வந்தே மாதரம் தீர்மானம்: ‘இது இந்தியாவின் கவுரவம் சார்ந்த விஷயம்’ – பாஜக தலைவர் நிதின் நபீன் அதிரடி!

இந்தியாவின் தேசியப் பாடலான ‘வந்தே மாதரம்’ பாடலின் பின்னணி, வரலாறு மற்றும் அதன் முழு வடிவத்தைப் பாதுகாக்கும் வகையில், பாரதிய ஜனதா கட்சியின் தலைவரான நிதின் நபீன் (Nitin Nabin) தலைமையில் 10 அம்சங்கள் கொண்ட முக்கியத் தீர்மானம் நிறைவேற்றப்பட்டுள்ளது.

காங்கிரஸ் முடிவுக்கு பாஜக எதிர்ப்பு

கடந்த 1937-ஆம் ஆண்டு காங்கிரஸ் எடுத்த முடிவின்படி, கட்சி நிகழ்ச்சிகளில் வந்தே மாதரம் பாடலின் முதல் இரண்டு சரணங்களை மட்டுமே பாட வேண்டும் என்பதை காங்கிரஸ் செயற்குழு (CWC) மீண்டும் உறுதிப்படுத்தியது. காங்கிரஸ் கட்சியின் இந்த முடிவிற்கு எதிராகவே பாஜக இந்தத் தீர்மானத்தைக் கொண்டு வந்துள்ளது.

இது குறித்துப் பேசிய பாஜக தலைவர் நிதின் நபீன், “வந்தே மாதரம் எந்தவொரு தனிப்பட்ட அரசியல் கட்சியுடனும் தொடர்புடைய விஷயம் அல்ல. இது இந்தியாவின் கவுரவம் மற்றும் தேசபக்தியுடன் தொடர்புடையது” என்று குறிப்பிட்டார்.

பாஜக தீர்மானத்தின் முக்கிய அம்சங்கள்

• முழுப் பாடலின் முக்கியத்துவம்: வந்தே மாதரம் பாடலின் ஆறு சரணங்களின் கண்ணியத்தையும் வரலாற்றையும் பாதுகாப்போம் என்றும், வாக்கு வங்கி அரசியலுக்காகத் தேசியப் பாடலின் முக்கியத்துவத்தைக் குறைப்பதை ஏற்க முடியாது என்றும் தெரிவிக்கப்பட்டுள்ளது.

• சட்டப்பூர்வ அந்தஸ்து: 1950-இல் அரசியல் நிர்ணய சபை வழங்கிய அங்கீகாரத்தின் படியும், பாராளுமன்ற திருத்தத்தின் படியும் தேசிய கீதத்திற்கு (ஜன கண மன) இணையான சட்டப்பூர்வ அந்தஸ்து வந்தே மாதரத்திற்கும் உள்ளது சுட்டிக்காட்டப்பட்டுள்ளது.

• விழிப்புணர்வுப் பிரச்சாரம்: வந்தே மாதரம் பாடலின் முழுமையான அர்த்தம், அதன் தியாக வரலாறு மற்றும் ஆறு சரணங்களையும் இளைய தலைமுறையினரிடம் கொண்டு சேர்க்கும் வகையில் நாடு தழுவிய விழிப்புணர்வுப் பிரச்சாரத்தை பாஜக முன்னெடுக்கும்.

• விகசித் பாரத் 2047: பிரதமர் நரேந்திர மோடியின் ‘வளர்ச்சியடைந்த இந்தியா 2047’ (Viksit Bharat @ 2047) இலக்கை அடைவதற்கு வந்தே மாதரத்தின் தேசபக்தி உணர்வே முதன்மை காரணியாக இருக்கும் எனத் தீர்மானத்தில் குறிப்பிடப்பட்டுள்ளது.