அதிமுகவில் அதிருப்தியில் உள்ள முக்கிய நிர்வாகிகளை தவெகவுக்கு அழைத்து வருவதுதான் செங்கோட்டையனுக்கு வழங்கப்பட்டிருக்கும் முக்கியமான பணி என்று அரசியல் விமர்சகர் ரவீந்திரன் துரைசாமி தெரிவித்துள்ளார்.
செங்கோட்டையன் தவெகவில் இணைந்தது குறித்து அரசியல் விமர்சகர் ரவீந்திரன் துரைசாமி பிரபல யூடியூப் சேனலுக்கு அளித்த நேர்காணலில் தெரிவித்துள்ளதாது:- அதிமுகவில் இருந்து நீக்கப்பட்ட செங்கோட்டையன், நடிகர் விஜயின் தவெகவில் இணைந்துள்ளார். எடப்பாடி பழனிசாமிக்கு இது சந்தோஷம்தான். ஆனால் விஜயுடன் சேர்ந்து அதிமுகவின் வாக்கு வங்கியில் கை வைப்பார் என்று அவர் எதிர்பார்க்க வில்லை. செங்கோட்டையன் திமுகவுக்கு சென்றால் கோபிச்செட்டிப்பாளையத்துடன் முடிந்து இருக்கும். ஆனால் தவெகவுக்கு சென்றதால், அவரும் இரட்டை இலை வாக்காளர்களை குறிவைப்பார். எடப்பாடி பழனிசாமிக்கு வருத்தத்தை கொடுக்க வேண்டும் என்பதால் தான், செங்கோட்டையன் தவெகவுக்கு சென்றுள்ளார். விஜய்க்கு மற்றொரு வருத்தம் காங்கிரஸ் அவர்களை அடித்துவிட்டார்கள்.
சீமான், விஜயுடன் கூட்டணிக்கு வருவார்கள் என்று ஜான் ஆரோக்கியசாமி சொன்னார். ஆனால், பலம் நிரூபிக்காத விஜயுடன் கூட்டணிக்கு செல்ல முடியாது. வேண்டுமெனில் அவர் தன்னிடம் கூட்டணிக்கு வரலாம் என்று சொன்னார். விஜய்க்கு என்ன வாக்கு வங்கி உள்ளது? என்ன வாக்குகளை திருப்புகிற பண்பு உள்ளது? என்று ராகுல்காந்தி, தவெக ஏற்பாடு செய்த ஜோதிமணி, மாணிக்கம் தாகூர் ஆகியோரை பொருட்படுத்தவில்லை. காங்கிரஸ் அவமதிப்பு செய்துவிட்டதால் 25 நாளாக காத்திருந்த செங்கோட்டையனை கையில் எடுத்து, அதை திசை திருப்புகிற வேலையை விஜய், ஜான் ஆரோக்கியசாமி ஆகியோர் செய்கின்றனர்.
அதிமுகவில் அதிருப்தியில் உள்ள முன்னாள் அமைச்சர்கள், மாவட்ட செயலாளர்களை தவெகவுக்கு அழைத்து வருவது தான் செங்கோட்டையனுக்கு வழங்கப்பட்டிருக்கும் நோக்கம். அதை எந்த அளவுக்கு வெற்றிகரமாக செய்யப் போகிறார் என்று பொருத்திருந்து பார்க்க வேண்டும். செங்கோட்டையனுக்கு தொடர்புகள் உள்ளன. அவரால் செய்ய முடியும். கமல்ஹாசனுக்கு இருப்பது போல விஜய்க்கு 234 தொகுதிகளிலும் நிறுத்துவதற்கு வேட்பாளர்கள் கிடையாது. எடப்பாடி பழனிசாமியை பொருத்தவரை கட்சியை கைப்பற்ற வேண்டும் என்று நினைக்கிறார். அவர் தன்னுடைய இரண்டாவது இடத்தை தக்க வைக்க வேண்டும் என்பதற்காக தான் பாஜக கூட்டணிக்கு வந்தார்.
அதிமுக – பாஜக சேர்ந்து 30 சதவீதம் வாக்குகளுக்கு மேலாக வரும். மற்றொரு விஷயம், தேர்தலில் தோற்றால் நமக்கு போட்டியாக யாரும் வரக்கூடாது என்பதாகும். அதனால் தனக்கு போட்டியாக உள்ள செங்கோட்டையனை தூக்கி வெளியே போடுகிறார். செங்கோட்டையன், தவெகவுக்கு சென்றதால் அதிமுக வாக்கு வங்கியில் பாதிப்பு ஏற்படலாம். ஆனால் அவருடைய பொதுச்செயலாளர் பதவிக்கு எந்த பாதிப்பும் கிடையாது என்கிற சந்தோஷமும் உள்ளது.
பாஜக சொல்லியே செங்கோட்டையன் தவெகவில் இணைந்ததாக குற்றச்சாட்டு எழுந்தது. பவன் கல்யாண் 2016ல் ஆந்திர பிரிவினைக்கு எதிராக காங்கிரசை எதிர்த்து, தெலுங்கு தேசம் – மோடிக்கு ஆதரவாக பிரச்சாரம் செய்தார். 2019ல் அவர் பலம் நிரூபித்தார். அதன் பிறகு சந்திரபாபு நாயுடு – பாஜகவுக்கு ஆதரவாக கூட்டணிக்குள் வந்தார். அதேபோல், 2026 சட்டமன்றத் தேர்தலில் விஜய் பலத்தை நிரூபித்துவிட்டு வந்தால் மகிழ்ச்சி அடைவேன். காங்கிரஸ் தங்களை புறக்கணித்ததை அவமானமாக கருதி, விஜய் நல்ல வாக்குகளை பெற்றார் என்றால்? 2029ல் விஜய் வாக்குகள் மோடிக்கு ஆதரவாக மாறும். அந்த வகையில் செங்கோட்டையன், விஜயின் வாக்கு சதவீதத்தை நிரூபணம் செய்வது பிரதமர் மோடிக்கு நல்லது.
எதிர்வரும் சட்டமன்றத் தேர்தலில் திமுக கூட்டணி தலைமையிலான அணி 45 சதவீதம் வாக்குகளை எடுப்பார்கள். விஜயால், அதிமுக வாக்குகளை எடுக்க முடியுமே தவிர, திமுக வாக்குகளை பெற முடியாது. ஆனால் 1967ல் காமராஜரை நேருக்கு நேர் தோற்கடித்தது போன்று ஸ்டாலினை தோற்கடிக்கலாம். அதுதான் எதார்த்த நிலையாகும். சீமான், ஒடுக்கப்பட்ட மக்கள், கீழ் நிலையில் உள்ள மக்களுக்கு ஆதரவாக நின்று 17 சதவீதம் வாக்குகளை வாங்குவார். அதேவேளையில் விஜய், எம்ஜிஆரை ஆதரித்து அரசியல் செய்வது சீமானுக்கு சாதமாக மாறுகிறது. கமல்ஹாசன் சீமான் ஒப்பீடு, சீமானை உயர்த்தியது போல, விஜய் – சீமான் ஒப்பீடு, சீமானுக்கு ஆதரவாக மாறும். ஸ்டாலின் அரசுக்கு எதிர்ப்பு பெரிய அளவில் இல்லை என்று தினகரனே சொல்லிவிட்டார். அதேநேரம் எதிர்பாராத அணி அமையும் என்றும் அவர் குறிப்பிட்டிருக்கிறார், இவ்வாறு அவர் தெரிவித்துள்ளார்.