நேபாளத்தில் உள்ள இமயமலைப் பகுதியில் மலையேற்றம் சென்ற 6 இந்திய சுற்றுலாப் பயணிகள் கடும் பனிப்பொழிவில் சிக்கியுள்ளனர். அவர்களில் 4 ஆண்கள், 2 பெண்கள் அடங்குவர். அவர்களை மீட்க நேபாள ராணுவத்தினர் களமிறங்கியுள்ள நிலையில், ஹெலிகாப்டர் உதவியுடன் மீட்புப் பணிகளை மேற்கொள்ள அதிகாரிகள் நடவடிக்கை எடுத்து வருகின்றனர்.
நேபாளத்தின் டோல்பா (Dolpa) மாவட்டத்தில் உள்ள ஷே-போக்சுண்டோ (Shey-Phoksundo) ஏரியை நோக்கி இந்த 6 இந்தியர்களும் பயணம் மேற்கொண்டுள்ளனர். அப்போது நும்லா லா மற்றும் பாகா லா மலைப்பாதைப் பகுதிகளில் கடுமையான பனிப்பொழிவு ஏற்பட்டுள்ளது.
இதனால் அந்தப் பகுதியில் பயணம் மேற்கொண்டிருந்த இந்தியர்களுடன் தொடர்பு துண்டிக்கப்பட்டது. பனிப்பொழிவால் அவர்கள் மலைப்பாதையில் சிக்கியிருக்கலாம் என உள்ளூர் வழிகாட்டிகள் சந்தேகம் தெரிவித்துள்ளனர்.
எச்சரிக்கையை மீறி பயணம் மேற்கொண்டதாகத் தகவல்!
மலைப்பகுதியில் கடுமையான பனிப்பொழிவு ஏற்படக்கூடும் என்பதால், அந்தப் பாதையில் பயணம் மேற்கொள்வது ஆபத்தானது என உள்ளூர் மக்கள் மற்றும் பாதுகாப்புப் பணியாளர்கள் சுற்றுலாப் பயணிகளை எச்சரித்ததாகக் கூறப்படுகிறது.
இருப்பினும், அவர்கள் தொடர்ந்து பயணம் மேற்கொண்டதாகவும், திரும்பி வரும் வழியில் பனியில் சிக்கியதாகவும் உள்ளூர் அதிகாரிகள் தெரிவித்துள்ளனர்.
டோல்பா மாவட்ட தலைமை அதிகாரி ஜூனு ஹமால், தோ பகுதியில் இருந்து போக்சுண்டோ ஏரியை நோக்கித் திரும்பியபோது சுற்றுலாப் பயணிகள் பனியில் சிக்கியதாகத் தெரிவித்துள்ளார்.
ஹெலிகாப்டர் மூலம் மீட்க நடவடிக்கை!
ஆறு இந்தியர்களையும் இதுவரை கண்டறிய முடியவில்லை என டோல்பா மாவட்ட காவல் துணைக் கண்காணிப்பாளர் அனில் ராஜ் கிரி தெரிவித்துள்ளார். அவர்களைத் தேடி மீட்க ஹெலிகாப்டர் ஏற்பாடு செய்யுமாறு சம்பந்தப்பட்ட அதிகாரிகளிடம் கோரிக்கை விடுக்கப்பட்டுள்ளது.
அந்தப் பகுதியில் கடுமையான பனிப்பொழிவு நிலவுவதுடன், மொபைல் போன் நெட்வொர்க் வசதியும் இல்லை. இதனால் சுற்றுலாப் பயணிகள் இருக்கும் இடத்தைக் கண்டறிவதில் சிக்கல் ஏற்பட்டுள்ளது.
இதற்கிடையே, நேபாள ராணுவக் குழுவும் மீட்புப் பணியில் ஈடுபடுத்தப்பட்டுள்ளது. மோசமான வானிலை மற்றும் அதிகப்படியான பனிப்படலம் காரணமாக மீட்புப் பணிகள் சவாலாக உள்ளன.
244 சுற்றுலாப் பயணிகள் மேல் டோல்பா பகுதியில்!
மாவட்ட நிர்வாகத்தின் தகவலின்படி, மேல் டோல்பா பகுதிக்கு மொத்தம் 244 சுற்றுலாப் பயணிகள் சென்றுள்ளனர். இவர்களில் 149 பேர் நேபாளத்தைச் சேர்ந்தவர்கள்; 44 பேர் சார்க் நாடுகளைச் சேர்ந்தவர்கள்; 51 பேர் பிற வெளிநாடுகளைச் சேர்ந்தவர்கள்.
மோசமான வானிலை நிலவுவதால், ஆபத்தான மலைப்பகுதிகளுக்குச் செல்வதைத் தவிர்த்து பாதுகாப்பான இடங்களில் இருக்குமாறு சுற்றுலாப் பயணிகளுக்கு மாவட்ட நிர்வாகம் அறிவுறுத்தியுள்ளது.
இமயமலைப் பகுதியில் ஏற்பட்டுள்ள கடும் பனிப்பொழிவால் 6 இந்தியர்கள் சிக்கியுள்ள சம்பவம் பெரும் கவலையை ஏற்படுத்தியுள்ளது. அவர்களைப் பாதுகாப்பாக மீட்கும் நடவடிக்கைகள் தொடர்ந்து நடைபெற்று வருகின்றன.
“10 நிமிடங்களில் ஈரானின் இலக்குகளை அழிக்க முடியும்!” – டிரம்ப் எச்சரிக்கை