட்ட, பிற்படுத்தப்பட்ட மற்றும் கிராமப்புற மாணவர்களின் வாய்ப்புகளைப் பறிக்கும் என்றும், தமிழ்நாடு மாநிலப் பாடத்திட்டத்தில் பயிலும் மாணவர்கள் பாதிக்கப்படுவார்கள் என்றும் எச்சரித்து வந்தோம்.
சிபிஎஸ்இ பாடத்திட்டத்தின் அடிப்படையில் கேள்விகள் அமைக்கப்படுவதுடன், தனியார் பயிற்சி மையங்களின் அவசியத்தையும் நீட் தேர்வு உருவாக்கியுள்ளது. இதனால் பொருளாதார வசதி குறைந்த மாணவர்கள் பாதிக்கப்படுவார்கள் என்று சமூகநீதியாளர்களும் கல்வியாளர்களும் தொடர்ந்து எதிர்ப்பு தெரிவித்து வந்தனர்.
முதல் இரண்டு ஆண்டுகளில் இதன் பாதிப்புகள் வெளிப்படையாகத் தெரிந்தபோது, அரசுப் பள்ளி மாணவர்களுக்கு 7.5 சதவிகித இடஒதுக்கீடு வழங்கியதன் மூலம் பிரச்சினை சரிசெய்யப்பட்டுவிட்டதாகக் கூறப்பட்டது. ஆனால், கடந்த 10 ஆண்டுகளாக மாணவர்கள் தொடர்ந்து பாதிக்கப்பட்டு வருவதாக கி.வீரமணி தெரிவித்துள்ளார்.
சிபிஎஸ்இ மாணவர்களின் மருத்துவச் சேர்க்கை அதிகரிப்பு!
தமிழ்நாடு மருத்துவக் கல்வி இயக்குநரகத்திடமிருந்து தகவல் அறியும் உரிமைச் சட்டத்தின் கீழ் பெறப்பட்ட தரவுகள், நீட் தேர்வுக்குப் பிறகு மருத்துவச் சேர்க்கையில் ஏற்பட்டுள்ள மாற்றத்தை வெளிப்படுத்துவதாக அவர் குறிப்பிட்டுள்ளார்.
2010 முதல் 2017 வரையிலான காலகட்டத்தில் தமிழ்நாட்டில் மருத்துவப் படிப்பில் சேர்ந்த சிபிஎஸ்இ மாணவர்களின் எண்ணிக்கை ஒரு சதவிகிதத்திற்கும் குறைவாகவே இருந்துள்ளது. குறிப்பாக, 2014-2015ஆம் கல்வியாண்டில் வெறும் 2 மாணவர்கள் மட்டுமே சிபிஎஸ்இ பாடத்திட்டத்திலிருந்து மருத்துவப் படிப்பில் சேர்ந்துள்ளனர். இது மொத்த சேர்க்கையில் 0.06 சதவிகிதம் என அறிக்கையில் தெரிவிக்கப்பட்டுள்ளது.
ஆனால், நீட் தேர்வு கட்டாயமாக்கப்பட்ட பிறகு 2017-2018ஆம் கல்வியாண்டில் சிபிஎஸ்இ மாணவர்களின் சேர்க்கை 25.58 சதவிகிதமாக உயர்ந்ததாகக் கூறப்பட்டுள்ளது.
மேலும், 2024-2025ஆம் கல்வியாண்டில் 4,677 சிபிஎஸ்இ மாணவர்கள் மருத்துவப் படிப்பில் சேர்ந்துள்ளனர். இது 55.51 சதவிகிதமாகும். 2025-2026ஆம் கல்வியாண்டில் இந்த எண்ணிக்கை 5,134 ஆகவும், சதவிகிதம் 56.33 ஆகவும் அதிகரித்துள்ளதாக அவர் சுட்டிக்காட்டியுள்ளார்.
மாநிலப் பாடத்திட்ட மாணவர்களுக்கு சமூகநீதி மறுக்கப்படுகிறதா?
நீட் தேர்வுக்கு முன்பு மருத்துவக் கல்வி இடங்களில் 95 சதவிகிதத்திற்கும் அதிகமான இடங்களைப் பெற்றுவந்த மாநிலப் பாடத்திட்ட மாணவர்கள், தற்போது கடுமையாகப் பாதிக்கப்பட்டுள்ளதாக கி.வீரமணி தெரிவித்துள்ளார்.
மாநிலப் பாடத்திட்டத்தில் பயிலும் மாணவர்களின் எண்ணிக்கை அதிகமாக இருந்தும், மருத்துவச் சேர்க்கையில் சிபிஎஸ்இ மாணவர்களின் பங்கு பெருமளவில் உயர்ந்திருப்பது சமூகநீதிக்கு எதிரானது என்று அவர் விமர்சித்துள்ளார்.
