கிராண்ட் செஸ் டூர் போட்டியின் அரை இறுதிச் சுற்று அமெரிக்காவின் செயின்ட் லூயிஸ் கிளப்பில் நடைபெற்று வருகிறது.
இதில் இந்திய கிராண்ட் மாஸ்டரான ஆர். பிரக்ஞானந்தா, ஜெர்மனியின் வின்சென்ட் கீமருக்கு எதிரான முதல் ஆட்டத்தை டிரா செய்திருந்தார். இந்நிலையில் வின்சென்ட் கீமருடன் நேற்று முன்அரங்கில் மீண்டும் மோதினார் பிரக்ஞானந்தா. விறுவிறுப்பாக நடைபெற்ற இந்த ஆட்டத்தில் 55-வது நகர்த்தலின் போது பிரக்ஞானந்தா அபார வெற்றி பெற்றார்.
இதன் மூலம் பிரக்ஞானந்தா 9-3 என்ற புள்ளிகள் கணக்கில் முன்னிலையில் உள்ளார். இதன் வாயிலாகக் கிராண்ட் செஸ் டூரின் நிறைவு போட்டியின் இறுதிச் சுற்றுக்குத் தகுதி பெறும் வாய்ப்பை அவர் மிகவும் நெருங்கியுள்ளார்.
கிளாசிக்கல் போட்டியைத் தொடர்ந்து பிரக்ஞானந்தாவும், வின்சென்ட் கீமரும் 2 ரேபிட் மற்றும் 4 பிளிட்ஸ் போட்டிகளிலும் அடுத்து மோதவுள்ளனர் என்பது குறிப்பிடத்தக்கது.