மூக்குத்தி அம்மன் 2 திரைப்படம் ரூ.100 போடி பட்ஜெட்டில் உருவாக இருப்பதாக தகவல் வெளியாகி உள்ளது.
தமிழ் சினிமாவில் முன்னணி நடிகைகளில் ஒருவரான நடிகை நயன்தாரா தற்போது டெஸ்ட், டாக்ஸிக், ராக்காயி போன்ற பல படங்களை கைவசம் வைத்துள்ளார். இதற்கிடையில் இவர், மூக்குத்தி அம்மன் 2 திரைப்படத்திலும் நடிப்பதற்கு ஒப்பந்தமாகியுள்ளார். அதாவது கடந்த 2020 ஆம் ஆண்டு ஆர்.ஜே. பாலாஜியின் இயக்கத்தில் நயன்தாராவின் நடிப்பில் வெளியான திரைப்படம் தான் மூக்குத்தி அம்மன். இந்த படத்தில் நடிகை நயன்தாரா, அம்மனாக நடித்து அனைவரையும் ஆச்சரியப்படுத்தி இருந்தார். இந்த படம் ரசிகர்கள் மத்தியில் வசூல் ரீதியாகவும் விமர்சன ரீதியாகவும் நல்ல வரவேற்பை பெற்றது. இந்த படத்தின் வெற்றிக்குப் பிறகு நடிகை நயன்தாரா, மூக்குத்தி அம்மன் 2 திரைப்படத்தில் நடிக்கப் போவதாகவும் இந்த படத்தை வேல்ஸ் ஃபிலிம்ஸ் இன்டர்நேஷனல் நிறுவனம் தயாரிக்கப் போவதாகவும் அறிவிக்கப்பட்டது. அதன் பின்னர் இந்த படத்தை இயக்குனர் சுந்தர். சி இயக்க உள்ளார் என படக்குழு அறிவித்தது. 
அதன் பின்னர் இந்த படம் தொடர்பான எந்த தகவலும் வெளிவரவில்லை. இருப்பினும் இந்த ஆண்டில் இந்த படத்தின் படப்பிடிப்பு தொடங்கப்படும் என எதிர்பார்க்கப்படுகிறது. இந்நிலையில் மூக்குத்தி அம்மன் 2 படம் குறித்த லேட்டஸ்ட் அப்டேட் வெளியாகியுள்ளது. அதன்படி இப்படமானது ரூ.100 கோடி பட்ஜெட்டில் உருவாக இருக்கிறது என நம்பத் தகுந்த வட்டாரங்கள் தெரிவிக்கின்றன. இந்த தகவல் இந்த படத்தின் மீதான எதிர்பார்ப்பை அதிகப்படுத்தி உள்ளது.
இயக்குனர் சுந்தர். சி, தற்போது வடிவேலு நடிப்பில் கேங்கர்ஸ் திரைப்படத்தை இயக்கி வருகிறார். மேலும் விஷால் நடிப்பில் புதிய படம் ஒன்றை இயக்கப் போவதாகவும், அரண்மனை 5, சங்கமித்ரா ஆகிய படங்களை இயக்கப் போவதாகவும் தகவல் வெளியாகி வருவது குறிப்பிடத்தக்கது.