“காங்கிரஸ் போனதால்தான் நாங்களும் போனோம்; ஆனால் திமுக எங்களை மட்டும் குறிவைத்து தாக்குகிறது!” – கொந்தளிக்கும் திருமாவளவன்!

காங்கிரஸைத் தொடர்ந்தே முடிவு: “காங்கிரஸ் கட்சி கூட்டணியிலிருந்து வெளியேறியதால்தான், அடுத்தடுத்து இடதுசாரிகள், முஸ்லிம் லீக் மற்றும் விசிக வெளியேறும் சூழல் உருவானது. காங்கிரஸ் வெளியேறி 3 முதல் 4 நாட்களுக்குப் பிறகுதான் எங்கள் நிலைப்பாட்டை அறிவித்தோம். ஆனால், திமுகவோ விசிகவைக் குறிவைத்து விமர்சனங்களை அதிகரித்து வருகிறது; எங்களது கட்சியிலிருந்து ஆட்களை இழுக்க முயற்சிக்கிறது.”

சமூக ஊடகங்களின் குறி: “திமுக மட்டுமல்லாமல், கட்சி சாராத சில யூடியூபர்களும் யாருடையவோ தூண்டுதலின் பேரில் எங்களை இலக்காக வைத்துச் செயல்படுகிறார்கள். நாங்கள் ஒரு கூட்டணியில் இருந்தோம், தேர்தலைச் சந்தித்தோம், 2 தொகுதிகளில் வெற்றி பெற்றோம். தவெக அழைப்பு விடுத்தபோது முதலில் தயங்கினாலும், பின்னர் இணைந்தோம். நாங்கள் எங்கள் வேலையைத்தான் பார்த்துக்கொண்டிருக்கிறோம்.”

தலைமைத்துவத்தை நீர்த்துப்போகச் செய்யும் சூழ்ச்சி: “இந்த நிமிடம் வரை ஒரு கும்பல் விசிகவை குறிவைத்து விமர்சித்துக் கொண்டேயிருக்கிறது. இதற்குக் முக்கியக் காரணம், தலித்துகள் சினிமா மோகம் கொண்டவர்கள் என்று குறைத்து மதிப்பிடுவதும், தனித்துவத்தோடும் வலிமையோடும் நிற்கிற திருமாவளவன் என்கிற தலைமைத்துவத்தை நீர்த்துப்போகச் செய்து சிதைப்பதும் ஆகும்.”

நம்பிக்கையைச் சிதைக்கத் திட்டம்: “‘திருமாவளவன் ஒன்றுமே இல்லை, மாற்றி மாற்றிப் பேசுகிறார், குழப்பத்தை ஏற்படுத்துகிறார்’ என்றெல்லாம் திட்டமிட்டுப் பேசுகிறார்கள். தமிழகம் முழுவதும் தலித்துகள் மட்டுமல்லாமல், தலித் அல்லாத சமூகங்களும் விசிக மீதும் எனது தலைமைத்துவத்தின் மீதும் கொண்டுள்ள நம்பிக்கையைச் சிதைக்கவே இந்தச் சூழ்ச்சிகள் அரங்கேறுகின்றன” என்று திருமாவளவன் ஆவேசமாகத் தெரிவித்தார்.