ரஷ்யா – உக்ரைன் போருக்கு இடையிலும், ரஷ்யாவிடம் குறைந்த விலையில் கச்சா எண்ணெய் வாங்குவதன் மூலம் அந்த நாட்டின் பொருளாதாரத்திற்கு உதவும் நாடுகளைக் கட்டுப்படுத்த அமெரிக்கா இந்த அதிரடி நடவடிக்கையை மேற்கொண்டுள்ளது.
ரஷ்யாவிடமிருந்து தொடர்ந்து கச்சா எண்ணெய் மற்றும் எரிபொருட்களைக் கொள்முதல் செய்து வரும் இந்தியா, சீனா உள்ளிட்ட நாடுகள் மீது கூடுதல் வரிகளை விதிக்க வழிவகை செய்யும் புதிய மசோதா அமெரிக்க செனட் சபையில் (Senate) வெற்றிகரமாக நிறைவேற்றப்பட்டுள்ளது. இச்சட்டம் இறுதி ஒப்புதல் பெற்று அமலுக்கு வரும் பட்சத்தில், இந்தியா மற்றும் சீனாவிலிருந்து அமெரிக்காவிற்கு இறக்குமதி செய்யப்படும் பொருட்களுக்குக் கூடுதலாக 100 சதவீதம் வரை வரி (Tariff) விதிக்கும் அபார அதிகாரம் அமெரிக்க அதிபருக்குக் கிடைக்கும்.
ரஷ்யா – உக்ரைன் போருக்கு இடையிலும், ரஷ்யாவிடம் குறைந்த விலையில் கச்சா எண்ணெய் வாங்குவதன் மூலம் அந்நாட்டின் பொருளாதாரத்திற்கு மறைமுகமாக உதவும் நாடுகளைக் கட்டுப்படுத்தவே அமெரிக்கா இந்த அதிரடி நடவடிக்கையைக் கையில் எடுத்துள்ளது. இந்த மசோதாவின்படி, ரஷ்யாவிடமிருந்து அதிக அளவில் எரிபொருட்களை இறக்குமதி செய்யும் டாப் 5 நாடுகளான இந்தியா, சீனா, அஜர்பைஜான், ஹங்கேரி மற்றும் ஸ்லோவாக்கியா ஆகிய நாடுகளை இலக்கு வைத்து இந்த வரி விதிப்பு முன்மொழியப்பட்டுள்ளது. மேலும், ரஷ்ய அதிபர் விளாடிமிர் புடின், அந்நாட்டின் நிதி நிறுவனங்கள், உயர் அதிகாரிகள் மற்றும் ஈரானின் எரிசக்தித் துறைக்கு எதிராகக் கடுமையான பொருளாதாரத் தடைகளை நீட்டிக்கவும் இச்சட்டம் வழிவகை செய்கிறது.
அமெரிக்க செனட் சபையில் நடைபெற்ற வாக்கெடுப்பில் 86-11 என்ற பெரும்பான்மை வாக்குகள் வித்தியாசத்தில் இந்த மசோதா நிறைவேற்றப்பட்டுள்ளது. இதனைத் தொடர்ந்து, இந்த மசோதா அடுத்த மாதம் அமெரிக்க பிரதிநிதிகள் சபையின் (House of Representatives) பரிசீலனைக்கும் வாக்கெடுப்பிற்கும் வரவுள்ளது. அங்கு ஒப்புதல் பெறப்பட்ட பிறகு, அதிபரின் கையெழுத்திற்காக அனுப்பப்பட்டு அதிகாரப்பூர்வ சட்டமாக மாறும் என்பது குறிப்பிடத்தக்கது.