உலகைச் சுற்றி வருவதற்காக 28 ஆண்டுகளாகத் தொடர்ந்து பயணம் மேற்கொண்ட பிரிட்டனைச் சேர்ந்த சாகச வீரர் கார்ல் புஷ்பி (Karl Bushby), சுமார் 50 ஆயிரம் கிலோமீட்டர் தூரத்தைக் கடந்து தனது சொந்த ஊருக்குத் திரும்பியுள்ளார். 29 நாடுகள், நான்கு கண்டங்கள் என நீண்ட பயணத்தை முடித்த அவருக்கு சொந்த ஊரில் உற்சாக வரவேற்பு அளிக்கப்பட்டது.
1998-ல் தொடங்கிய பிரம்மாண்டப் பயணம்!
பிரிட்டனின் ஹல் (Hull) நகரைச் சேர்ந்த கார்ல் புஷ்பி, முன்னாள் ராணுவ பாராசூட் வீரர் ஆவார். தனது 29-வது வயதில், 1998-ம் ஆண்டு நவம்பர் 1-ம் தேதி தென் அமெரிக்காவின் சிலி நாட்டில் உள்ள புன்டா அரீனாஸ் (Punta Arenas) பகுதியில் இருந்து தனது உலகச் சுற்றுப்பயணத்தைத் தொடங்கினார்.
இந்தப் பயணத்தின்போது இரண்டு முக்கியமான விதிகளை அவர் கடைப்பிடித்தார். எந்தவொரு மோட்டார் வாகனத்தையும் பயன்படுத்தி பயணத்தை முன்னெடுத்துச் செல்லக் கூடாது; மேலும், தனது இலக்கை அடையும் வரை சொந்த நாட்டுக்குத் திரும்பக் கூடாது என்பதே அந்த விதிகள்.
காடுகள், பாலைவனங்கள், உறைந்த கடல்கள்!
தென் அமெரிக்கா, மத்திய அமெரிக்கா, வட அமெரிக்கா, ஆசியா மற்றும் ஐரோப்பாவின் பல்வேறு பகுதிகளைக் கடந்து அவரது பயணம் நீண்டது.
கொலம்பியா மற்றும் பனாமா இடையே உள்ள ஆபத்தான டேரியன் காடுகளைக் கடந்து சென்றார். பின்னர் அமெரிக்கா, கனடா வழியாக அலாஸ்காவை அடைந்தார்.
2006-ம் ஆண்டு அலாஸ்காவுக்கும் ரஷ்யாவுக்கும் இடையிலான உறைந்த பெரிங் ஜலசந்தியை மற்றொரு சாகச வீரருடன் இணைந்து கடந்து சாதனை படைத்தார்.
இந்தப் பயணத்தில் கடும் பனிப்பொழிவு, ஆபத்தான வனப்பகுதிகள், விசா பிரச்சினைகள், போர் பதற்றங்கள் எனப் பல சவால்களை எதிர்கொண்டார்.
31 நாட்கள் கடலில் நீந்திய சாகசம்!
ரஷ்யா, மங்கோலியா, சீனா மற்றும் மத்திய ஆசிய நாடுகளைக் கடந்து ஐரோப்பாவை நோக்கிப் பயணித்தார்.
புவிசார் அரசியல் சூழல் காரணமாக சில பாதைகள் மூடப்பட்டதால், காஸ்பியன் கடலைக் கடப்பதற்காக சுமார் 31 நாட்கள் நீந்தும் சாகசத்திலும் ஈடுபட்டார். பின்னர் பிரான்ஸ் வழியாக இங்கிலாந்தை அடைவதற்காக ஆங்கிலக் கால்வாயையும் நீந்திக் கடந்தார்.
ரஷ்யாவின் விசா கட்டுப்பாடுகள், கொரோனா பெருந்தொற்று, நிதிப் பற்றாக்குறை உள்ளிட்ட காரணங்களால் 12 ஆண்டுகளில் முடிக்கத் திட்டமிட்ட பயணம் 28 ஆண்டுகளாக நீண்டது.
28 ஆண்டுகளுக்குப் பிறகு தாயுடன் நெகிழ்ச்சியான சந்திப்பு!
கடந்த நவம்பர் 2-ம் தேதி பிரிட்டனின் ஹல் நகரைச் சென்றடைந்த கார்ல் புஷ்பிக்கு நூற்றுக்கணக்கான மக்கள் உற்சாக வரவேற்பு அளித்தனர். சுமார் 50 ஆயிரம் கிலோமீட்டர் தூரப் பயணத்தை முடித்து தனது தாயார் ஏஞ்சலாவைச் சந்தித்தபோது உணர்ச்சிப்பூர்வமான தருணம் உருவானது.
இந்தப் பயணத்தின் மூலம் தனது மகன் ஆடம் மற்றும் இதுவரை நேரில் சந்தித்திராத 12 வயது பேத்தியையும் அவர் சந்தித்தார்.
ஜெர்மனியின் புகழ்பெற்ற திரைப்பட இயக்குநர் வெர்னர் ஹெர்சாக் (Werner Herzog), இவரது 28 ஆண்டுகால சாகசப் பயணத்தை ‘Walk of Life’ என்ற ஆவணப்படமாக உருவாக்கி வருகிறார்.
28 ஆண்டுகள், 29 நாடுகள், நான்கு கண்டங்கள், சுமார் 50 ஆயிரம் கிலோமீட்டர்கள் என மனித மன உறுதியையும் விடாமுயற்சியையும் வெளிப்படுத்திய கார்ல் புஷ்பியின் பயணம் உலகம் முழுவதும் கவனத்தை ஈர்த்துள்ளது.
AI தொழில்நுட்பத்தால் வேலை இழப்பா? தொழிலாளர்களைப் பாதுகாக்க சீனா அறிவித்த 18 அம்சத் திட்டம்!