தமிழகத்தில் தற்பொழுது நிலவி வரும் அரசியல் சூழல், வரவிருக்கும் தேர்தல் களம், சினிமா பிம்ப கலாச்சாரம் மற்றும் அரசு நிர்வாகச் சிக்கல்கள் குறித்து மூத்த பத்திரிகையாளர் கோட்டீஸ்வரன் அளித்த விரிவான செய்தித் தொகுப்பு:
சினிமா மோகமும் விநாயகர் சதுர்த்தி பிம்பச் சீர்கேடும்
விநாயகர் சதுர்த்தி விழாவை முன்னிட்டு அமைக்கப்படும் சிலைகள் மற்றும் விளம்பரப் பேனர்கள் குறித்து மூத்த பத்திரிகையாளர் கோட்டீஸ்வரன் பேசுகையில், விநாயகர் சிலைகளைச் சினிமா நட்சத்திரங்களைப் போல் சித்தரிப்பதும், சிக்ஸ் பேக் (Six pack) வைப்பது போன்ற தோற்றங்களில் வடிவமைப்பதும் மரபிற்கு மாறானது என்று சுட்டிக்காட்டினார் . விநாயகரின் இயல்பான உருவ அமைப்பை மாற்றி உருவக் கேலி செய்வது போல சித்தரிப்பதைத் தவிர்க்க அரசு உரிய வழிகாட்டுதல்களை வழங்க வேண்டும் என வலியுறுத்தினார்.
மேலும் தமிழ் சினிமாவின் கலாச்சாரப் பிரதிபலிப்பு பற்றிப் குறிப்பிடுகையில், ‘மண்டாடி’ போன்ற திரைப்படங்கள் தமிழ்நாட்டின் பாரம்பரிய பாய்மரப் போட்டி மற்றும் கடலோர மக்களின் வாழ்வியலை மிக யதார்த்தமாகப் பதிவு செய்துள்ளதாகப் பாராட்டினார். அதேவேளையில், மாஸ் ஹீரோக்களின் வன்முறை சார்ந்த திரைப்படங்களை விட பண்பாட்டைப் போற்றும் திரைப்படங்களே சமுதாயத்திற்கு அவசியமானவை என்றும் கருத்து தெரிவித்தார்.
கம்யூனிஸ்டுகளின் கொள்கை முடிவும் தவெக-வின் அரசியல் நகர்வும்
இடைத்தேர்தல் மற்றும் கூட்டணி அரசியல் சூழல் குறித்துப் பேசிய அவர், கம்யூனிஸ்ட் கட்சிகள் (சிபிஐ மற்றும் சிபிஎம்) தங்களின் கொள்கை மாண்பைக் காப்பாற்றிக் கொள்ளவே தனித்து நிற்கும் முடிவை எடுத்துள்ளன என்றார். அரசியல் ரீதியாக மாற்றுக்கட்சியினரை இழுக்கும் “குதிரை பேர அரசியல்” ஜனநாயகத்திற்கு நல்லதல்ல. தமிழக வெற்றிக் கழகம் (தவெக) போன்ற புதிய கட்சிகள் பிற கட்சிகளில் இருந்து வருபவர்களைச் சேர்த்துக்கொள்வது தவறான முன்னுதாரணம் என இடதுசாரி தலைவர்கள் சுட்டிக்காட்டியதை அவர் நினைவுகூர்ந்தார். பண பலம் மற்றும் பதவி ஆசைகளுக்காக நடக்கும் இந்த அரசியல் மாற்றங்களிலிருந்து கம்யூனிஸ்டுகள் விலகி நிற்பது அவர்களின் அரசியல் முதிர்ச்சியைக் காட்டுகிறது என்றார்.
ஃபேன்சி நம்பர் பிளேட் ஏல முறைகேடு புகார்கள்
வாகனங்களுக்கான ஃபேன்சி எண்கள் (Fancy numbers) ஒதுக்குவதில் லட்சக்கணக்கில் முறைகேடுகள் நடந்துள்ளதாக சிஏஜி (CAG) அறிக்கையை மேற்கோள் காட்டி வெளியான செய்திகள் குறித்து அவர் விவரித்தார். ஒரே மொபைல் எண்ணைப் பயன்படுத்தி பல்வேறு ஓடிபி (OTP) மூலம் எண்களை முன் கூட்டியே பிளாக் (Block) செய்து சட்டவிரோதமாக விற்பனை செய்யும் வேலைகள் நடந்துள்ளதாகச் சந்தேகங்கள் எழுந்துள்ளன.
இந்த முறைகேடுகள் கடந்த அதிமுக ஆட்சியின் 2 ஆண்டுகள் மற்றும் தற்போதைய திமுக ஆட்சியின் 3 ஆண்டுகள் என இரு காலக்கட்டங்களிலும் நடந்துள்ளது. அப்போதைய போக்குவரத்துத்துறை அமைச்சர்களாக இருந்த எம்.ஆர்.விஜயபாஸ்கர் மற்றும் எஸ்.எஸ்.சிவசங்கர் ஆகிய இருவரின் துறைகளின் கீழும் இந்த நடைமுறைகள் நடந்துள்ளதால், இது குறித்து முறையான விசாரணை நடத்தப்பட வேண்டும் எனத் தெரிவித்தார்.
கூடலூர் புலித் தாக்குதல் மற்றும் வனத்துறையின் திணறல்
கூடலூர் மற்றும் ஓ வேலிப் பகுதிகளில் புலித் தாக்குதலால் பொதுமக்கள் உயிரிழந்த சம்பவம் மற்றும் நிலவி வரும் அச்சுறுத்தல் குறித்து வேதனை தெரிவித்தார். 25 நாட்களுக்கும் மேலாக புலியைப் பிடிக்க முடியாமல் வனத்துறை திணறி வருகிறது. நவீன தொழில்நுட்பங்கள் மற்றும் ட்ரோன்களைப் பயன்படுத்தினாலும், வனவிலங்குகளைக் கண்காணித்துத் தேடும் பழங்குடியின வல்லுநர்களின் (Trackers) சேவை போதிய அளவில் இல்லாததே இதற்கு முக்கியக் காரணம். பழங்குடியின இளைஞர்களுக்கு உரிய பயிற்சி அளித்து வனத்துறையில் இணைப்பதன் மூலமே இதுபோன்ற அவசரச் சூழல்களைச் சரியாகக் கையாள முடியும் என அவர் வலியுறுத்தினார்.