இந்தோனேசியாவில் உள்ள ‘அனக் கிரகடாவ்’ எரிமலை சக்திவாய்ந்த முறையில் வெடித்து தொடர்ந்து தீப்பிழம்பை கக்கி வருகிறது.
விமான சேவைகள் கடும் பாதிப்பு: தலைநகர் ஜகார்தாவின் சுகர்னோ-ஹட்டா மற்றும் ஹலீம் பெர்தானாக்குசுமா உள்ளிட்ட 8 முக்கிய விமான நிலையங்களில் சேவைகள் தற்காலிகமாக நிறுத்தப்பட்டுள்ளன. இதுவரை 1,558 விமானங்கள் ரத்து செய்யப்பட்டுள்ளதால், சுமார் 1,70,000 பயணிகள் விமான நிலையங்களில் தவித்து வருகின்றனர்.
மீண்டும் பெரிய வெடிப்புக்கு வாய்ப்பு: ஜூலை மாதத்துக்குப் பிறகு கடந்த ஞாயிற்றுக்கிழமை ஏற்பட்ட வெடிப்பே மிகவும் சக்திவாய்ந்ததாக இருந்ததாகப் புவியியல் மையத்தின் தலைவர் லானா சாரியா தெரிவித்துள்ளார். பூமிக்கடியில் லாவா குழம்பு மற்றும் வாயுக்களின் அழுத்தம் தொடர்ந்து அதிகரித்து வருவதால், மீண்டும் பெரிய அளவிலான வெடிப்புகள் ஏற்பட வாய்ப்புள்ளதாக அவர் எச்சரித்துள்ளார்.
பள்ளிகளுக்கு விடுமுறை: எரிமலைச் சாம்பல் பாதிப்பு அதிகமாக உள்ள ஜகார்த்தா மற்றும் லம்பாங் பகுதிகளில் உள்ள பள்ளிகளுக்கு விடுமுறை அளிக்கப்பட்டு, வகுப்புகள் இணையவழியில் (Online classes) மாற்றப்பட்டுள்ளன.
எச்சரிக்கை மற்றும் வழிகாட்டுதல்கள்: இவ்விபத்தால் இதுவரை உயிரிழப்புகள் எதுவும் ஏற்படவில்லை என்றபோதிலும், முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன:
மக்கள் வெளியே செல்லும்போது தவறாமல் முகக்கவசம் அணிய வேண்டும்.
எரிமலையின் சுற்றளவிலிருந்து குறைந்தபட்சம் 3 கிலோமீட்டர் தூரத்துக்கு அப்பால் இருக்குமாறு பேரிடர் மேலாண்மை முகமை பொதுமக்களைக் கேட்டுக்கொண்டுள்ளது.