நடிகை நயன்தாரா நடித்துள்ள ‘மூக்குத்தி அம்மன் 2’ திரைப்படத்திற்காக அவர் விரதம் இருந்து மாசாணியம்மன் கோவிலில் வேண்டிக்கொண்டதாக இயக்குநர் சுந்தர் சி தெரிவித்துள்ளார்.
இந்தப் படத்திற்காக நயன்தாரா காட்டிய அர்ப்பணிப்பு பாராட்டுக்குரியது என்றும் அவர் நெகிழ்ச்சியுடன் குறிப்பிட்டார். மேலும், திரைப்படத்தில் சுமார் 3,000 காட்சிகள் கணினி வரைகலை (CG) தொழில்நுட்பத்தின் உழைப்பில் உருவாக்கப்பட்டுள்ளதாகவும், 15 காட்சிகள் மட்டுமே செயற்கை நுண்ணறிவு (AI) தொழில்நுட்பத்தைப் பயன்படுத்தி உருவாக்கப்பட்டதாகவும் அவர் விளக்கம் அளித்துள்ளார்.
வேல்ஸ் ஃபிலிம் இன்டர்நேஷனல் தயாரிப்பில், இயக்குநர் சுந்தர் சி இயக்கத்தில் உருவாகியுள்ள ‘மூக்குத்தி அம்மன் 2’ திரைப்படத்தின் முன்னோட்ட நிகழ்ச்சி சென்னையின் எம்.ஆர்.சி. நகரில் உள்ள தனியார் விடுதியில் நடைபெற்றது. இதில் நடிகர்கள் நயன்தாரா, யோகி பாபு, குஷ்பு உள்ளிட்டோர், இசையமைப்பாளர் ஹிப் ஹாப் ஆதி, தயாரிப்பாளர் ஐசரி கணேஷ் மற்றும் படக்குழுவினர் கலந்து கொண்டனர்.
நயன்தாராவின் அர்ப்பணிப்பு பாராட்டுக்குரியது – சுந்தர் சி
நிகழ்ச்சியில் பேசிய இயக்குநர் சுந்தர் சி, ‘மூக்குத்தி அம்மன்’ முதல் பாகத்திற்கும் இரண்டாம் பாகத்திற்கும் பெயர், தயாரிப்பாளர் ஐசரி கணேஷ், நடிகை நயன்தாரா மற்றும் நடிகை ஊர்வசி ஆகியோரைத் தவிர வேறு எந்தத் தொடர்பும் இல்லை என்று தெரிவித்தார். இரண்டாம் பாகம் தனித்துவமான கதைக்களத்துடன் உருவாகியுள்ளதாகவும் அவர் கூறினார்.
இந்தப் படத்தை உருவாக்குவது மிகவும் சவாலான பணியாக இருந்ததாகக் குறிப்பிட்ட அவர், சுமார் 400 கலைஞர்கள் இரவு பகலாக உழைத்து வருவதாகத் தெரிவித்தார். படத்தில் இடம்பெற்றுள்ள காட்சிகள் அனைத்தும் செயற்கை நுண்ணறிவைப் பயன்படுத்தி உருவாக்கப்பட்டவை எனச் சிலர் விமர்சிப்பது தவறான தகவல் என்றும் அவர் மறுத்தார்.
“இந்தப் படத்தில் சுமார் 3,000 ஷாட்கள் சிஜி தொழில்நுட்பத்தின் மூலம் உருவாக்கப்பட்டுள்ளன. 15 ஷாட்கள் மட்டுமே ஏஐ தொழில்நுட்பத்தைப் பயன்படுத்தி உருவாக்கப்பட்டுள்ளன” என்று சுந்தர் சி விளக்கமளித்தார். ஏஐ தொழில்நுட்பத்தின் வளர்ச்சியைத் தாம் குறைத்து மதிப்பிடவில்லை என்றும், வரும் காலங்களில் அது திரைப்படத் துறையில் முக்கியப் பங்கு வகிக்கும் என்றும் அவர் குறிப்பிட்டார்.
மேலும், படத்திற்காக நயன்தாரா விரதம் இருந்ததாகவும், படப்பிடிப்பின்போது ஏற்பட்ட தடைகளைத் தொடர்ந்து மாசாணியம்மன் கோவிலுக்குச் சென்று வேண்டிக்கொண்டதாகவும் சுந்தர் சி தெரிவித்தார். நயன்தாராவின் அர்ப்பணிப்பும் உழைப்பும் பாராட்டுக்குரியவை என்றும் அவர் கூறினார்.
நடிகை ஊர்வசியின் நடிப்பைப் பாராட்டிய சுந்தர் சி, மொழி தொடர்பான சவால்களையும் பொருட்படுத்தாமல் அவர் சிறப்பாக நடித்துக் கொடுத்ததாகத் தெரிவித்தார். தனது படங்களில் நகைச்சுவைக்கு முக்கியத்துவம் அளிக்கப்படுவதாகக் கூறிய அவர், ‘மூக்குத்தி அம்மன் 2’ படத்திலும் நகைச்சுவைக் காட்சிகள் சிறப்பாக அமைந்துள்ளதாகக் குறிப்பிட்டார்.
