காவிரி டெல்டா மாவட்டங்கள் வரலாறு காணாத குடிநீர் தட்டுப்பாட்டிலும், விவசாயப் பேரழிவிலும் சிக்கித் தவிக்கும் நிலையில், கர்நாடக முதலமைச்சருடன் பேச்சுவார்த்தை நடத்துவோம் என்ற முதலமைச்சர் விஜய்யின் அணுகுமுறை தமிழ்நாட்டிற்கு இழைக்கப்படும் மிகப்பெரிய வரலாற்றுத் துரோகம் என்று அனைத்து விவசாயிகள் சங்கங்களின் தலைவர் பி.ஆர்.பாண்டியன் அவர்கள் குற்றம்சாட்டியுள்ளார்.
முடங்கிய டெல்டா… நிர்கதியான விவசாயிகள்!
காவிரி டெல்டாவைப் பொறுத்தவரை கடந்த ஆண்டைக் காட்டிலும் இந்த ஆண்டு குறுவை சாகுபடி பரப்பு படுமோசமாகக் குறைந்துள்ளது. பல பகுதிகளில் நிலத்தடி நீர் முழுமையாக வற்றியதோடு, கடல்நீர் உட்புகுந்ததால் போர்வெல் தண்ணீரும் உப்பாக மாறி விவசாயத்தை நாசமாக்கியுள்ளது. திருவாரூர், நாகப்பட்டினம், தஞ்சாவூர் மற்றும் மயிலாடுதுறை மாவட்டங்களின் பல கிராமங்களில் பொதுமக்கள் சொட்டுத் தண்ணீருக்காகச் சாலை மறியலில் ஈடுபடும் அவல நிலை ஏற்பட்டுள்ளது. கிராமப்புறங்களில் பணப்புழக்கம் முற்றிலுமாக முடங்கி, விவசாயத் தொழிலாளர்கள் அன்றாடக் கஞ்சிக்கும் வழியின்றித் தவித்து வருகின்றனர்.
பேச்சுவார்த்தை என்ற பெயரில் தமிழ்நாட்டின் பலம் குலைப்பு!
உச்சநீதிமன்றத்தின் நேரடிக் கட்டுப்பாட்டின் கீழ் இயங்கும் ‘காவிரி மேலாண்மை ஆணையம்’ சட்டப்பூர்வமான அதிகாரங்களுடன் இருக்கும்போது, கர்நாடக முதலமைச்சருடன் நேரடியாகப் பேச்சுவார்த்தை நடத்தப் போவதாக முதலமைச்சர் விஜய் எடுத்த நடவடிக்கைகள் தமிழகத்திற்குப் பெரும் பின்னடைவை ஏற்படுத்தியுள்ளன. இது அரசியலமைப்புச் சட்டத்திற்கு முரணானது மட்டுமல்லாமல், உச்சநீதிமன்றத்தில் நாம் சட்டரீதியாகப் போராடிப் பெற்றுள்ள தார்மீக பலத்தையும் முற்றிலுமாக நீர்த்துப்போச் செய்துவிடும் என்று பி.ஆர்.பாண்டியன் எச்சரித்துள்ளார்.
வாக்குவங்கிக்காக நடக்கும் அரசியல் நாடகம்!
மேகதாது அணை விவகாரத்தில் கர்நாடக விவசாயிகளே அதனை எதிர்த்து வரும் நிலையில், அங்குள்ள அரசியல்வாதிகள் தங்களது சுயநலத்துக்காகவும், வரவிருக்கும் தேர்தல் வாக்குவங்கிக்காகவும் மட்டுமே இதனை இனப்பிரச்சினையாகத் திசை திருப்புகிறார்கள். பெங்களூரு குடிநீர் தேவை என்ற பெயரில் அணைக் கட்டத் துடிக்கும் கர்நாடகத்தின் சதித் திட்டத்திற்கு, தமிழக அரசின் மெத்தனப்போக்கு துணைபோய்விடக் கூடாது என்பதே டெல்டா விவசாயிகளின் ஏக்கமாக உள்ளது.
சட்டப் போராட்டம் ஒன்றே நிரந்தரத் தீர்வு!
காவிரி நடுவர் மன்ற இறுதித் தீர்ப்பு மற்றும் உச்சநீதிமன்ற உத்தரவின்படி, காவிரி மேலாண்மை ஆணையத்தின் அனுமதியின்றி மேகதாதுவில் ஒரு செங்கல்லைக் கூட அவர்களால் எடுக்க முடியாது. எனவே, பயனற்ற அரசியல் பேச்சுவார்த்தைகளைத் தூக்கியெறிந்துவிட்டு, ஆணையத்தின் மூலமாக ஜூன், ஜூலை மாதங்களுக்குரிய நிலுவைத் தண்ணீரான 40 டிஎம்சி நீரை உடனடியாகப் பெற தமிழக அரசு சட்டப்பூர்வமாக வலுவான அழுத்தம் கொடுக்க வேண்டும் என விவசாயிகள் சங்கம் அடித்துக் கோரியுள்ளது.
மக்களின் நம்பிக்கையைக் குலைக்கும் தவெக அரசின் பட்ஜெட் – பத்திரிகையாளர் கோடீஸ்வரன் விமர்சனம்!