இந்திய ஆண்கள் கிரிக்கெட் அணியின் தேர்வுக்குழுத் தலைவராக முன்னாள் சுழற்பந்து வீச்சாளர் பிரக்யான் ஓஜாவை இந்திய கிரிக்கெட் கட்டுப்பாட்டு வாரியம் (பிசிசிஐ) நியமித்துள்ளது. மேலும், முன்னாள் இந்திய வீரர் ரமேஷ் பவார் தேர்வுக்குழுவின் புதிய உறுப்பினராக நியமிக்கப்பட்டுள்ளார்.
அஜித் அகர்கருக்குப் பதிலாக பிரக்யான் ஓஜா
தேர்வுக்குழுத் தலைவராக இருந்த அஜித் அகர்கரின் பதவிக்காலம் முடிவடைந்ததைத் தொடர்ந்து, இடைக்காலத் தலைவராகப் பணியாற்றி வந்த பிரக்யான் ஓஜாவுக்கு தற்போது நிரந்தரப் பொறுப்பு வழங்கப்பட்டுள்ளது.
இந்திய அணிக்காக அதிக டெஸ்ட் போட்டிகளில் விளையாடியவர் என்ற அடிப்படையில், தேர்வுக்குழுவின் தலைவராக ஓஜா நியமிக்கப்பட்டுள்ளதாக பிசிசிஐ தெரிவித்துள்ளது.
ரமேஷ் பவார் தேர்வுக்குழுவில் நியமனம்
முன்னாள் சுழற்பந்து வீச்சாளரான ரமேஷ் பவாரைத் தேர்வுக்குழு உறுப்பினராக நியமிக்க, பிசிசிஐயின் கிரிக்கெட் ஆலோசனைக் குழு ஒருமனதாகப் பரிந்துரைத்தது. இந்தக் குழுவில் அசோக் மல்ஹோத்ரா மற்றும் ஜதின் பராஞ்ச்பே இடம்பெற்றுள்ளனர்.
ரமேஷ் பவார் இந்திய அணிக்காக 2 டெஸ்ட் மற்றும் 31 ஒருநாள் போட்டிகளில் விளையாடியுள்ளார். வீரராக ஓய்வுபெற்ற பிறகு, இந்திய மகளிர் அணியின் தலைமைப் பயிற்சியாளராகவும், மும்பை மற்றும் குஜராத் அணிகளின் பயிற்சியாளராகவும் பணியாற்றியுள்ளார்.
மேலும், பெங்களூருவில் உள்ள பிசிசிஐ சிறப்பு மையத்தில் சுழற்பந்து வீச்சுப் பயிற்சியாளராகவும் செயல்பட்டுள்ளார். இந்திய மகளிர் அணியின் பயிற்சியாளராக இருந்தபோது, ஆசியக் கோப்பையை வெல்லவும், 2022 காமன்வெல்த் விளையாட்டுப் போட்டியில் வெள்ளிப் பதக்கம் பெறவும் அணிக்கு வழிகாட்டினார்.
புதிய தேர்வுக்குழுவில் இடம்பெற்றுள்ளவர்கள்
பிரக்யான் ஓஜா தலைமையிலான இந்திய ஆண்கள் கிரிக்கெட் அணியின் தேர்வுக்குழுவில் சிவ் சுந்தர் தாஸ், ஆர்.பி. சிங், அஜய் ரத்ரா மற்றும் ரமேஷ் பவார் ஆகியோர் உறுப்பினர்களாக இடம்பெற்றுள்ளனர்.
இந்தக் குழு, இந்திய ஆண்கள் அணிக்கான வீரர்கள் தேர்வு மற்றும் அணியின் கலவை தொடர்பான முக்கிய முடிவுகளை எடுக்கும் பொறுப்பை வகிக்கும்.
அஜித் அகர்கருக்கு பிசிசிஐ நன்றி
முன்னாள் தேர்வுக்குழுத் தலைவர் அஜித் அகர்கரின் அர்ப்பணிப்பு மற்றும் பங்களிப்புக்கு பிசிசிஐ பாராட்டு தெரிவித்துள்ளது. அவரது தலைமையில் இந்திய கிரிக்கெட் அணி பல முக்கிய சர்வதேச வெற்றிகளைப் பெற்றதாகவும் வாரியம் குறிப்பிட்டுள்ளது.
புதிய தேர்வுக்குழுவின் தலைமையில், எதிர்வரும் சர்வதேசப் போட்டிகளுக்கான இந்திய அணித் தேர்வு எவ்வாறு அமையும் என்ற எதிர்பார்ப்பு கிரிக்கெட் ரசிகர்கள் மத்தியில் எழுந்துள்ளது.
இந்திய கிரிக்கெட் அணியின் தேர்வாளர் பதவிக்கு விண்ணப்பித்தார் வாசிம் ஜாஃபர்: தலைமைத் தேர்வாளர் ஆவாரா?