தனுஷ் படத்தில் மம்மூட்டி நடிக்க உள்ளதாக தகவல் வெளியாகி இருக்கிறது.
தமிழ் சினிமாவின் தவிர்க்க முடியாத நடிகர்களில் ஒருவராக வலம் வருபவர் நடிகர் தனுஷ். இவர் பாலிவுட், ஹாலிவுட் என எல்லை தாண்டி சாதனை படைத்து வருகிறார். அந்த வகையில் இன்று (நவம்பர் 28) தனுஷ் நடிப்பில் உருவாகி இருக்கும் ‘தேரே இஷ்க் மெய்ன்’ திரைப்படம் வெளியாகி திரையரங்குகளில் வெற்றி நடைபோட்டு வருகிறது. இது தவிர தனுஷ் ஏகப்பட்ட படங்களில் கமிட்டாகி பிஸியாக நடித்து வருகிறார். அந்த வகையில் ‘அமரன்’ படத்தின் மூலம் இந்திய அளவில் பிரபலமான ராஜ்குமார் பெரியசாமி இயக்கத்தில் தனது 55வது திரைப்படத்தில் நடிப்பதற்கு ஒப்பந்தமாகியுள்ளார் தனுஷ். 
இந்த படத்திற்கு தற்காலிகமாக D55 என்று தலைப்பு வைக்கப்பட்டுள்ளது. இதனை ஆரம்பத்தில் மதுரை அன்பு தயாரிப்பதாக அறிவிக்கப்பட்டது. ஆனால் தற்போது கிடைத்த தகவலின்படி படத்தை கமல்ஹாசன் தயாரிக்கிறாராம். அடுத்த வாரம் இதன் படப்பிடிப்பு தொடங்கப்படலாம் என எதிர்பார்க்கப்படுகிறது. இந்நிலையில் இந்த படத்தில் மலையாள நடிகர் மம்மூட்டி முக்கிய கதாபாத்திரத்தில் நடிப்பதற்கு ஒப்பந்தமாகியுள்ளதாகவும், அதற்காக மம்மூட்டிக்கு கிட்டத்தட்ட ரூ.20 கோடி வரை சம்பளம் பேசப்பட்டிருப்பதாகவும் தகவல் கசிந்துள்ளது. 
நடிகை சாய் பல்லவியும் இந்த படத்தில் கதாநாயகியாக நடிக்க உள்ளார் என ஏற்கனவே சொல்லப்பட்டது. இது போன்ற தகவல்கள் ரசிகர்களுக்கு படத்தின் மீதான எதிர்பார்ப்பை மிகப்பெரிய அளவில் அதிகப்படுத்தி வருகிறது. இருப்பினும் இனிவரும் நாட்களில் அதிகாரப்பூர்வ அறிவிப்பு வெளியாகும் என்று நம்பப்படுகிறது.