“சுந்தர் சி 32 ஆண்டுகளாக மாறாத மனிதர்” – குஷ்பு
நிகழ்ச்சியில் பேசிய நடிகை குஷ்பு, இயக்குநர் சுந்தர் சியுடனான தனது நீண்டகாலப் பயணத்தை நினைவுகூர்ந்தார். “நான் பெற்றெடுத்தது இரண்டு குழந்தைகள்; தத்தெடுத்தது ஒரு குழந்தை. அந்தக் குழந்தை சுந்தர் சி” என்று நகைச்சுவையாகக் குறிப்பிட்டார்.
கடந்த 32 ஆண்டுகளாக வெற்றி, தோல்வி, மகிழ்ச்சி, துன்பம் எனப் பல்வேறு சூழல்களைச் சந்தித்தபோதும் சுந்தர் சி தனது இயல்பை மாற்றிக்கொள்ளாதவர் என்று பாராட்டினார். ஒரு திரைப்படத்தை உருவாக்கும்போது தயாரிப்பாளருக்கு எவ்வாறு லாபம் கிடைக்கச் செய்யலாம் என்பதிலேயே அவர் கவனம் செலுத்துவார் என்றும் தெரிவித்தார்.
‘மூக்குத்தி அம்மன் 2’ படத்தைப் பொறுத்தவரை, அம்மன் கதைக்களத்தைப் பொழுதுபோக்கு அம்சங்களுடன் இணைத்து சுந்தர் சி சிறப்பாக உருவாக்கியுள்ளதாகக் கூறினார். படத்தில் ஹிப் ஹாப் ஆதியின் இசை முக்கியப் பங்கு வகிப்பதாகவும், நடிகை ரெஜினாவின் தோற்றமும் கதாபாத்திரமும் சிறப்பாக அமைந்துள்ளதாகவும் அவர் தெரிவித்தார்.
நயன்தாராவின் நடிப்பையும் அர்ப்பணிப்பையும் பாராட்டிய குஷ்பு, ஒரே இடத்தில் சுமார் இரண்டரை மணி நேரம் அமர்ந்து நடிக்க வேண்டிய காட்சியிலும் அவர் பொறுமையுடன் நடித்ததாகக் குறிப்பிட்டார். திரையுலகில் உச்சத்தை அடைந்ததற்கும் மீண்டும் வலுவாகத் திரும்பி வந்ததற்கும் அவரது அர்ப்பணிப்பே முக்கியக் காரணம் என்றும் கூறினார்.
நடிகை ஊர்வசியைப் பாராட்டிய அவர், “நான் ஒரு படத்தில் யாருடன் நடித்தாலும் பயப்பட மாட்டேன். ஆனால் ஊர்வசியுடன் நடிக்கும்போது மட்டும் பயமாக இருக்கும். அவர் நடிக்கும் காட்சியில் பார்வையாளர்களின் கவனம் முழுவதும் அவர்மீதே இருக்கும்” என்று தெரிவித்தார்.
சுந்தர் சி படங்களுக்கு குடும்பத்துடன் பெண்கள் அதிகளவில் திரையரங்குகளுக்கு வருவது வழக்கம் என்றும், ‘மூக்குத்தி அம்மன் 2’ படத்திற்கும் அத்தகைய வரவேற்பு கிடைக்கும் என நம்புவதாகவும் குஷ்பு கூறினார்.
“சுந்தர் சி படம் என்றாலே குடும்பங்கள் பார்க்கும்” – ஹிப் ஹாப் ஆதி
இசையமைப்பாளர் ஹிப் ஹாப் ஆதி பேசுகையில், சில இயக்குநர்களின் திரைப்படங்கள் அவர்களின் தனித்துவமான பாணியால் அடையாளம் காணப்படும் என்றும், அந்த வகையில் சுந்தர் சியின் படங்களுக்கு என்று தனி ரசிகர் பட்டாளம் இருப்பதாகவும் தெரிவித்தார்.
‘மூக்குத்தி அம்மன் 2’ திரைப்படம், தொலைக்காட்சியில் பண்டிகை நாட்களில் ஒளிபரப்பப்படும் குடும்பங்கள் ஒன்றாக அமர்ந்து பார்க்கும் பொழுதுபோக்குத் திரைப்படங்களை நினைவூட்டும் வகையில் அமைந்துள்ளதாகக் குறிப்பிட்டார். முதல் பாகத்திற்கும் இரண்டாம் பாகத்திற்கும் கதைக்களத்தில் தொடர்பு இல்லை என்றும், நயன்தாரா மற்றும் ஊர்வசி ஆகியோர் இரு படங்களிலும் இடம்பெறுவதாகவும் தெரிவித்தார்.
இந்தப் படத்தில் நயன்தாராவுக்கு வலுவான கதாபாத்திரம் அமைந்துள்ளதாகவும், சுமார் 20 நிமிடங்கள் இடம்பெறும் கிளைமாக்ஸ் காட்சிகள் சவாலான அனுபவமாக இருந்ததாகவும் கூறினார். பின்னணி இசைக்கு அதிக முக்கியத்துவம் அளிக்கப்பட்டுள்ளதாகவும், ரெஜினாவின் கதாபாத்திரமும் படத்தின் முக்கிய அம்சமாக இருக்கும் என்றும் தெரிவித்தார்.
