தருமபுரி மாவட்டம் காரிமங்கலம் மற்றும் அதன் சுற்றுவட்டாரப் பகுதிகளில் பெய்து வரும் தொடர் மழையின் காரணமாக, முக்கியப் பகுதிகளில் மழைநீர் தேங்கும் சிக்கல் ஏற்பட்டுள்ளது. குறிப்பாக, காரிமங்கலம் பகுதியில் உள்ள மொரப்பூர் சாலை மேம்பாலம் பகுதியில் மழைநீர் குளம்போல் தேங்கி நிற்பதால், சாலையைக் கடக்க முடியாமல் பொதுமக்களும் வாகன ஓட்டிகளும் பெரும் அவதிக்குள்ளாகி வருகின்றனர்.
மேம்பாலம் பகுதியில் தேங்கிய மழைநீர்
தருமபுரி மாவட்டத்தின் பல்வேறு பகுதிகளில் அவ்வப்போது மழை பெய்து வரும் நிலையில், காரிமங்கலம் பகுதியில் சரியான வடிகால் வசதி இல்லாததே மழைநீர் தேங்குவதற்குக் முக்கியக் காரணமாகக் கூறப்படுகிறது. காரிமங்கலத்திலிருந்து மொரப்பூர் செல்லும் முக்கியச் சாலையான இந்த மேம்பாலப் பகுதியில், மழைக்காலங்களில் அதிகளவு நீர் தேங்கிவிடுகிறது. இதனால் இச்சாலையில் இயக்கப்படும் இரு சக்கர வாகனங்கள், கார்கள் மற்றும் அரசுப் பேருந்துகள் கூட செல்ல முடியாத சூழல் நிலவுகிறது.
மேலும், சாலையைக் கடந்து செல்லும் பள்ளி மாணவ-மாணவிகள், முதியவர்கள் மற்றும் நோயாளிகள் தேங்கி நிற்கும் அசுத்தமான தண்ணீருக்கு நடுவே நடந்து செல்ல வேண்டிய கட்டாயத்திற்குத் தள்ளப்பட்டுள்ளனர். மேலும், வேகமாகச் செல்லும் வாகனங்களால் மழைநீர் பாதசாரிகள் மீது தெறிப்பதும் அன்றாடத் துயரமாக மாறிவிட்டது.
உடனடியாக நடவடிக்கை எடுக்க பொதுமக்கள் கோரிக்கை
இது குறித்து அப்பகுதி மக்களும் வணிகர்களும் பலமுறை புகார் அளித்தும் இதுவரை உரிய வடிகால் வசதிகள் மேம்படுத்தப்படவில்லை என வேதனை தெரிவிக்கின்றனர். இனியாவது மாவட்ட நிர்வாகமும் பேரூராட்சி அதிகாரிகளும் உடனடியாகத் தலையிட்டு, தேங்கியுள்ள மழைநீரை உடனுக்குடன் வெளியேற்றவும், மேம்பாலப் பகுதியில் தடையற்ற வடிகால் வசதியை ஏற்படுத்தவும் துரித நடவடிக்கை எடுக்க வேண்டும் என அவர்கள் கோரிக்கை விடுத்துள்ளனர்.