தேர்தல் ஆணையம் மற்றும் தலைமைத் தேர்தல் ஆணையர் ஞானேஷ் குமார் தொடர்பாக எதிர்க்கட்சிகள் தொடர்ந்து போராட்டம் நடத்தி வரும் நிலையில், தற்போது ஜந்தர் மந்தரில் போராட்டம் நடத்தப் போவதாக மக்களவை எதிர்க்கட்சித் தலைவர் ராகுல் காந்தி தெரிவித்துள்ளார்.
தேர்தல் ஆணையர் ஞானேஷ் குமாரை சந்தித்து தங்களது கோரிக்கைகளை தெரிவிக்க எதிர்க்கட்சி எம்.பி.க்கள் முயன்றதாகவும், ஆனால் அவர்களை சந்திக்க வாய்ப்பு வழங்கப்படவில்லை என்றும் ராகுல் காந்தி கூறியுள்ளார். இதையடுத்து, போராட்டத்துக்காக அனுமதிக்கப்பட்ட இடமான ஜந்தர் மந்தருக்குச் சென்று போராட்டம் நடத்த முடிவு செய்துள்ளதாக அவர் தெரிவித்துள்ளார்.
ஜந்தர் மந்தருக்கு புறப்பட்ட எதிர்க்கட்சி எம்.பி.க்கள்
காங்கிரஸ் தலைவர் மல்லிகார்ஜுன கார்கே ஏற்பாடு செய்திருந்த மதிய உணவு சந்திப்பில் இந்தியா கூட்டணி கட்சிகளைச் சேர்ந்த எதிர்க்கட்சி எம்.பி.க்கள் பங்கேற்றனர். இதையடுத்து ராகுல் காந்தி, பிரியங்கா காந்தி உள்ளிட்ட தலைவர்கள் மற்றும் எதிர்க்கட்சி எம்.பி.க்கள் பேருந்துகளில் ஜந்தர் மந்தர் நோக்கி புறப்பட்டனர்.
என்ன கோரிக்கை?
வாக்காளர் பட்டியல் சிறப்பு தீவிர திருத்தம் (SIR) தொடர்பாக முறைகேடுகள் இருப்பதாக எதிர்க்கட்சிகள் குற்றம்சாட்டி வருகின்றன. மேலும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும் எதிர்க்கட்சிகள் வலியுறுத்தி வருகின்றன. இந்த விவகாரத்தை முன்னிறுத்தியே ஜந்தர் மந்தரில் போராட்டம் நடைபெற உள்ளது.
முந்தைய நாளில் தேர்தல் ஆணையத்தை நோக்கி எதிர்க்கட்சியினர் நடத்திய போராட்டத்தில் போலீசாருடன் தள்ளுமுள்ளு ஏற்பட்டதுடன், ராகுல் காந்தி உள்ளிட்ட சில தலைவர்கள் தடுத்து வைக்கப்பட்டிருந்தனர். இதன் தொடர்ச்சியாகவே தற்போது ஜந்தர் மந்தரில் போராட்டம் நடத்த எதிர்க்கட்சிகள் முடிவு செய்துள்ளன.
ஜந்தர் மந்தர் போராட்டத்துக்காக அதிகாரப்பூர்வமாக ஒதுக்கப்பட்ட போராட்ட இடமாக இருப்பதை சுட்டிக்காட்டிய ராகுல் காந்தி, அங்கு ஒன்றாக அமர்ந்து தங்களது கோரிக்கைகளை மக்களிடம் தெரிவிப்போம் என்று கூறியுள்ளார்.
இதனால் ஜந்தர் மந்தர் பகுதியில் பாதுகாப்பு பலப்படுத்தப்பட்டுள்ள நிலையில், எதிர்க்கட்சிகளின் போராட்டம் அடுத்தகட்டமாக எவ்வாறு அமையும் என்பது அரசியல் வட்டாரத்தில் கவனம் பெற்றுள்ளது.
2047-க்குள் வளர்ந்த இந்தியா! “நிச்சயம் நாம் அதைச் செய்வோம்” – பிரதமர் மோடி உறுதி