விடாமுயற்சி படத்தின் ஃபர்ஸ்ட் சிங்கிள் விரைவில் வெளியாக உள்ளதாக தகவல் கிடைத்துள்ளது.
தல, அல்டிமேட் ஸ்டார் என ரசிகர்களால் கொண்டாடப்படுபவர் நடிகர் அஜித். இவரின் 62 ஆவது படமாக உருவாகியுள்ள படம் தான் விடாமுயற்சி. இந்த படத்தினை மீகாமன், தடையறத் தாக்க, தடம் ஆகிய படங்களை இயக்கிய மகிழ் திருமேனி இயக்கியிருக்கிறார். லைக்கா நிறுவனத்தின் தயாரிப்பிலும் அனிருத்தின் இசையிலும் இந்த படம் உருவாகி உள்ளது. ஓம் பிரகாஷ் இதன் ஒளிப்பதிவு பணிகளை கவனிக்கிறார். இந்த படத்தில் அஜித்துக்கு ஜோடியாக திரிஷா நடிக்கிறார். மேலும் படத்தில் அர்ஜுன், ரெஜினா மற்றும் ஆரவ் ஆகியோர் வில்லன் கதாபாத்திரத்தில் நடித்திருக்கின்றனர். இந்த படத்தின் படப்பிடிப்பு கடந்த சில மாதங்களுக்கு முன்னரே அஜர்பைஜானில் தொடங்கப்பட்டது. அதை தொடர்ந்து விறுவிறுப்பாக நடைபெற்று வந்த இந்த படத்தின் படப்பிடிப்பு கிட்டத்தட்ட 95 சதவீதம் நிறைவடைந்ததாக சொல்லப்படுகிறது. இன்னும் பாடல் காட்சி ஒன்று மட்டும் படமாக்கப்பட இருக்கிறது. இதற்கிடையில் இந்த படத்தில் இருந்து அடுத்தடுத்த போஸ்டர்களும் சமீபத்தில் டீசரும் வெளியாகி படத்தின் மீதான எதிர்பார்ப்பை பெரிய அளவில் அதிகப்படுத்தியது. 
அதேசமயம் இந்த படமானது அடுத்த ஆண்டு பொங்கல் தினத்தை முன்னிட்டு வெளியாகும் என அறிவிக்கப்பட்டுள்ளது. இந்நிலையில் இந்த படத்தின் இறுதி கட்ட படப்பிடிப்பு விரைவில் பேங்காக் பகுதியில் நடைபெற இருப்பதாகவும் அங்கு 10 நாட்கள் படப்பிடிப்பு நடத்த திட்டமிடப்பட்டுள்ளதாகவும் தெரியவந்துள்ளது. அதுமட்டுமில்லாமல் விரைவில் இந்த படத்தின் முதல் பாடல் வெளியாகும் என எதிர்பார்க்கப்படுகிறது. இந்த பாடலானது அஜித் மற்றும் திரிஷா ஆகிய இருவருக்குமான காதல் பாடலாக இருக்கும் என நம்பப்படுகிறது.