இந்திய ராணுவ வீரர்களின் பயன்பாட்டுக்காக உள்நாட்டிலேயே உருவாக்கப்பட்ட அதிநவீன உயர் உயரப் பகுதி பாராசூட்டின் (Advanced High-Altitude Parachute – AHAP) முதல் நேரடி சோதனை லடாக்கில் வெற்றிகரமாக நடத்தப்பட்டுள்ளது.
பாதுகாப்பு ஆராய்ச்சி மற்றும் மேம்பாட்டு நிறுவனம் (DRDO) சார்பில் இந்த சோதனை, லடாக்கின் நியோமா பகுதியில் உள்ள முஹ் டிராப் சோன் (Mudh DZ) பகுதியில் நடத்தப்பட்டது.
16,000 அடி உயரத்தில் சோதனை
விமானத்தில் இருந்து சுமார் 16,000 அடி உயரத்தில் வீரர்கள் குதித்து பாராசூட்டை சோதனை செய்தனர். 15,500 அடி உயரத்தில் பாராசூட் திறக்கப்பட்டு, நியோமா பகுதியில் உள்ள சுமார் 13,700 அடி உயரமுள்ள தரைப்பகுதியில் வீரர்கள் பாதுகாப்பாக தரையிறங்கினர்.
மிகவும் உயரமான மலைப்பகுதியில் கடினமான வானிலை நிலவும் சூழலிலும் இந்த சோதனை வெற்றிகரமாக நடத்தப்பட்டுள்ளது. பாராசூட்டின் செயல்திறன் மற்றும் அதிக உயரப் பகுதிகளில் ராணுவ ரீதியாக பயன்படுத்தக்கூடிய தன்மை இந்த சோதனையின் மூலம் உறுதி செய்யப்பட்டுள்ளதாக DRDO தெரிவித்துள்ளது.
ராணுவ வீரர்களை ஒரே நேரத்தில் தரையிறக்க முடியும்
AHAP என்பது ‘Static Line’ முறையில் செயல்படும் பாராசூட் அமைப்பாகும். இதன் மூலம் அதிக எண்ணிக்கையிலான ராணுவ வீரர்களை ஒரே நேரத்தில் விமானத்திலிருந்து குதித்து தரையிறக்க முடியும்.
இந்த பாராசூட் பல்வேறு முறைகளில் பயன்படுத்தக்கூடியதாகவும், அதிகபட்சமாக 18,000 அடி உயரம் வரை செயல்படக்கூடியதாகவும் வடிவமைக்கப்பட்டுள்ளது. அதிக உயரத்தில் ஏற்படும் கடுமையான திறப்பு அதிர்வு மற்றும் வேகமான இறங்குதல் போன்ற சவால்களை கருத்தில் கொண்டு இதன் இறங்கும் வேகம் ராணுவத்தின் தேவைக்கு ஏற்ற வகையில் வடிவமைக்கப்பட்டுள்ளது.
உள்நாட்டிலேயே தயாரிப்பு
இந்த அதிநவீன பாராசூட் அமைப்பை ஆக்ராவில் உள்ள Aerial Delivery Research and Development Establishment (ADRDE) வடிவமைத்து உருவாக்கியுள்ளது. கான்பூரில் உள்ள Ordnance Parachute Factory இந்த அமைப்பை தயாரித்துள்ளது.
மேலும், DGAQA மூலம் ஆய்வு செய்யப்பட்டு, CEMILAC-ன் கான்பூர் மண்டல மையத்தால் சான்றளிக்கப்பட்டுள்ளது.
பாதுகாப்புத்துறை அமைச்சர் பாராட்டு
இந்தியாவின் தற்சார்பு பாதுகாப்புத் திறனை மேம்படுத்தும் மற்றொரு முக்கிய நடவடிக்கையாக இந்த வெற்றிகரமான சோதனை அமைந்துள்ளதாக பாதுகாப்புத்துறை அமைச்சர் ராஜ்நாத் சிங் பாராட்டு தெரிவித்துள்ளார்.
லடாக்கின் மிக உயரமான பகுதிகளில் நடைபெற்ற இந்த நேரடி சோதனை, இந்திய ராணுவத்தின் வான்வழி வீரர்கள் நடவடிக்கைகளில் உள்நாட்டு தொழில்நுட்பத்தின் பயன்பாட்டை மேலும் வலுப்படுத்தும் என எதிர்பார்க்கப்படுகிறது.
சேலை அணிந்து வெறும் காலுடன் 1,600 மீட்டர் ஓட்டம் – கணவனை இழந்த கவிதா குமாரியின் விடாமுயற்சி வைரல்!