கள்ளக்குறிச்சி மாவட்டம் கல்வராயன்மலை அருகே உள்ள தாழ்வாழப்பாடி கிராமத்தில், கடந்த இரண்டு ஆண்டுகளுக்கும் மேலாக ஊர் மக்களால் ஒதுக்கி வைக்கப்பட்டதாகக் கூறப்படும் குடும்பத்தைச் சேர்ந்த தனபாக்கியம் என்பவர் உடல்நலக் குறைவால் உயிரிழந்த சம்பவம் அதிர்ச்சியை ஏற்படுத்தியுள்ளது.
அவரது இறுதிச்சடங்கில் உறவினர்கள் மற்றும் ஊர் மக்கள் பங்கேற்க முடியாத சூழல் ஏற்பட்டுள்ளதாகவும், உடலை ஊரின் வழியாக எடுத்துச் சென்று அடக்கம் செய்யவும் எதிர்ப்பு தெரிவிக்கப்படுவதாகவும் புகார் எழுந்துள்ளது.
ஆழ்துளைக் கிணறு விவகாரத்தில் தொடங்கிய பிரச்சினை?
தாழ்வாழப்பாடி கிராமத்தைச் சேர்ந்த சின்னையன் என்பவரின் மனைவி தனபாக்கியத்திற்குச் சொந்தமாக அதே பகுதியில் விவசாய நிலம் உள்ளது. இந்த நிலத்தில் பல ஆண்டுகளுக்கு முன்பு ஊராட்சி நிர்வாகம் சார்பில் ஆழ்துளைக் கிணறு அமைக்கப்பட்டதாகக் கூறப்படுகிறது.
அந்த ஆழ்துளைக் கிணறு மூலம் அப்பகுதி மக்கள் சுமார் 30 ஆண்டுகளாகத் தண்ணீர் தேவையைப் பூர்த்தி செய்து வந்ததாகத் தெரிகிறது. இந்நிலையில், ஐந்து ஆண்டுகளுக்கு முன்பு ஆழ்துளைக் கிணறு பழுதடைந்ததாகவும், அதனைச் சீரமைக்காமல் விட்டதாகவும் கூறப்படுகிறது.
பின்னர் அந்தக் கிணற்றிலிருந்து தண்ணீர் எடுத்து சின்னையன் தனது விவசாயப் பணிகளுக்குப் பயன்படுத்தியதாகத் தெரிகிறது.
இரண்டு ஆண்டுகளாக ஊரை விட்டு ஒதுக்கி வைத்ததாகப் புகார்
இந்த ஆழ்துளைக் கிணறு தொடர்பான பிரச்சினையைத் தொடர்ந்து, கடந்த இரண்டு ஆண்டுகளுக்கும் மேலாக தனபாக்கியம் குடும்பத்தினரை ஊர் மக்கள் ஒதுக்கி வைத்துள்ளதாகப் புகார் தெரிவிக்கப்படுகிறது.
குடும்பத்தில் நடைபெறும் திருமணம் உள்ளிட்ட நல்லது கெட்டது நிகழ்ச்சிகளில் ஊர் மக்கள் கலந்து கொள்ளாமல் புறக்கணித்ததாகவும், அதேபோல் ஊரில் நடைபெறும் கோயில் திருவிழாக்கள் மற்றும் பிற பொது நிகழ்ச்சிகளில் தனபாக்கியம் குடும்பத்தினர் பங்கேற்கக் கூடாது எனக் கட்டுப்பாடு விதிக்கப்பட்டதாகவும் கூறப்படுகிறது.
உடல்நலக் குறைவால் தனபாக்கியம் உயிரிழப்பு
இவ்வாறு சமூக ரீதியாக ஒதுக்கி வைக்கப்பட்டதாகக் கூறப்படும் சூழலில், தனபாக்கியம் மன உளைச்சலில் இருந்து வந்ததாக அவரது தரப்பில் தெரிவிக்கப்படுகிறது. இந்நிலையில், அவருக்கு உடல்நலக் குறைவு ஏற்பட்டு நேற்று திடீரென உயிரிழந்தார். அவரது மறைவு குடும்பத்தினரிடையே பெரும் சோகத்தை ஏற்படுத்தியுள்ளது.
உடலை அடக்கம் செய்யவும் எதிர்ப்பு தெரிவிப்பதாகக் குற்றச்சாட்டு
தனபாக்கியம் உயிரிழந்த நிலையில், அவரது உடலைப் பார்ப்பதற்குக்கூட கிராமத்தில் உள்ள உறவினர்கள் வரவில்லை எனக் கூறப்படுகிறது.
மேலும், அவரது உடலை ஊரின் வழியாக எடுத்துச் சென்று அடக்கம் செய்வதற்கும் அப்பகுதி மக்கள் எதிர்ப்பு தெரிவித்து வருவதாகப் புகார் எழுந்துள்ளது.
தனபாக்கியத்தின் இறுதிச்சடங்கில் பங்கேற்றால் தங்களையும் ஊரைவிட்டு ஒதுக்கி வைத்துவிடுவோம் என உறவினர்களுக்கு மிரட்டல் விடுக்கப்பட்டதாகவும் குற்றச்சாட்டு முன்வைக்கப்படுகிறது.
ஒரு குடும்பத்தை சமூக ரீதியாக ஒதுக்கி வைப்பதாகக் கூறப்படும் இந்த விவகாரம் தற்போது தனபாக்கியத்தின் மரணத்திற்குப் பிறகு மேலும் பரபரப்பை ஏற்படுத்தியுள்ளது. உயிரிழந்தவரின் உடலை உரிய மரியாதையுடன் அடக்கம் செய்வதற்கான சூழலை ஏற்படுத்தவும், குடும்பத்தினர் முன்வைக்கும் புகார்கள் குறித்து விசாரணை நடத்தி உரிய நடவடிக்கை எடுக்கவும் மாவட்ட நிர்வாகமும் காவல்துறையும் தலையிட வேண்டும் என்ற கோரிக்கை எழுந்துள்ளது.