யோகி பாபு இந்தப் படத்தின் முக்கியத் தூண்களில் ஒருவர் என்று குறிப்பிட்ட ஆதி, அவருடன் தொடர்ந்து பல படங்களில் பணியாற்ற விரும்புவதாகக் கூறினார். மேலும், படத்தில் இரண்டு நட்சத்திரங்கள் சிறப்புத் தோற்றத்தில் இடம்பெறுவார்கள் என்றும் தெரிவித்தார்.
சுமார் ஒன்றரை ஆண்டுகளுக்கும் மேலாக உழைத்து உருவாக்கப்பட்டுள்ள இந்தப் படம், தீபாவளியை முன்னிட்டு ஒரு திருவிழாவைப் போல ரசிகர்களிடம் கொண்டு செல்லப்படும் என்றும் அவர் கூறினார்.
“நயன்தாரா அம்மனாகவே வாழ்ந்திருக்கிறார்” – தயாரிப்பாளர் ஐசரி கணேஷ்
தயாரிப்பாளர் ஐசரி கணேஷ் பேசுகையில், ‘மூக்குத்தி அம்மன் 2’ திரைப்படம் தங்களது தயாரிப்பு நிறுவனத்தின் 27-வது படம் என்று தெரிவித்தார். இயக்குநர் சுந்தர் சி தனது நீண்டகால நண்பர் என்றும், அவருடன் இணைந்து பணியாற்றுவது மகிழ்ச்சியளிப்பதாகவும் கூறினார்.
‘மூக்குத்தி அம்மன்’ முதல் பாகத்தைத் தயாரித்த இயக்குநர் ஆர்.ஜே.பாலாஜிக்கு நன்றி தெரிவித்த அவர், அந்தப் படத்தின் கருத்தாக்கத்தை முதலில் கொண்டு வந்தவர் அவர்தான் என்று குறிப்பிட்டார். அதேவேளையில், இரண்டாம் பாகம் முற்றிலும் மாறுபட்ட கதைக்களத்தைக் கொண்ட சுந்தர் சியின் திரைப்படம் என்றும் தெரிவித்தார்.
படத்தைத் தாம் பார்த்துவிட்டதாகவும், படம் மிகவும் பிடித்திருந்ததாகவும் கூறிய ஐசரி கணேஷ், பார்வையாளர்களும் படத்தைப் பார்த்த பிறகு தங்களது கருத்துகளைத் தெரிவிக்க வேண்டும் என்றார்.
சுந்தர் சியுடன் சுமார் 30 ஆண்டுகளாகப் பழகி வருவதாகக் குறிப்பிட்ட அவர், தாம் இதுவரை பணியாற்றிய இயக்குநர்களில் சுந்தர் சி தனித்துவமானவர் என்றும், ஒப்புக்கொண்ட பட்ஜெட்டை விடக் குறைந்த செலவில் படத்தை முடித்துக் கொடுக்கும் திறமை அவருக்கு இருப்பதாகவும் பாராட்டினார்.
நயன்தாரா இந்தப் படத்தில் அம்மனாகவே வாழ்ந்திருப்பதாகக் கூறிய தயாரிப்பாளர், படத்திற்காக அவர் மிகுந்த உழைப்பைச் செலுத்தியதாகவும், படப்பிடிப்புக் காலத்தில் அசைவ உணவைத் தவிர்த்து வந்ததாகவும் தெரிவித்தார். ஹிப் ஹாப் ஆதியின் இசையும் படத்திற்கு மிகப்பெரிய பலமாக அமைந்துள்ளதாகக் குறிப்பிட்டார்.
ஐந்து மொழிகளில் வெளியாகும் ‘மூக்குத்தி அம்மன் 2’
‘மூக்குத்தி அம்மன் 2’ திரைப்படம் தமிழ், இந்தி, மலையாளம், தெலுங்கு, கன்னடம் என ஐந்து மொழிகளில் வெளியாகும் என்று தயாரிப்பாளர் ஐசரி கணேஷ் தெரிவித்தார். மேலும், திரைப்படம் சுமார் ரூ.120 கோடி செலவில் உருவாக்கப்பட்டுள்ளதாகவும் அவர் கூறினார்.
அம்மன் கதைக்களம், நகைச்சுவை, பிரமாண்டமான காட்சிகள், பின்னணி இசை மற்றும் நட்சத்திரங்களின் நடிப்பு எனப் பல்வேறு அம்சங்களுடன் உருவாகியுள்ள இந்தப் படம் ரசிகர்களிடம் வரவேற்பைப் பெறும் எனப் படக்குழுவினர் நம்பிக்கை தெரிவித்துள்ளனர்.
மூக்குத்தி அம்மன் 2 என் மனதிற்கு நெருக்கமான திரைப்படம்! – நடிகை நயன்தாரா நெகிழ்ச்சி