1947-ல் நாட்டின் பிரிவினையின் போது நரேந்திர மோடியைப் போன்ற ஒரு தலைமை பிரதமராக இருந்திருந்தால், இந்தியாவிற்கு யாராலும் எந்தப் பாதிப்பும் ஏற்படுத்தியிருக்க முடியாது என்று உத்தரப் பிரதேச முதல்வர் யோகி ஆதித்யநாத் தெரிவித்துள்ளார்.
உத்தரப் பிரதேசத்தின் சித்தார்த்நகரில் நடைபெற்ற பல்வேறு வளர்ச்சித் திட்டங்களின் தொடக்க விழா மற்றும் அடிக்கல் நாட்டு விழாவில் கலந்து கொண்டு உரையாற்றியபோதே அவர் இவ்வாறு பேசினார்.
“வரலாற்றின் கருப்புப் பக்கங்களில் இருந்து பாடம் கற்க வேண்டும்”
நிகழ்ச்சியில் யோகி ஆதித்யநாத் பேசிய முக்கிய அம்சங்கள்:
சநாதன தேசத்தின் பிளவு: “1947 பிரிவினையின் போது லட்சக்கணக்கான இந்துக்கள் படுகொலை செய்யப்பட்டனர். அப்போது அவர்களின் வலையைக் கேட்கவோ அல்லது குரல் கொடுக்கவோ யாரும் இல்லை. அதிகாரத்தில் இருந்தவர்கள் சநாதன தேசத்தைத் துண்டு துண்டாகப் பிளந்தனர்.”
சுயநல அரசியல்: “1947-ல் நாடு சுதந்திரமடைந்த போது, பாகிஸ்தான் ஆதரவாளர்கள் கோராத நிலப்பரப்புகள் கூட வலுக்கட்டாயமாகப் பாகிஸ்தானிடம் ஒப்படைக்கப்பட்டன. பஞ்சாப் மற்றும் வங்காளத்தின் இந்துக்கள் பெரும்பான்மையாக வாழ்ந்த பகுதிகள் அதிகார பேராசையின் காரணமாகக் கைமாறின.”
வாக்கு வங்கி அரசியல்: “அன்று அமைதி காத்தவர்கள் அதிகாரத்தைக் கைப்பற்றுவதிலேயே குறியாக இருந்தனர். பங்களாதேஷில் இந்துக்கள் படுகொலை செய்யப்பட்டபோதும், தங்கள் ‘வாக்கு வங்கி’ போய்விடுமோ என்ற பயத்தில் மௌனம் காத்தனர்.”
பிரிவினை தந்த விலை
தொடர்ந்து பேசிய அவர், “அக்காலத்தில் நம்மிடம் வலிமையும் அறிவும் இருந்தது, ஆனால் சாதி, பிராந்தியம் மற்றும் மொழி அடிப்படையிலான உள்நாட்டுப் பூசல்களால் நாம் பிளவுபட்டிருந்தோம்.
சுதந்திரப் போராட்டத்தின் போது எழுந்த தியாகங்களை மறந்து, சுயநலத்திற்காக மக்களைப் பிரித்து வைத்ததற்கான விலையைத் தான் இந்தியா இன்றளவும் தீவிரவாதம் மற்றும் சதிகளின் ரூபத்தில் கொடுத்துக் கொண்டிருக்கிறது,” என்று குறிப்பிட்டார்.
அகண்ட இந்தியாவின் பகுதியாக இருந்த ஆப்கானிஸ்தான், பாகிஸ்தான் மற்றும் பங்களாதேஷ் ஆகியவை பிரிந்த வரலாற்றை சுட்டிக்காட்டிய அவர், பிரிவினையின் கொடூர நினைவுகளை மறந்துவிடாமல், வரலாற்றிலிருந்து பாடம் கற்றுக்கொண்டு நாட்டின் ஒற்றுமையைப் பாதுகாக்க வேண்டும் என்று வலியுறுத்தினார்.