பார்த்திபன் நெகிழ்ச்சிப் பதிவு: நிரந்தர கௌரவத் தலைவராக கே.பாக்யராஜ் நியமனம்

தென்னிந்திய திரைப்பட எழுத்தாளர்கள் சங்கத்தின் ‘நிரந்தர கௌரவத் தலைவராக’ தமிழ் சினிமாவின் திரைக்கதை மன்னன் கே.பாக்யராஜ் ஏகமனதாக நியமிக்கப்பட்டுள்ளார். மேலும், சங்கத்தின் சார்பில் கட்டப்படும் புதிய கட்டிடத்திற்கும் அவரது பெயர் சூட்டப்படும் என பிரபல இயக்குநரும் நடிகருமான பார்த்திபன் தனது முகநூல் (Facebook) பக்கத்தில் அதிகாரப்பூர்வமாக அறிவித்துள்ளார். அவரது சமூக ஊடகப் பதிவின் விரிவான விபரம் வருமாறு:

​வதந்திகளுக்கு முற்றுப்புள்ளி:
“சமீபத்தில் நான் அளித்த பேட்டிகளில், எனது குரு பாக்யராஜ் சார் குறித்து மனிதாபிமானமற்ற முறையில் ஒருவர் பேசியது ஏற்படுத்திய வருத்தம் பற்றி, அவரது பெயரைக் குறிப்பிடாமல் பேசியிருந்தேன். ஆனால், சிலர் அந்த நபர் இவராகத்தான் இருக்கும் எனத் தவறாக ஊகித்து, நான் பெரிதும் மதிக்கும் இயக்குநர்களான திரு. பாண்டியராஜன் மற்றும் திரு. ஆர்.சுந்தரராஜன் ஆகியோர் மீது கோபமான கருத்துகளைப் பதிவிட்டு வருவதை அறிந்து வருத்தமடைந்தேன். அந்த நாகரீகமற்ற நபரின் பெயர் யாருக்கும் தெரியாமலே போகட்டும்; அவர் கக்கிய விஷமும் என் நினைவிலிருந்து அழியட்டும்” என்று பார்த்திபன் வதந்திகளுக்கு முற்றுப்புள்ளி வைத்துள்ளார்.

​சங்கத்தில் வரலாற்றுத் தீர்மானம்:
தொடர்ந்து ஒரு நற்செய்தியைப் பகிர்ந்துகொண்ட பார்த்திபன், “நல்லதை மட்டும் நினைவில் கொள்ளும் வகையில் இன்று ஒரு மகிழ்ச்சியான நிகழ்வு நடந்துள்ளது. தென்னிந்தியத் திரைப்பட எழுத்தாளர்கள் சங்கத்தில் ஒரு வரலாற்றுத் தீர்மானத்தைக் கொண்டு வந்தேன். ‘தென்னிந்திய திரைப்பட எழுத்தாளர் சங்கத்தின் நிரந்தர கௌரவத் தலைவராகத் திரு. கே. பாக்யராஜ் அவர்கள் நியமிக்கப்பட வேண்டும்’ என்ற எனது விருப்பத்தை விண்ணப்பமாக எழுதி, பெரிய அறிவிப்புப் பலகையில் இடம்பெறச் செய்து எடுத்துச் சென்றேன். சங்கம் அதனை ஏகமனதாக ஒப்புக்கொண்டது. இனி ஆண்டாண்டு காலமானாலும் இந்த கௌரவம் அப்படியே நிலைத்திருக்கும்” என்று குறிப்பிட்டுள்ளார்.
​

புதிய கட்டிடத்திற்குப் பாக்யராஜ் பெயர்:
மேலும், திரைப்பட எழுத்தாளர்கள் சங்கத்திற்காகப் புதிதாக எழுப்பப்பட்டு வரும் கட்டிடத்திற்குத் தனது குருவான கே.பாக்யராஜின் பெயரே சூட்டப்பட உள்ளது என்ற மற்றொரு மகிழ்ச்சியான செய்தியையும் அவர் பகிர்ந்துள்ளார்.
​இந்த வரலாற்றுச் சிறப்புமிக்க முடிவுகளுக்காக, தமிழ் மொழியின் 247 எழுத்துக்களைக் கோர்த்து ஒரு மாலையாக்கி, சங்கத்தின் உறுப்பினர்கள் அனைவருக்கும் தனது நெஞ்சார்ந்த நன்றியையும் மகிழ்ச்சியையும் பார்த்திபன் காணிக்கையாக்கியுள்ளார்.