ஆடம்பரமாக வாழ்வதற்கும், கூடுதல் பணத் தேவைக்காகவும் புதுச்சேரி மற்றும் தமிழகப் பகுதிகளில் தொடர்ந்து மோட்டார் சைக்கிள் திருட்டில் ஈடுபட்டு வந்த விழுப்புரம் மாவட்டத்தைச் சேர்ந்த 3 வாலிபர்களைப் புதுச்சேரி போலீசார் கைது செய்துள்ளனர். அவர்களிடம் இருந்து 8 திருட்டு மோட்டார் சைக்கிள்கள் பறிமுதல் செய்யப்பட்டுள்ளன.
போலீசார் வாகன சோதனை:
புதுச்சேரி சேதராப்பட்டு போலீஸ் சப்-இன்ஸ்பெக்டர் அலாவுதீன் தலைமையிலான போலீசார் இன்று துத்திப்பட்டு எல்லைப் பகுதியில் தீவிர வாகன சோதனையில் ஈடுபட்டிருந்தனர். அப்போது, சேதராப்பட்டு – தொண்டமாநத்தம் சாலையில், தொண்டமாநத்தத்தில் இருந்து துத்திப்பட்டு நோக்கி ஒரே மோட்டார் சைக்கிளில் 3 பேர் வந்தனர். அவர்களைப் போலீசார் நிறுத்த முயன்றபோது, அவர்கள் வாகனத்தை நிறுத்தாமல் அதிவேகமாக ஓட்டி தப்பியோட முயன்றனர்.
மடக்கிப் பிடித்த போலீசார்:
சந்தேகமடைந்த போலீசார் அவர்களைத் துரத்திச் சென்று மடக்கிப் பிடித்தனர். அவர்கள் ஓட்டி வந்த மோட்டார் சைக்கிள் குறித்து விசாரித்தபோது, அது சேதராப்பட்டு – தொண்டமாநத்தம் முதன்மைச் சாலையில் உள்ள ஒரு மதுபானக் கடை முன்பிருந்து திருடப்பட்டது என்பது தெரியவந்தது. இதனைத் தொடர்ந்து 3 பேரையும் போலீசார் கைது செய்து காவல் நிலையம் அழைத்துச் சென்று தீவிர விசாரணை நடத்தினர்.
விசாரணையில் அதிர்ச்சித் தகவல்:
விசாரணையில் அவர்கள், விழுப்புரம் மாவட்டம் கூட்டேரிப்பட்டு பகுதியைச் சேர்ந்த ஆனந்தபாபு என்ற பாபு (39), பாலமுருகன் (40) மற்றும் திண்டிவனத்தைச் சேர்ந்த வெங்கடேசன் (23) என்பது தெரியவந்தது. தங்களுக்குக் கூடுதல் பணம் தேவைப்பட்டதாலும், ஆடம்பரமாக வாழ ஆசைப்பட்டதாலும் இந்த இருசக்கர வாகனத் திருட்டில் ஈடுபட்டதாக அவர்கள் போலீசாரிடம் வாக்குமூலம் அளித்துள்ளனர்.
புதுச்சேரியின் சேதராப்பட்டு மற்றும் தமிழகப் பகுதியான விழுப்புரம் மாவட்டத்தின் திண்டிவனம், மைலம், ஆரோவில் உள்ளிட்ட பல்வேறு இடங்களில் இவர்கள் தங்களது கைவரிசையைக் காட்டியிருப்பது அம்பலமாகியுள்ளது. கைதானவர்களிடம் இருந்து திருடப்பட்ட 8 மோட்டார் சைக்கிள்களைப் போலீசார் பறிமுதல் செய்தனர். பின்னர் 3 பேரையும் நீதிமன்ற நடுவர் முன் ஆஜர்படுத்திய போலீசார், அவர்களை நீதிமன்றக் காவலில் சிறையில் அடைத்தனர்.