தமிழக அரசியலில் தற்போது நிலவி வரும் ஆரோக்கியமற்ற அரசியல் விவாதங்கள், தரம்தாழ்ந்த விமர்சனங்கள் மற்றும் அவதூறுப் பேச்சுக்கள் குறித்து பிரபல மனநல மருத்துவர் டாக்டர் ஷாலினி கடுமையாகச் சாடியுள்ளார். டெல்டா மாவட்டங்களின் குடிநீர் தட்டுப்பாடு, பட்ஜெட் போன்ற மிக முக்கியமான மக்கள் பிரச்சினைகள் திசைதிருப்பப்பட்டு, தனிமனித விமர்சனங்கள் முதன்மைப்படுத்தப்படுவது ஏற்புடையதல்ல என்று அவர் கவலை தெரிவித்துள்ளார்.
பொதுப் பிரச்சினைகளும்… திசைதிருப்பப்படும் அரசியலும்!
தமிழகத்தின் தற்போதைய அரசியல் சூழல் குறித்துக் கருத்து தெரிவித்துள்ள மருத்துவர் ஷாலினி, மாநிலத்தில் புதிய அரசு பொறுப்பேற்றுள்ள நிலையிலும் காவிரி டெல்டா மாவட்டங்களுக்கு உரிய தண்ணீர் சென்று சேராததால் விவசாயிகள் சொல்லொணாத் துயரத்திற்கு ஆளாகி வருவதாகக் வேதனை தெரிவித்தார். மேலும், மாநிலத்தின் பொருளாதார நிலைமை மற்றும் தாக்கல் செய்யப்பட்டுள்ள நிதிநிலை அறிக்கை (பட்ஜெட்) குறித்து விரிவாக விவாதிக்கப்பட வேண்டிய இந்த முக்கியமான காலகட்டத்தில், மக்களின் கவனத்தைப் பிற பிரச்சனைகளின் பக்கம் திசைதிருப்பும் வகையிலான தேவையற்ற விவாதங்களே திட்டமிட்டு முன்னிறுத்தப்படுவதாக அவர் கடுமையான குற்றச்சாட்டை முன்வைத்துள்ளார்.
தனிமனித தாக்குதல்களும் ஆபாச விமர்சனங்களும்
அரசியல் தலைவர்கள் பொதுவெளியில் பேசும்போது கடைபிடிக்க வேண்டிய குறைந்தபட்ச நாகரிகம் குறித்துக் குறிப்பிட்ட அவர், “அரசியல் களத்தில் கொள்கை ரீதியான விவாதங்கள் மட்டுமே இருக்க வேண்டும். மாறாக, ஆபாசமான மற்றும் தரம்தாழ்ந்த வார்த்தைப் பிரயோகங்களைப் பயன்படுத்துவதும், தனிமனிதர்களின் அந்தரங்கங்களைப் பொதுவெளியில் விவாதிப்பதும் வன்மையாகக் கண்டிக்கத்தக்கது . இது பெண்களை இழிவுபடுத்துவது மட்டுமல்லாமல், ஒட்டுமொத்த அரசியல் கலாச்சாரித்தையும் சீரழிக்கும் செயலாகும்” என்றார்.
சட்டத்தின் முன் அனைவரும் சமம்
பெண்களின் மாண்பைக் காக்கும் சட்டங்கள் மற்றும் அவதூறுப் பேச்சுக்கள் தொடர்பான விவகாரங்களில் இரட்டை நிலைப்பாடுகள் தவிர்க்கப்பட வேண்டும் எனக் குறிப்பிட்ட அவர், “பெண்களுக்கு எதிரான வன்முறைகள் அல்லது அவதூறுகள் மீது கடுமையான சட்ட நடவடிக்கைகள் எடுக்கப்பட வேண்டும் என்பதில் மாற்றுக் கருத்து இல்லை. ஆனால், அரசியல் காழ்ப்புணர்வுகளுக்காகவும், பழிவாங்கும் நடவடிக்கைகளுக்காகவும் சட்டங்கள் தவறாகப் பயன்படுத்தப்படுவதும், மக்களை திசைதிருப்ப பகடைக் காய்களாகப் பயன்படுத்துவதும் ஜனநாயகத்திற்கு ஆபத்தானது. இதுபோன்ற குறுகிய அரசியல் விவாதங்களைத் தவிர்த்து, மக்களின் அடிப்படைத் தேவைகளையும் வாழ்வாதார மேம்பாட்டையும் நோக்கியே தலைவர்களின் கவனம் இருக்க வேண்டும்” என அவர் ஆணித்தரமாகத் தெரிவித்தார்.