பள்ளி, கல்லூரிகளில் த.வெ.க.வினர் நடத்தை கண்டிக்கத்தக்கது: பிரேமலதா விஜயகாந்த்

பள்ளி, கல்லூரிகளில் த.வெ.க-வினர் நடந்துகொள்ளும் விதம் கண்டிக்கத்தக்கது” – டெல்லி பிரதிநிதி நியமனம், கடன் சுமை குறித்து பிரேமலதா விஜயகாந்த் சாடல்!

தமிழகத்தில் புதிதாகப் பொறுப்பேற்றுள்ள த.வெ.க அரசின் செயல்பாடுகள், அமைச்சர்களின் சர்ச்சைக்குரிய போக்குகள் மற்றும் டெல்லி பிரதிநிதி நியமனம் குறித்துத் தேமுதிக பொதுச்செயலாளரும், விருத்தாசலம் சட்டமன்ற உறுப்பினருமான பிரேமலதா விஜயகாந்த் கடுமையான கண்டனங்களையும் விமர்சனங்களையும் முன்வைத்துள்ளார். கடலூர் மாவட்டம் விருத்தாசலம் தொகுதியில் போலியோ சொட்டு மருந்து வழங்கும் முகாம் உள்ளிட்ட பல்வேறு நிகழ்ச்சிகளில் கலந்துகொண்ட பின்னர், பிரேமலதா விஜயகாந்த் செய்தியாளர்களைச் சந்தித்துப் பேட்டி அளித்தார். பள்ளி,

கல்லூரிகளில் த.வெ.க-வினர் அநாகரிக போக்கு:
செய்தியாளர்கள் சந்திப்பில் பிரேமலதா விஜயகாந்த் பேசியதாவது:
“முதலமைச்சரின் பிறந்தநாள் விழாவை முன்னிட்டு ஆளுங்கட்சி சட்டமன்ற உறுப்பினர்கள், அமைச்சர்கள் மற்றும் நிர்வாகிகள் பள்ளி, கல்லூரிகளில் நடந்துகொண்ட விதம் எவ்விதத்திலும் ஏற்புடையதல்ல. இன்றைய மாணவ சமுதாயம் ஏற்கனவே சமூக வலைதளங்களின் தாக்கத்தால் மூளைச்சலவை செய்யப்பட்டுள்ள நிலையில், பள்ளிகளில் சினிமா பாடல்களைப் பாட வைப்பதும், நடனமாட வைப்பதும் மாணவர்களின் கல்வியை முழுமையாகப் பாதிக்கும். மக்கள் உங்களை மக்கள் பிரதிநிதிகளாக அங்கீகரித்துள்ளனர்; எனவே பொறுப்புணர்ந்து செயல்பட வேண்டும் என்ற எண்ணம் இந்த அரசுக்கும், முதலமைச்சருக்கும் இருக்க வேண்டும்.
​அதேபோல், அமைச்சர் சரத்குமார் சாதாரண மனிதராக இருந்தபோது ஐபிஎல் கிரிக்கெட் மைதானத்தில் (பொதுவெளியில்) நடந்துகொண்ட விதம் தொடர்பான வைரல் வீடியோ வன்மையாகக் கண்டிக்கத்தக்கது. மக்கள் கூடும் ஒரு பெரிய இடத்தில் இப்படி நடந்துகொள்வது முறையல்ல.

​டெல்லி பிரதிநிதி நியமனத்திற்குக் கண்டனம்:
தமிழக அரசின் டெல்லி பிரதிநிதியாக வெங்கடநாராயணன் என்பவர் நியமிக்கப்பட்டிருப்பது கண்டனத்திற்குரியது. தமிழகத்தில் எத்தனையோ துறை சார்ந்த வல்லுநர்களும், அறிஞர்களும் இருக்கும்போது, அவர்களைப் பயன்படுத்தாமல் இவரை நியமித்திருப்பது ஏன்?
​6 மாத கால அவகாசம் ஏற்புடையதல்ல:
புதிதாகப் பொறுப்பேற்றுள்ள இந்த அரசு ஊழலற்ற, நேர்மையான, வெளிப்படையான அரசு என்று அவர்களாகவே சொல்லிக்கொள்கிறார்கள். மக்கள் நலத்திட்டங்கள் மற்றும் துறை சார்ந்த கோரிக்கைகளை முன்வைத்தால், ‘தமிழக அரசுக்கு 10 லட்சம் கோடி கடன் உள்ளது, நாங்கள் புதியவர்கள், துறைகளைப் புரிந்துகொள்ள 6 மாத கால அவகாசம் தேவை’ எனக் தப்பscreen செய்யப் பார்க்கிறார்கள். 6 மாத காலம் அவகாசம் கேட்கும் இந்த அரசு, அதுவரை தமிழகம் தாங்குமா? என்பதைச் சிந்திக்க வேண்டும். மக்கள் பிரச்சினைகளில் முதலமைச்சர் உடனடியாகச் சிறப்பு கவனம் செலுத்திச் செயல்பட வேண்டும். புதிய ஆட்சி வரும்போது முன்னாள் அமைச்சர்கள் சார்ந்த இடங்களில் ‘ரெய்டு’ (சோதனை) நடப்பது வாடிக்கையான ஒன்றுதான்.
​

விவசாயிகள் மற்றும் டாஸ்மாக் கோரிக்கைகள்:
விவசாயிகளின் பயிர்க்கடன்களை அரசு முழுமையாகத் தள்ளுபடி செய்ய வேண்டும். மேகதாது அணை கட்டும் கர்நாடகாவின் முயற்சியை உறுதியான நடவடிக்கைகள் மூலம் தடுத்து நிறுத்த வேண்டும். எல் நினோ பருவநிலை மாற்றத்தால் ஏற்படக்கூடிய வறட்சியை எதிர்கொள்ளும் வகையில், அரசு மழைநீர் சேமிப்பு உள்ளிட்ட முன்னெச்சரிக்கை நடவடிக்கைகளில் ஈடுபட்டு விவசாயிகளைக் காக்க வேண்டும்.
​மேலும், தமிழகத்தில் 717 டாஸ்மாக் கடைகள் மூடப்படும் என அறிவித்த இந்த அரசு, அந்த வாக்குறுதியை முழுமையாக நிறைவேற்றிவிட்டதா? என்பது குறித்து வெள்ளை அறிக்கை வெளியிட வேண்டும். பல கடைகள் இன்னும் மூடப்படவில்லை என்ற குற்றச்சாட்டு மக்கள் மத்தியில் பரவலாக எழுந்துள்ளது” என்று அவர் கூறினார்.