விஜயின் 69 ஆவது படமாக உருவாகியுள்ள திரைப்படம் தான் ஜனநாயகன். அரசியல் கலந்த கதைக்களத்தில் உருவாகி வரும் இந்த படத்தை ஹெச். வினோத் இயக்க அனிருத் இதற்கு இசையமைத்திருக்கிறார். 
மிகுந்த எதிர்பார்ப்புகளுடன் தயாராகி வரும் இந்த படம் அடுத்த ஆண்டு பொங்கல் தினத்தை முன்னிட்டு ஜனவரி 9ஆம் தேதி திரைக்கு வரும் என ஏற்கனவே அறிவிக்கப்பட்டுள்ளது. ரசிகர்களும் இந்த படத்தை கொண்டாடி தீர்க்க ஆவலுடன் காத்துக்கொண்டிருக்கின்றனர். இந்நிலையில் ‘ஜனநாயகன்’ படத்துடன் எந்த படம் மோத போகிறது என்று சமூக வலைதளங்களில் பலரும் விவாதித்து வருகின்றனர்.
அதாவது சூர்யா நடிப்பில் மிகுந்த எதிர்பார்ப்புகளுடன் உருவாகி வரும் ‘கருப்பு’ திரைப்படம் இந்த ஆண்டு தீபாவளிக்கு வெளியாகும் என எதிர்பார்க்கப்பட்டது. ஆனால் இதுவரை அந்தப் படத்தின் ரிலீஸ் தேதி குறித்த எந்த ஒரு தகவலையும் படக்குழு வெளியிடவில்லை. அதே சமயம் இந்த படமானது அடுத்த ஆண்டு பொங்கல் தினத்தை முன்னிட்டு வெளிவரும் எனவும் பேச்சு அடிபடுகிறது. 
அடுத்தது சிவகார்த்திகேயனின் ‘பராசக்தி’ திரைப்படமும் அடுத்த ஆண்டு பொங்கல் தினத்தை முன்னிட்டு வெளியாகலாம் என ஏற்கனவே தகவல் கசிந்த நிலையில் தற்போது ‘கருப்பு’ அல்லது ‘பராசக்தி’ ஆகிய இரண்டு படங்களில் ஏதேனும் ஒன்று ‘ஜனநாயகன்’ படத்துடன் மோதும் என சினிமா வட்டாரங்கள் தெரிவிக்கின்றன. மேலும் ‘கருப்பு’ மற்றும் ‘பராசக்தி’ ஆகிய இரண்டு படங்களில் எந்த படம் 2026 பொங்கலுக்கு வெளியாகும் என்பது ஓடிடி ஒப்பந்தத்தை பொறுத்து படக்குழுவினரால் முடிவு செய்யப்படும் எனவும் சொல்லப்படுகிறது. இனிவரும் நாட்களில் மற்ற தகவல்கள் வெளியாகும் என நம்பப்படுகிறது.