சென்னை மாநகராட்சியில் தூய்மை பணியை மீண்டும் வழங்க கோரி 13 வது நாளாக உண்ணாவிரத போராட்டத்தில் தூய்மை பணியாளர் உடல் மிகவும் மோசமானதால் மருத்துவமனையில் அனுமதிக்கப்பட்டுள்ளார்.
சென்னை புறநகர் பகுதியான அம்பத்தூரில் உள்ள கம்யூனிஸ்ட் கட்சியின் அலுவலகத்தில் உழைப்போர் உரிமை இயக்கத்தின் தூய்மை பணியாளர்கள் நான்கு பேர் தொடர் உண்ணாநிலை போராட்டத்தில் ஈடுபட்டு வந்த நிலையில், ஜெனோவா என்ற தூய்மை பணியாளருக்கு மிகவும் உடல் நிலை சோர்வு ஏற்பட்டதால், மருத்துவர்கள் அவசரமாக மருத்துவமனையில் அனுமதித்து சிகிச்சை அளிக்க கூறியதன் காரணமாக அவர் மருத்துவமனைக்கு அழைத்துச் செல்லப்பட்டுள்ளார். சென்னை மாநகராட்சியில் ஒப்பந்த தூய்மை பணியாளர்களாக பணியாற்றிய 2000 தூய்மை பணியாளர்களை ஜூலை மாதம் 31 ஆம் தேதி பணிநீக்கம் செய்தது. அதன் பிறகு தனியார் ராம்கி நிறுவனத்திடம் சேருமாறு கூறிவிட்டது. ஆனால் தூய்மை பணியாளர்கள் மீண்டும் தங்களுக்கு சென்னை மாநகராட்சியில் ஒப்பந்த பணி வழங்கப்பட வேண்டும் திமுகவின் தேர்தல் வாக்குறுதியான பணி நிரந்தரத்தை செய்ய வேண்டும் என 120 நாட்களுக்கு மேலாக போராடி வருகின்றனர்.
இந்நிலையில் தொடர் உண்ணா நிலை போராட்டத்தில் ஈடுபட்டுள்ள நான்கு தூய்மை பணியாளர்கள் இன்று 13 வது நாளாக கடும் உடல் சோர்வுற்று, படுத்த படுக்கையாக உண்ணாவிரத போராட்டத்தில் ஈடுபட்டிருந்த நிலையில், ஜெனோவா என்ற பெண் தூய்மை பணியாளர் 13 நாட்களாக உணவு உட்கொள்ளாமல் சென்னை மாநகராட்சியில் தூய்மை பணி கேட்டு போராட்டத்தில் ஈடுபட்டதால் மிகவும் உடல் சோர்வுற்று எழுந்து நிற்க கூட முடியாத சூழலுக்கு உள்ளானதால், அவரை தனியார் மருத்துவர்கள் பரிசோதனை செய்து பார்த்ததில் அவர் உடல்நிலை மிகவும் மோசமடைந்து இருப்பதால் உடனடியாக அவரை மருத்துவமனையில் அனுமதிக்குமாறு கூறியுள்ளனர். இதனால் உழைப்போர் உரிமை இயக்கத்தின் மற்ற தூய்மை பணியாளர்கள் 108 ஆம்புலன்சை அழைத்து கீழ்பாக்கம் மருத்துவ கல்லூரி மருத்துவமனைக்கு சிகிச்சைக்காக அனுப்பி வைத்துள்ளனர். அப்போது சென்னை மாநகராட்சி தூய்மை பணியாளர்களின் உயிரை பறிக்க முயற்சிக்கிறது என்று கோஷமும் எழுப்பப்பட்டது.
13-வது நாளாக உண்ணாவிரத போராட்டத்தில் ஈடுபட்டு வரும் தூய்மை பணியாளர்களை அமைச்சர்களோ, மாநகராட்சியின் மேயர் பிரியா மற்றும் மாநகராட்சியின் ஆணையர் குமரகுருபரன் உள்ளிட்டோர் யாரும் சந்தித்து பேசவில்லை ஏதோ அவர்கள் வெளிநாட்டில் உண்ணாவிரதம் போராட்டத்தில் ஈடுபட்டு வருவது போல் கண்டும் காணாமல் விட்டு வைத்துள்ளதாக கூறியுள்ளனர். இதனால் தூய்மை பணியாளர்கள் கடும் கோபம் அடைந்துள்ள நிலையில் உண்ணாவிரத போராட்டம் தொடர்ந்து நடத்துவோம் என மற்ற தூய்மை பணியாளர்கள் கூறியுள்ளனர். ஆட்சிக்கு வருவதற்கு முன்பு திமுக ஆட்சிக்கு வந்தால் கட்டாயம் தூய்மை பணியாளர்களுக்கு பணி நிரந்தரம் செய்வோம் என வாக்குறுதி கொடுத்தது. ஆனால் ஆட்சிக்கு வந்த பிறகு பணியே கிடையாது என விரட்டி அடித்து தனியாருக்கு தூய்மை பணியை தரை பார்த்து உள்ளது இது மிகவும் மோசமான மனநிலை என்றும் சென்னை மாநகராட்சியில் மீண்டும் தூய்மை பணியை வழங்க வேண்டும் என்றும் தூய்மை பணியாளர்கள் கோரிக்கை விடுத்துள்ளனர்.