கடலூர் மாவட்டம் நெல்லிக்குப்பத்தில் தீபாவளியன்று இளைஞர்களுக்கு இடையே ஏற்பட்ட மோதலைத் தடுக்கச் சென்ற காவல் ஆய்வாளர் உள்ளிட்ட 3 போலீசார் மீது தாக்குதல் நடத்தப்பட்ட சம்பவம் பெரும் பரபரப்பை ஏற்படுத்தியுள்ளது. இந்தச் சம்பவம் தொடர்பாக 3 இளைஞர்களை போலீசார் கைது செய்துள்ளனர். மேலும், இளைஞர்கள் போலீசாரைத் தாக்கும் வீடியோ சமூக வலைதளங்களில் வைரலாகி வருகிறது.
தகராறைத் தடுக்கச் சென்ற போலீசார்!
நெல்லிக்குப்பத்தைச் சேர்ந்த இளைஞர்களுக்கும், பட்டாம்பாக்கத்தைச் சேர்ந்த இளைஞர்களுக்கும் இடையே கடந்த தீபாவளி இரவு மோதல் ஏற்படுவதாக நெல்லிக்குப்பம் போலீசாருக்குத் தகவல் கிடைத்தது.
இதையடுத்து, சம்பவ இடத்திற்கு விரைந்து சென்ற காவல் ஆய்வாளர் வேலுமணி மற்றும் இரண்டு காவலர்கள், இரு தரப்பினரிடையே ஏற்பட்ட தகராறை விலக்கி சமாதானப்படுத்த முயன்றனர்.
காவல் ஆய்வாளர் உள்ளிட்ட 3 பேர் மீது தாக்குதல்!
அப்போது திடீரென ஆத்திரமடைந்த இளைஞர்கள், போலீசார் என்றும் பாராமல் காவல் ஆய்வாளர் வேலுமணி, சிறப்பு உதவி ஆய்வாளர் செந்தில்குமார் மற்றும் காவலர் அமுதராஜ் ஆகிய மூன்று பேர் மீதும் சரமாரியாகத் தாக்குதல் நடத்தியதாகக் கூறப்படுகிறது.
இந்தத் தாக்குதலில் காயமடைந்த மூன்று போலீசாரும் சிகிச்சைக்காக கடலூர் அரசு மருத்துவமனையில் அனுமதிக்கப்பட்டனர். அங்கு அவர்களுக்கு தொடர்ந்து சிகிச்சை அளிக்கப்பட்டு வருகிறது.
3 இளைஞர்கள் கைது!
இந்தச் சம்பவம் குறித்து நெல்லிக்குப்பம் போலீசார் வழக்குப் பதிவு செய்து விசாரணை மேற்கொண்டனர். விசாரணையில், போலீசாரைத் தாக்கியதாக நெல்லிக்குப்பத்தைச் சேர்ந்த புகழேந்தி, ஜெகதீஷ் மற்றும் ஹரிஹரன் ஆகிய மூன்று இளைஞர்களை போலீசார் கைது செய்தனர்.
மேலும், இந்தத் தாக்குதல் சம்பவத்தில் தொடர்புடையதாகக் கூறப்படும் மற்ற நபர்களையும் போலீசார் தீவிரமாகத் தேடி வருகின்றனர்.
சமூக வலைதளங்களில் வைரலாகும் வீடியோ!
இதற்கிடையே, இளைஞர்கள் போலீசாரைத் தாக்கும் காட்சிகள் அடங்கிய வீடியோ தற்போது சமூக வலைதளங்களில் வேகமாகப் பரவி வருகிறது.
சட்டம்-ஒழுங்கைப் பாதுகாக்கச் சென்ற காவல்துறையினருக்கே தாக்குதல் நடத்தப்பட்ட சம்பவம் கடலூர் மாவட்டத்தில் பரபரப்பை ஏற்படுத்தியுள்ளது.
கூழ் குடித்துவிட்டு பணம் கொடுக்காமல் தகராறு – முதிய கடை உரிமையாளரை 10 அடி பள்ளத்தில் தள்ளிய மூவர்!