நடிகர் சிம்பு மாநாடு, பத்து தல உள்ளிட்ட படங்களின் வெற்றிக்கு பிறகு தனது 48 வது படத்தில் நடிக்க இருக்கிறார். இந்த படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்கிறது. இதனை கண்ணும் கண்ணும் கொள்ளை அடித்தால் என்ற படத்தின் இயக்குனர் தேசிங்கு பெரியசாமி இயக்குகிறார். இந்த படத்திற்காக சிம்பு வெறித்தனமாக ஒர்க் அவுட் செய்து வருகிறார்.
இந்நிலையில் இன்று சிம்பு தனது 41 வது பிறந்த நாளை கொண்டாடி வரும் நிலையில் நேற்று சிம்புவிற்கு பிறந்தநாள் தெரிவிக்கும் வகையில் STR 48 படத்தின் ஃபர்ஸ்ட் லுக் போஸ்டரை பட குழுவினர் வெளியிட்டிருந்தனர். இந்த போஸ்டரில் இரட்டை வேடங்களில் சிம்பு காண்பிக்கப்பட்டார். ஏற்கனவே வெளியான தகவலின் படி இந்த படத்தில் சிம்பு ஹீரோவாகவும், வில்லனாகவும் நடிப்பது போன்று தெரிகிறது. அதேசமயம் இப்படம் பிரம்மாண்டமான செட் அமைக்கப்பட்டு பாகுபலி படத்தைப் போலவே பீரியாடிக் படமாக உருவாக இருக்கிறது. 
இந்நிலையில் படம் குறித்த முக்கிய அப்டேட் ஒன்று வெளியாகி உள்ளது. அதன்படி இந்த படத்தில் சிம்புவுக்கு ஜோடியாக நடிகை பூஜா ஹெக்டே நடிக்க உள்ளதாக தற்போதைய தகவல்கள் தெரிவிக்கின்றன. எனினும் இது சம்பந்தமான அறிவிப்பு விரைவில் வெளியாகும் என்று எதிர்பார்க்கப்படுகிறது.
தெலுங்கு மற்றும் ஹிந்தி படங்களில் நடித்து வரும் பூஜா ஹெக்டே தமிழில் ஜீவா நடிப்பில் வெளியான முகமூடி திரைப்படத்திலும் விஜய் நடிப்பில் வெளியான பீஸ்ட் திரைப்படத்திலும் நடித்திருந்தார் என்பது குறிப்பிடத்தக்கது.