பழனி அருகே அடமானமாகப் பெறப்பட்ட காரை போலி ஆவணங்கள் தயாரித்து வேறு நபருக்கு விற்பனை செய்த வழக்கின் அடிப்படையில், தமிழக வெற்றிக் கழக (TVK) நிர்வாகியைப் பழனி தாலுகா காவல் துறையினர் கைது செய்து சிறையில் அடைத்தனர்.
திண்டுக்கல் மாவட்டம், பழனி அருகே உள்ள நெய்க்காரப்பட்டியைச் சேர்ந்தவர் ஷேக் அப்துல்லா. இவர் அப்பகுதியில் இறைச்சிக்கடை நடத்தி வருவதோடு, தமிழக வெற்றிக் கழகத்தின் நிர்வாகியாகவும் பொறுப்பில் உள்ளார். இந்நிலையில், திருப்பூர் மாவட்டம் உடுமலைப்பேட்டையைச் சேர்ந்த காளிதாஸ் என்பவர், தனது காரை ஷேக் அப்துல்லாவிடம் ரூ.2 லட்சத்திற்கு அடமானமாக வைத்துப் பணம் பெற்றிருந்ததாகக் கூறப்படுகிறது.
போலி ஆவணங்கள் தயாரித்து 3.50 லட்சத்திற்கு விற்பனை
அடமானமாகப் பெற்ற காரைத் திருப்பிக் கொடுக்க வேண்டிய நிலையில், ஷேக் அப்துல்லா போலி ஆவணங்களைத் தயாரித்து, திருச்சியைச் சேர்ந்த தனது நண்பருக்கு அந்த காரை ரூ.3.50 லட்சத்திற்கு விற்பனை செய்துள்ளார். இதையறியாத காளிதாஸ், தான் வாங்கிய பணத்தைத் திருப்பித் தந்து காரை மீட்கச் சென்றபோது, காரைக் கொடுக்க மறுத்த ஷேக் அப்துல்லா அவருக்குக் கொலை மிரட்டலும் விடுத்ததாகக் கூறப்படுகிறது.
எஸ்பி அலுவலகத்தில் புகார்: தீவிர விசாரணை
கார் மோசடி மற்றும் கொலை மிரட்டலால் அதிர்ச்சியடைந்த காளிதாஸ், இது குறித்து திண்டுக்கல் மாவட்டக் காவல் கண்காணிப்பாளர் (SP) அலுவலகத்தில் நேரில் சென்று புகார் அளித்தார். மாவட்ட எஸ்பி உத்தரவின் பேரில், பழனி தாலுகா காவல் துறையினர் வழக்குப்பதிவு செய்து தீவிர விசாரணை மேற்கொண்டனர்.
நீதிமன்றக் காவலில் சிறையில் அடைப்பு
காவல் துறையினரின் முதல் கட்ட விசாரணையில், அடமான காரை போலி ஆவணங்கள் மூலம் ஷேக் அப்துல்லா விற்பனை செய்தது உறுதியானது. இதையடுத்து, அவரைக் கைது செய்த காவல்துறையினர் பழனி நீதிமன்றத்தில் ஆஜர்படுத்தி, பின்னர் சிறையில் அடைத்தனர்.
அரசியல் கட்சி நிர்வாகி ஒருவர் அடமான காரை போலி ஆவணங்கள் மூலம் விற்று மோசடியில் ஈடுபட்ட சம்பவம் பழனி மற்றும் அதன் சுற்றுவட்டாரப் பகுதிகளில் பெரும் பரபரப்பை ஏற்படுத்தியுள்ளது.