வங்கக்கடலில் உருவான ‘டிட்வா’ புயல் காரணமாக, தமிழகத்தின் சில மாவட்டங்களுக்கு வானிலை ஆய்வு மையம் சிவப்பு எச்சரிக்கையை நீட்டித்துள்ளது. 
வங்கக்கடலில் உருவாகி வலுப்பெற்றுள்ள ‘டிட்வா’ புயல் வடக்கு – வடமேற்கு திசையில் முன்னேறிக் கொண்டிருக்கிறது. தற்போது இந்த புயல் சென்னைக்கு 400 கிலோமீட்டர் தூரத்தில் தெற்கு திசையிலும், புதுச்சேரிக்கு 300 கிலோமீட்டர் தெற்கு தென்கிழக்கிலும், காரைக்காலுக்கு 190 கிலோமீட்டர் தெற்கு தென்கிழக்கிலும் புயல் மையம் கொண்டுள்ளது.
இதேபோல் இலங்கையின் ஜாஃப்னாவிற்கு 80 கிமீ கிழக்கு தென்கிழக்கிலும், திரிகோணமலைக்கு 110 கிமீ வடக்கு வடமேற்கிலும் புயல் மையம் நிலவி வருகிறது. தென்மேற்கு வங்க கடல் மற்றும் அதனை ஒட்டிய வடக்கு கடலோரப் பகுதிகளை ஒட்டியவாறு புயல் சுழற்சி உருவாகியுள்ளது.
கடந்த 6 மணி நேரத்தில் டிட்வா புயல் மணிக்கு 8 கிமீ வேகத்தில் வடக்கு – வடமேற்கு திசையில் நகர்ந்து வருகிறது. முன்னதாக மணிக்கு 7 கிமீ வேகத்தில் நகர்ந்த டிட்வா புயலின் நகரும் வேகம் சற்று அதிகரித்துள்ளதாக வானிலை ஆய்வு மையம் தெரிவித்துள்ளது. புயல் மேலும் வடக்கு – வடமேற்கு திசையில் நகர்ந்து நவம்பர் 30ஆம் தேதி அதிகாலையில் வடதமிழகம் – புதுச்சேரி மற்றும் தெற்கு ஆந்திரா கடலோரப் பகுதிகளுக்கு அருகில் நிலைத்து வலுவாகக்கூடும் என முன்னறிவிப்பு வெளியிடப்பட்டுள்ளது.
டிக்வா புயலின் விளைவாக தமிழ்நாட்டில் இன்று மற்றும் நாளை ஆகிய 2 நாட்கள் அதி கனமழைக்கு வாய்ப்பு இருப்தால் ரெட் அலர்டை வானிலை ஆய்வு மையம் நீட்டித்துள்ளது.
தமிழ்நாட்டில் டிக்வா புயலின் எதிரொலியாக சென்னை, கடலூர், நாகப்பட்டினம், எண்ணூர், காட்டுப்பள்ளி, புதுச்சேரி, காரைக்கால், பாம்பன், தூத்துக்குடி ஆகிய 9 முக்கிய துறைமுகங்களில் 4ஆம் எண் புயல் எச்சரிக்கை கூண்டு நீடிக்கப்பட்டுள்ளது.
அதே போன்று, ஆந்திரா, ஒடிசா, மேற்குவங்க துறைமுகங்களில் 2ஆம் எண் புயல் எச்சரிக்கை கூண்டு ஏற்றப்பட்டுள்ளது. வங்கக்கடலில் புயல் வலுவாக உள்ளதால் மீனவர்கள் ஆழ்கடலுக்கு செல்ல வேண்டாம் என அதிகாரிகள் மீண்டும் மீண்டும் எச்சரித்து வருகின்றனர்.
13 நாட்களாக தொடரும் உண்ணாவிரத போராட்டம்…. தூய்மை பணியாளர் மருத்துவமனையில் அனுமதி….