நாடு முழுவதும் இன்று செப்டம்பர் 11ஆம் தேதி வங்கி ஊழியர்கள் ஒருநாள் வேலைநிறுத்தத்தில் ஈடுபட்டுள்ளதால், வங்கிக் கிளைகளில் நேரடியாக மேற்கொள்ளப்படும் பல்வேறு சேவைகள் பாதிக்கப்பட வாய்ப்புள்ளது. வாடிக்கையாளர்கள் வங்கிக்குச் செல்லும் முன்பு இதுகுறித்து தெரிந்துகொள்வது அவசியம்.
யுனைடெட் ஃபோரம் ஆஃப் பேங்க் யூனியன்ஸ் சார்பில் இந்த நாடு தழுவிய வேலைநிறுத்தத்திற்கு அழைப்பு விடுக்கப்பட்டுள்ளது. வாரத்தில் ஐந்து நாட்கள் மட்டுமே வங்கி பணிமுறை அமல்படுத்த வேண்டும் என்பதும், செயல்திறன் அடிப்படையிலான ஊக்கத்தொகை திட்டத்தில் உள்ள பிரச்சினைகளை தீர்க்க வேண்டும் என்பதும் வங்கி ஊழியர் சங்கங்களின் முக்கிய கோரிக்கைகளாக உள்ளன.
எந்த வங்கி சேவைகள் பாதிக்கப்படும்?
வேலைநிறுத்தத்தில் ஊழியர்கள் பங்கேற்பதன் காரணமாக வங்கிக் கிளைகளில் நேரடியாக மேற்கொள்ளப்படும் பணிகள் பாதிக்கப்படலாம்.
குறிப்பாக,
• வங்கி கவுன்டர் சேவைகள்
• பணம் டெபாசிட் மற்றும் பணம் எடுக்கும் பணிகள்
• காசோலை தொடர்பான பணிகள்
• KYC மற்றும் ஆவண சமர்ப்பிப்பு
• வங்கிக் கிளையில் நேரடியாக மேற்கொள்ள வேண்டிய பிற சேவைகள்
ஆகியவற்றில் தாமதம் அல்லது இடையூறு ஏற்பட வாய்ப்புள்ளது.
UPI இயங்குமா?
வங்கி வேலைநிறுத்தம் காரணமாக UPI சேவை முழுமையாக நிறுத்தப்படும் என்ற அச்சம் தேவையில்லை. UPI, மொபைல் பேங்கிங் மற்றும் இணையவங்கி போன்ற டிஜிட்டல் சேவைகள் வழக்கம்போல் செயல்படும் என எதிர்பார்க்கப்படுகிறது.
அதேபோல், ATM மற்றும் பிற சுயசேவை இயந்திரங்களும் தொடர்ந்து செயல்படும் என வங்கிகள் தெரிவித்துள்ளன. இருப்பினும், தொழில்நுட்பக் கோளாறு அல்லது குறிப்பிட்ட வங்கியின் சேவை நிலையைப் பொறுத்து தற்காலிக இடையூறுகள் ஏற்பட வாய்ப்பு உள்ளது.
தொடர்ந்து 4 நாட்கள் வங்கி கிளைகளுக்கு விடுமுறையா?
இன்றைய வேலைநிறுத்தத்தைத் தொடர்ந்து செப்டம்பர் 12ஆம் தேதி இரண்டாவது சனிக்கிழமை மற்றும் செப்டம்பர் 13ஆம் தேதி ஞாயிற்றுக்கிழமை என்பதால் பெரும்பாலான வங்கிக் கிளைகள் வழக்கமான விடுமுறையில் இருக்கும்.
மேலும், செப்டம்பர் 14ஆம் தேதி விநாயகர் சதுர்த்தி காரணமாக சில மாநிலங்களில் வங்கி விடுமுறை இருக்கும். இதனால் சில பகுதிகளில் வங்கிக் கிளை சேவைகள் தொடர்ந்து நான்கு நாட்கள் பாதிக்கப்படக்கூடிய சூழல் ஏற்பட்டுள்ளது. மாநிலத்திற்கு மாநிலம் வங்கி விடுமுறை மாறுபடும்.
மீண்டும் பெரிய வேலைநிறுத்தம் வருமா?
வங்கி ஊழியர் சங்கங்கள் செப்டம்பர் 11ஆம் தேதியுடன் போராட்டத்தை முடித்துக்கொள்ளாமல், தங்களது கோரிக்கைகளுக்கு தீர்வு கிடைக்காவிட்டால் செப்டம்பர் 28 முதல் 30ஆம் தேதி வரை மேலும் ஒரு நாடு தழுவிய வேலைநிறுத்தத்தை நடத்த திட்டமிட்டுள்ளன.
அதற்குப் பிறகும் கோரிக்கைகள் நிறைவேற்றப்படாவிட்டால் அக்டோபர் 26ஆம் தேதி முதல் காலவரையற்ற வேலைநிறுத்தத்தில் ஈடுபடுவோம் என்றும் சங்கங்கள் எச்சரித்துள்ளன.
எனவே, இன்று வங்கிக் கிளைக்கு சென்று அவசரப் பணிகளை மேற்கொள்ள வேண்டியவர்கள் தங்கள் கிளையின் செயல்பாட்டு நிலையை முன்கூட்டியே தெரிந்துகொள்வது நல்லது. அதே நேரத்தில் UPI, ATM, மொபைல் பேங்கிங் மற்றும் இணையவங்கி போன்ற டிஜிட்டல் சேவைகளை வாடிக்கையாளர்கள் பயன்படுத்திக்கொள்ளலாம்.
உத்தரப் பிரதேச அரசு அதிரடி முடிவு! ஓய்வுபெற்ற அரசு மருத்துவர்கள் 70 வயது வரை பணியாற்றலாம்!