இயக்குநர் சுசீந்திரன் இயக்கத்தில், சாந்தனு பாக்யராஜ் மற்றும் சீமான் இணைப்பில் உருவாகும் ‘ஒரு கைதியின் டைரி’ திரைப்படத்தின் மோஷன் போஸ்டரை சூப்பர் ஸ்டார் ரஜினிகாந்த் அதிகாரப்பூர்வமாக வெளியிட்டுப் படக்குழுவினருக்குத் தனது வாழ்த்துகளைத் தெரிவித்துள்ளார்.
சூப்பர் ஸ்டார் வாழ்த்துடன் வெளியான மோஷன் போஸ்டர்
KRG கண்ணன் ரவி குரூப் (KRG Kannan Ravi Group) சார்பில் கண்ணன் ரவி மற்றும் தீபக் ரவி இணைந்து தயாரிக்கும் 10-வது திரைப்படமான ‘ஒரு கைதியின் டைரி’ படத்தின் மோஷன் போஸ்டர், சூப்பர் ஸ்டார் ரஜினிகாந்த் முன்னிலையில் வெளியானது. மதுரை கோயில் கோபுரங்கள், கையெழுத்துப் பிரதி வடிவமைப்பு மற்றும் சாந்தனு – சீமான் ஆகியோரின் கூர்மையான தோற்றங்களுடன் வெளியாகியுள்ள இந்த மோஷன் போஸ்டர் ரசிகர்கள் மத்தியில் பெரும் வரவேற்பைப் பெற்றுள்ளது.
அப்பா – மகன் உறவும் விறுவிறுப்பான ஆக்ஷனும்
நான் மகான் அல்ல’, ‘பாண்டியநாடு’ போன்ற வெற்றிப் படங்களைத் தொடர்ந்து, இயக்குநர் சுசீந்திரன் மீண்டும் அப்பா – மகன் இடையேயான உணர்வுப் பூர்வமான பிணைப்பை மையமாகக் கொண்டு இக்கதையை உருவாக்கியுள்ளார். மதுரையின் வாழ்வியலையும், குடும்ப உறவுகளின் உணர்வுகளையும் ஆக்ஷன் மற்றும் கிரைம் பின்னணியில் விறுவிறுப்பாகக் காட்சிப்படுத்தப் படக்குழு திட்டமிட்டுள்ளது.
முன்னணி நட்சத்திரங்கள் மற்றும் தொழில் நுட்பக் கூட்டணி
இப்படத்தில் சாந்தனு பாக்யராஜ் கதாநாயகனாக நடிக்க, முக்கியக் கதாபாத்திரத்தில் சீமான் நடிக்கிறார். சாம் சி.எஸ் இசையமைக்கும் இப்படத்தின் படப்பிடிப்பை ஒரே கட்டமாக (Single Schedule) நடத்தி முடிக்க படக்குழு தீவிரமாக ஆயத்தமாகி வருகிறது.
KRG கண்ணன் ரவி குரூப்பின் 10-வது மைல்கல்
தரமான வணிகப் படங்களை வழங்கி வரும் தயாரிப்பாளர் கண்ணன் ரவி, சமீபத்தில் வெளியான “தலைவர் தம்பி தலைமையில்” மற்றும் “TN 2026” போன்ற படங்களின் வெற்றியைத் தொடர்ந்து, தனது 10-வது படைப்பாக இப்படத்தைப் பிரம்மாண்ட தயாரிப்பில் உருவாக்கி வருகிறார். சூப்பர் ஸ்டாரின் வெளியீட்டால் ‘ஒரு கைதியின் டைரி’ படத்தின் மீதான எதிர்பார்ப்பு திரையுலகில் மேலும் அதிகரித்துள்ளது.