பிரதமர் நரேந்திர மோடி இரண்டு நாள் பயணமாக இன்று (அக்டோபர் 30) குஜராத் மாநிலத்திற்குச் செல்கிறார். இந்தப் பயணத்தின்போது ரூ.14,000 கோடிக்கும் அதிகமான மதிப்பிலான பல்வேறு வளர்ச்சித் திட்டங்களைத் தொடங்கி வைக்கவும், அடிக்கல் நாட்டவும் உள்ளார்.
மேலும், பிரதமர் கிசான் சம்மான் நிதி திட்டத்தின் 24-வது தவணையாக நாடு முழுவதும் உள்ள விவசாயிகளுக்கு சுமார் ரூ.19,000 கோடி நிதியை விடுவிக்க உள்ளார். இரண்டு புதிய ரயில் சேவைகளையும் கொடியசைத்துத் தொடங்கி வைக்கிறார்.
கால்நடை வளர்ச்சிக்காக புதிய ஆராய்ச்சி மையம்
குஜராத்தின் பனஸ்கந்தா மாவட்டத்தில் உள்ள பில்டி பகுதியில் 127 ஏக்கர் பரப்பளவில் அமைக்கப்பட்டுள்ள பாரத் போவைன் பிரீடிங் அண்ட் ரிசர்ச் சென்டர் (Bharat Bovine Breeding and Research Centre) மையத்தை பிரதமர் நாட்டுக்கு அர்ப்பணிக்க உள்ளார்.
காங்க்ரேஜ் இன மாடுகளின் மரபணு மேம்பாடு, கால்நடை இனப்பெருக்கம் மற்றும் நவீன தொழில்நுட்பங்களை மேம்படுத்துவதே இந்த மையத்தின் முக்கிய நோக்கமாகும்.
மேலும், தாராட் மற்றும் ராதன்பூர் பகுதிகளில் பனாஸ் பால் கூட்டுறவு நிறுவனத்தின் சார்பில் அமைக்கப்பட உள்ள இரண்டு பயோ-சிஎன்ஜி ஆலைகளுக்கும் அடிக்கல் நாட்டுகிறார். இந்த ஆலைகள் நாளொன்றுக்கு முறையே 75 டன் மற்றும் 100 டன் மாட்டுச் சாணத்தைச் செயலாக்கும் திறன் கொண்டவையாக இருக்கும்.
அகமதாபாத் மெட்ரோ விரிவாக்கம்
அகமதாபாத் மெட்ரோ ரயில் திட்டத்தின் இரண்டாம் கட்டத்தில் 2A மற்றும் 2B விரிவாக்கப் பணிகளுக்கு பிரதமர் அடிக்கல் நாட்ட உள்ளார்.
2A திட்டம் கோடேஷ்வர் சாலையில் இருந்து விமான நிலையம் வரை 6 கிலோமீட்டருக்கும் அதிகமான தொலைவிலும், 5 ரயில் நிலையங்களுடனும் அமைக்கப்பட உள்ளது.
2B திட்டம் கிப்ட் சிட்டியில் இருந்து ஷாபூர் வரை 3.3 கிலோமீட்டர் தொலைவிலும், 3 ரயில் நிலையங்களுடனும் செயல்படுத்தப்பட உள்ளது.
மேலும், அகமதாபாத் – மெஹ்சானா மாநில நெடுஞ்சாலை 41-ஐ நான்கு வழிச்சாலையில் இருந்து எட்டு வழிச்சாலையாக விரிவாக்கம் செய்ய ரூ.2,600 கோடி மதிப்பிலான திட்டத்திற்கும் அடிக்கல் நாட்டுகிறார்.
4,030 புதிய அங்கன்வாடி மையங்கள்
குஜராத் மாநிலம் முழுவதும் குழந்தைகளுக்கு ஏற்ற வகையில் 4,030 புதிய அங்கன்வாடி மையங்கள் அமைக்கும் திட்டத்திற்குப் பிரதமர் அடிக்கல் நாட்டுகிறார். ஏற்கெனவே கட்டி முடிக்கப்பட்டுள்ள 361 அங்கன்வாடி மையங்களையும் தொடங்கி வைக்க உள்ளார்.
சுமார் ரூ.800 கோடி மதிப்பிலான இந்தத் திட்டத்தின் மூலம் 4 லட்சத்திற்கும் அதிகமான மக்கள் பயனடைவார்கள் என எதிர்பார்க்கப்படுகிறது.
மேலும், வேளாண் உள்கட்டமைப்பு நிதியின் கீழ் நிறைவு செய்யப்பட்ட 521 திட்டங்களையும் நாட்டுக்கு அர்ப்பணிக்க உள்ளார். இத்திட்டங்களின் மொத்த மதிப்பு சுமார் ரூ.4,950 கோடியாகும்.
இரண்டு புதிய ரயில் சேவைகள் தொடக்கம்
ரயில் போக்குவரத்தை மேம்படுத்தும் வகையில் அகமதாபாத் (சபர்மதி) – வாரணாசி எக்ஸ்பிரஸ் மற்றும் மெஹ்சானா – பெச்சராஜி – சபர்மதி மெமு ரயில் சேவைகளை பிரதமர் கொடியசைத்துத் தொடங்கி வைக்கிறார்.
மேலும், 12 தோட்டக்கலைக் குழுமத் திட்டங்களின் செயல்பாடுகளையும் தொடங்கி வைக்க உள்ளார். சுமார் 1.46 லட்சம் ஹெக்டேர் பரப்பளவில் செயல்படுத்தப்பட உள்ள இத்திட்டங்களால் 1.3 லட்சத்திற்கும் அதிகமான விவசாயிகள் பயனடைவார்கள் என தெரிவிக்கப்பட்டுள்ளது.
அக்டோபர் 31-ல் தேசிய ஒற்றுமை தின விழா
தொடர்ந்து, அக்டோபர் 31-ம் தேதி சர்தார் வல்லபாய் படேலின் 151-வது பிறந்தநாளை முன்னிட்டு ஏக்தா நகரில் நடைபெறும் தேசிய ஒற்றுமை தின விழாவில் பிரதமர் பங்கேற்கிறார்.
அங்கு அமைந்துள்ள ஒற்றுமைக்கான சிலைக்கு மலர் தூவி மரியாதை செலுத்துவதுடன், ரூ.400 கோடிக்கும் அதிகமான மதிப்பிலான வளர்ச்சித் திட்டங்களையும் தொடங்கி வைக்கிறார்.
மேலும், இந்தியாவின் கலாசாரம், பாரம்பரியம் மற்றும் சுற்றுலாவை முன்னிறுத்தும் ‘பாரத் பர்வ் 2026’ நிகழ்ச்சியையும் தொடங்கி வைக்கிறார். இந்த விழா நவம்பர் 15-ம் தேதி வரை நடைபெற உள்ளது.
இரண்டு நாள் குஜராத் பயணத்தில் விவசாயம், கால்நடை வளர்ப்பு, போக்குவரத்து, குழந்தைகள் நலன், உள்கட்டமைப்பு மற்றும் சுற்றுலா உள்ளிட்ட பல்வேறு துறைகளில் புதிய திட்டங்களை பிரதமர் தொடங்கி வைக்க உள்ளார்.