தமிழ்நாடு அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் “தாய்மாமன் தங்க மோதிரம்” திட்டம், மதுரை மாவட்டம் உசிலம்பட்டியில் வரும் செப்டம்பர் 28-ம் தேதி தொடங்கி வைக்கப்பட உள்ளது. முதலமைச்சர் விஜய் இந்தத் திட்டத்தை தொடங்கி வைக்க உள்ளார். இதற்கான முன்னேற்பாடுகள் உசிலம்பட்டியில் தீவிரமாக நடைபெற்று வருகின்றன.
1,106 தங்க மோதிரங்கள் தயார்
இத்திட்டத்தின் கீழ் பயனாளிகளுக்கு வழங்குவதற்காக முதற்கட்டமாக 1,106 தங்க மோதிரங்கள் உசிலம்பட்டி அரசு மாவட்ட தலைமை மருத்துவமனைக்கு கொண்டு வரப்பட்டுள்ளன. அவை மருத்துவமனையில் தயார் நிலையில் உள்ள பாதுகாப்புப் பெட்டகத்தில் வைப்பதற்கான ஏற்பாடுகள் செய்யப்பட்டு வருகின்றன.
திட்டத்தின் தொடக்க விழாவுக்கான ஏற்பாடுகள் குறித்து காவல்துறை மற்றும் அதிகாரிகள் ஆய்வு மேற்கொண்டு வருகின்றனர். விழாவிற்கு வரும் பொதுமக்களின் எண்ணிக்கை, வாகன நிறுத்துமிடம் மற்றும் வாகனங்கள் சென்று வரும் வழித்தடங்கள் உள்ளிட்டவை குறித்தும் ஆலோசிக்கப்பட்டுள்ளது.
“எங்கள் தொகுதியை தேர்வு செய்தது பெருமை” – எம்.எல்.ஏ. விஜய்
உசிலம்பட்டி தொகுதி எம்.எல்.ஏ. விஜய் செய்தியாளர்களிடம் கூறுகையில், தாய்மாமன் தங்க மோதிரம் திட்டத்தை தொடங்கி வைக்க தங்களது தொகுதியை முதலமைச்சர் விஜய் தேர்வு செய்திருப்பது மகிழ்ச்சியளிப்பதாக தெரிவித்தார்.
முதலமைச்சரின் வருகைக்காக மக்களும், தாங்களும் காத்திருப்பதாகவும், விழாவுக்கான முன்னேற்பாடுகள் நடைபெற்று வருவதாகவும் அவர் கூறினார். மேலும், இந்தத் திட்டம் உசிலம்பட்டி மக்களின் முன்னேற்றத்திற்கு ஒரு வாய்ப்பாக அமையும் என நம்புவதாகவும் தெரிவித்தார்.
உசிலம்பட்டியை தேர்வு செய்ததன் பின்னணி என்ன?
உசிலம்பட்டி மற்றும் தென் மாவட்டப் பகுதிகளில் தாய்மாமன் சீர் வழங்கும் கலாசாரம் முக்கியத்துவம் பெற்றிருப்பதை கருத்தில் கொண்டு, இத்திட்டத்தை உசிலம்பட்டியில் தொடங்குவது பொருத்தமாக இருக்கும் என முடிவு செய்யப்பட்டதாக மாலை மலர் செய்தியில் குறிப்பிடப்பட்டுள்ளது.
மேலும், கடந்த காலங்களில் உசிலம்பட்டி பகுதியில் பெண் சிசுக்கொலை தொடர்பான பிரச்சினைகள் இருந்ததாகவும் அந்த செய்தியில் குறிப்பிடப்பட்டுள்ளது. பெண்களை மையப்படுத்திய திட்டம் என்பதால், அந்தப் பகுதியில் தொடங்குவது முக்கியத்துவம் வாய்ந்ததாக இருக்கும் என தெரிவிக்கப்பட்டுள்ளது.
அரசு மருத்துவமனைகளில் பிறக்கும் குழந்தைகளுக்கு தங்க மோதிரம்
தமிழ்நாடு அரசு அறிவித்துள்ள இத்திட்டத்தின் கீழ் அரசு மருத்துவமனைகளில் பிறக்கும் குழந்தைகளுக்கு ஒரு கிராம் எடை கொண்ட தங்க மோதிரம் வழங்கப்பட உள்ளது. திட்டம் தொடங்கப்படும் நாளில் இருந்து தகுதியுடைய குழந்தைகளுக்கு மருத்துவமனையிலிருந்து வீடு திரும்பும்போது மோதிரம் வழங்கும் ஏற்பாடுகளும் செய்யப்பட்டுள்ளதாக அரசு தரப்பில் தெரிவிக்கப்பட்டுள்ளது.
உசிலம்பட்டியில் முதலமைச்சர் விஜய் நேரில் பங்கேற்று திட்டத்தை தொடங்கி வைக்க உள்ளதால், அப்பகுதி மக்களிடையே எதிர்பார்ப்பு ஏற்பட்டுள்ளது.
“சிவனும், சக்தியும் சேர்ந்தா மாஸ்டா!” – விஜய், அஜித் இணைந்த போஸ்டர்களால் கோவையில் பரபரப்பு!