ராகவா லாரன்ஸ் இயக்கி நடிக்கும் காஞ்சனா 4 படத்தின் படப்பிடிப்பு குறித்த புதிய தகவல் வெளியாகியுள்ளது.
நடிகர் ராகவா லாரன்ஸ் தற்போது லோகேஷ் கனகராஜ் தயாரிப்பில் உருவாகும் ‘பென்ஸ்’ திரைப்படத்தில் நடித்து வருகிறார். இது தவிர ‘கால பைரவா’ போன்ற படங்களை கைவசம் வைத்திருக்கிறார். இதற்கிடையில் இவர், ‘காஞ்சனா 4’ எனும் திரைப்படத்தை தானே தயாரித்து, இயக்கி, நடித்து வருகிறார். ஏற்கனவே ராகவா லாரன்ஸ் இயக்கி இருந்த முனி, காஞ்சனா 1, 2, 3 ஆகிய படங்கள் ரசிகர்கள் மத்தியில் நல்ல வரவேற்பை பெற்றது. அதேபோல் ‘காஞ்சனா 4’ படமும் காமெடி கலந்த ஹாரர் படமாக தயாராகி வருகிறது. இந்தப் படத்தில் பூஜா ஹெக்டே, நோரா பதேகி, ரெடின் கிங்ஸ்லி ஆகியோர் முக்கிய கதாபாத்திரத்தில் நடித்து வருகின்றனர். இது தவிர நடிகை ராஷ்மிகாவும் இப்படத்தில் நடிப்பதாக சொல்லப்படுகிறது. ஆனால் அதிகாரப்பூர்வ அறிவிப்பு இதுவரை வெளியாகவில்லை. 
மேலும் மிகுந்த எதிர்பார்ப்புகளுடன் உருவாகி வரும் இந்த படத்தின் படப்பிடிப்புகள் கடந்த சில மாதங்களுக்கு முன்னதாக தொடங்கி சென்னை, பொள்ளாச்சி, கேரளா, பாண்டிச்சேரி போன்ற பகுதிகளில் விறுவிறுப்பாக நடைபெற்று வருகிறது. தற்போது இதன் கூடுதல் தகவல் என்னவென்றால், இந்த படத்தின் படப்பிடிப்பு கிட்டத்தட்ட 50 சதவீதம் நிறைவடைந்து விட்டதாக தெரியவந்துள்ளது. அதே சமயம் விரைவில் இந்த படத்தின் ரிலீஸ் தேதி அறிவிக்கப்படும் எனவும் எதிர்பார்க்கப்படுகிறது.