இயக்குனர் முத்தையாவின் மகன் நடிக்கும் சுள்ளான் சேது படத்தின் டீசர் ரிலீஸ் அப்டேட் வெளியாகி உள்ளது.
தமிழ் சினிமாவில் கிராமத்து பின்னணியில் நல்ல கதையம்சம் கொண்ட படங்களை இயக்கி ரசிகர்கள் மத்தியில் மிகவும் பிரபலமானவர் இயக்குனர் முத்தையா. அந்த வகையில் இவரது இயக்கத்தில் வெளியான குட்டிப்புலி, கொம்பன், மருது, தேவராட்டம், விருமன் ஆகிய படங்கள் ரசிகர்கள் மத்தியில் நல்ல வரவேற்பை பெற்றது. ஆனால் இவரது இயக்கத்தில் வெளியான காதர்பாட்ஷா என்ற முத்துராமலிங்கம் திரைப்படம் கலவையான விமர்சனங்களை பெற்றது. இதைத்தொடர்ந்து இயக்குனர் முத்தையா, அருள்நிதி நடிப்பில் புதிய படம் ஒன்றை இயக்கி வருவதாக சொல்லப்படுகிறது. 
ஆனால் அதிகாரப்பூர்வ அறிவிப்பு இதுவரை வெளியாகவில்லை. இதற்கிடையில் இயக்குனர் முத்தையா தனது மகன் விஜய் முத்தையாவை ஹீரோவாக அறிமுகமாக்கியுள்ளார். அதன்படி விஜய் முத்தையா ஹீரோவாக நடிக்கும் புதிய படத்திற்கு சுள்ளான் சேது என்று தலைப்பு வைக்கப்பட்டிருக்கிறது. இந்த படத்தில் சமுத்திரக்கனி, தர்ஷினி, பிரிகிடா சாகா போன்றோர் முக்கிய கதாபாத்திரங்களில் நடித்துள்ளனர். நடிகர் பரத் வில்லனாக நடித்திருக்கிறார் என சொல்லப்படுகிறது. 
ஆக்சன் படமாக உருவாகும் இந்த படத்தை கே.கே.ஆர் சினிமாஸ் நிறுவனம் தயாரிக்க ஜென் மார்ட்டின், ஜிப்ரான் ஆகியோர் இந்த படத்திற்கு இசையமைத்துள்ளனர். கடந்த ஆண்டிலேயே இந்த படத்தின் படப்பிடிப்பு பூஜையுடன் தொடங்கப்பட்டு விறுவிறுப்பாக நடைபெற்று வந்தது. இந்நிலையில் இந்த படத்தின் டீசர் வருகின்ற ஆகஸ்ட் 27ஆம் தேதி வெளியாகும் என படக்குழு புதிய போஸ்டர் ஒன்றை வெளியிட்டு அறிவித்துள்ளது.