அதர்வா நடிப்பில் உருவாகும் டிஎன்ஏ படத்திலிருந்து கண்ணே கனவே எனும் பாடல் வெளியாகி உள்ளது.
அதர்வா நடிப்பில் தற்போது உருவாகியிருக்கும் திரைப்படம் தான் டிஎன்ஏ. இந்த படத்தினை நெல்சன் வெங்கடேசன் எழுதி இயக்கியிருக்கிறார். இந்த படத்தில் அதர்வாவுடன் இணைந்து நிமிஷா சஜயன் முக்கிய கதாபாத்திரத்தில் நடித்திருக்கிறார். மேலும் இதில் நடிகர் அதர்வா இரட்டை வேடங்களில் நடித்திருப்பதாக சொல்லப்படுகிறது. அடுத்தது இந்த படத்திற்கு பார்த்திபன் ஒளி பதிவு செய்ய ஸ்ரீகாந்த் ஹரிஹரன், சத்ய பிரகாஷ், அனல் ஆகாஷ், பிரவீன் சாய்வி, சகி சிவா ஆகியோர் இசையமைத்திருக்கின்றனர். ஜிப்ரான் இதன் பின்னணி இசைக்கான பணிகளை கவனித்துள்ளார். சபு ஜோசப் இதன் எடிட்டிங் பணிகளை மேற்கொண்டுள்ளார். இந்த படத்தை ஒலிம்பியா மூவிஸ் நிறுவனம் தயாரித்திருக்கிறது. இந்த படத்தின் படப்பிடிப்புகள் ஏற்கனவே நிறைவடைந்த நிலையில் படமானது ரிலீஸுக்கு தயாராகி வருகிறது. இதற்கிடையில் இந்த படத்தின் பர்ஸ்ட் லுக் போஸ்டர் வெளியாகி ரசிகர்கள் மத்தியில் நல்ல வரவேற்பை பெற்றது.
அதைத் தொடர்ந்து தற்போது இந்த படத்தில் இருந்து கண்ணே கனவே எனும் முதல் பாடல் வெளியாகி இணையத்தில் வைரலாகி வருகிறது. இந்த பாடல் வரிகளை கார்த்திக் நேதா எழுதி இருக்கும் நிலையில் ஸ்ரீகாந்த் ஹரிஹரன் மற்றும் ஸ்ரீஷா பகவதுலா ஆகியோர் இணைந்து பாடி இருக்கின்றனர். மேலும் இந்த பாடலை இசையமைப்பாளர் ஏ ஆர் ரகுமான் தனது சமூக வலைதள பக்கத்தில் வெளியிட்டுள்ளார் என்பது குறிப்பிடப்பட்டது.