நடிகர் அஜித் குமார் நடிப்பில் அடுத்தடுத்து உருவாகவுள்ள 3 திரைப்படங்கள் குறித்த அதிகாரப்பூர்வமற்ற சுவாரஸ்யமான தகவல்கள் வெளியாகியுள்ளன.
‘குட் பேட் அக்லி’ திரைப்படத்திற்குப் பிறகு, அஜித் தனது அடுத்த படம் குறித்த அதிகாரப்பூர்வ அறிவிப்பை இன்னும் வெளியிடாமல் இருந்து வருகிறார். ஆதிக் ரவிச்சந்திரன் தான் இப்படத்தின் இயக்குநர் என்பது உறுதி செய்யப்பட்டிருந்தாலும், பட்ஜெட் மற்றும் தயாரிப்பாளர் சார்ந்த சில சிக்கல்கள் காரணமாக படத்தின் அறிவிப்பு தள்ளிப்போய்க்கொண்டே இருந்தது.
ஆதிக் ரவிச்சந்திரன் திரைப்படம்:
தற்போது எழுந்துள்ள தகவல்களின்படி, ஆதிக் ரவிச்சந்திரன் இயக்கும் இந்தப் படத்தை அஜித்தே சொந்தமாகத் தயாரித்து நடிக்கத் திட்டமிட்டுள்ளார். இப்படத்தின் படப்பிடிப்பு இந்த மாதமே தொடங்கவுள்ளதாகவும், வரும் டிசம்பர் மாதத்திற்குள் ஒட்டுமொத்தப் படப்பிடிப்பையும் முடித்துவிட அஜித் திட்டமிட்டுள்ளதாகவும் கூறப்படுகிறது.
வெங்கட் பிரபு கூட்டணியில் ‘மங்காத்தா 2’:
ஆதிக் ரவிச்சந்திரன் படத்தைத் தொடர்ந்து, இயக்குநர் வெங்கட் பிரபு இயக்கத்தில் பெரும் எதிர்பார்ப்பைக் கொண்டுள்ள ‘மங்காத்தா 2’ படத்தில் அஜித் நடிக்கவுள்ளார். இந்தப் பிரம்மாண்டமான படத்தின் படப்பிடிப்பு அடுத்த ஆண்டின் (2027) தொடக்கத்தில் தொடங்கும் என எதிர்பார்க்கப்படுகிறது.
இயக்குநர் சிவாவுடன் மீண்டும் இணைப்பு:
‘மங்காத்தா 2’ திரைப்படத்திற்குப் பிறகு, சிறுத்தை சிவா இயக்கத்தில் உருவாகும் புதிய படத்தில் அஜித் இணையவுள்ளார். இதற்கான படப்பிடிப்பு அடுத்த ஆண்டு கோடைக்காலத்திற்குப் பிறகு தொடங்கும் என்று திரைப்பட வட்டாரங்கள் தெரிவிக்கின்றன.
கடந்த சில மாதங்களாகக் கார் பந்தயங்களில் தீவிரமாகப் பங்கேற்று வந்த அஜித், தற்போது மீண்டும் திரையுலகில் முழுவீச்சில் களம் இறங்கித் தொடர்ச்சியாக 3 படங்களில் நடித்துத் தனது ரசிகர்களை மகிழ்விக்கத் தயாராகி வருகிறார்.