சிபிஎஸ்இ கல்வி முறைக்கு அதிக முக்கியத்துவம் அளிப்பதன் மூலம் மாநிலப் பாடத்திட்டங்களைப் படிப்படியாகப் பலவீனப்படுத்தி, கல்வித்துறையில் ஒன்றிய அரசின் ஆதிக்கத்தை அதிகரிக்க முயற்சி நடைபெறுவதாகவும் அவர் குற்றம்சாட்டியுள்ளார்.
கல்வித்துறையில் ஒன்றிய அரசின் ஆதிக்கம்: கி.வீரமணி குற்றச்சாட்டு!
கல்வி மாநிலப் பட்டியலில் இருந்து ஒத்திசைவுப் பட்டியலுக்கு மாற்றப்பட்டதன் தொடர்ச்சியாக, சிபிஎஸ்இ பாடத்திட்டத்திற்கு முன்னுரிமை அளிக்கப்படுவதாக அவர் தெரிவித்துள்ளார்.
சிபிஎஸ்இ கல்வி முறையின் வழியாக ஆர்.எஸ்.எஸ். அமைப்பின் கல்விக் கொள்கைகளையும், காவிக் கொள்கைகளையும் புகுத்துவதற்கு வாய்ப்பு உருவாகும் என்றும் அவர் விமர்சித்துள்ளார். மேலும், இந்தி மற்றும் சமஸ்கிருத மொழிகளைத் தமிழ்நாட்டு மாணவர்கள் மீது திணித்து, மாநிலத்தின் இருமொழிக் கொள்கையைச் சீர்குலைக்க பாஜக முயற்சிப்பதாகவும் குற்றம்சாட்டியுள்ளார்.
தேசியக் கல்விக் கொள்கைக்கு எதிராகவும், நீட் தேர்வை ரத்து செய்ய வலியுறுத்தியும் தொடர்ந்து போராட வேண்டிய அவசியம் இருப்பதாக அவர் கூறியுள்ளார்.
நீட் ஒழிப்புக்காகத் தொடர் போராட்டம்!
ஒன்றிய அரசின் சட்டத் திருத்தங்கள், சலுகைகள் மற்றும் கல்வி நிறுவனங்களுக்கு அளிக்கப்படும் அழுத்தங்கள் காரணமாக கடந்த 10 ஆண்டுகளில் பல தனியார் பள்ளிகள் சிபிஎஸ்இ கல்வி முறைக்கு மாறியுள்ளதாக கி.வீரமணி தனது அறிக்கையில் தெரிவித்துள்ளார்.
இதன் விளைவாக, தமிழ்நாட்டில் சுமார் 10 சதவிகித மாணவர்கள் சிபிஎஸ்இ பாடத்திட்டத்தில் பயிலும் நிலை உருவாகியுள்ளதாகவும், அந்த மாணவர்களுக்கு நீட் தேர்வின் மூலம் 56 சதவிகிதத்துக்கும் அதிகமான மருத்துவ இடங்கள் கிடைத்துள்ளதாகவும் அவர் குறிப்பிட்டுள்ளார்.
இந்த நிலைமைக்குத் தீர்வு காணவும், மாநிலப் பாடத்திட்ட மாணவர்களின் கல்வி உரிமைகளைப் பாதுகாக்கவும் தமிழ்நாட்டு மக்களை அறவழியிலான உரிமைப் போராட்டத்துக்கு ஆயத்தப்படுத்த வேண்டும் என்று அவர் அழைப்பு விடுத்துள்ளார்.
நாடு தழுவிய அளவில் பிரச்சாரங்கள் மற்றும் ஆர்ப்பாட்டங்கள் மூலம் இந்தப் பிரச்சினையைத் திராவிட மாணவர் கழகத் தோழர்கள் மக்களிடம் எடுத்துச் செல்வார்கள் என்றும் தெரிவித்துள்ளார்.
நீட் தேர்வை ஒழிக்கும் வரை ஓய்வில்லை!
நீட் தேர்வை ஒழிக்கும் வரை தங்களது போராட்டம் தொடரும் என்றும், சமூகநீதியைக் காக்க தொடர்ந்து களமிறங்குவோம் என்றும் திராவிடர் கழகத் தலைவர் கி.வீரமணி தனது அறிக்கையில் தெரிவித்துள்ளார்.
ஈவிஎம் முறைகேடு குற்றச்சாட்டுகள் குறித்து திமுக, அதிமுக மௌனம் ஏன்? – ஐயநாதன் சரமாரி கேள்வி!