“மணிக்கு 151 கி.மீ வேகத்தில் வீசும் சூறாவளிக் காற்று” – ஜப்பானைத் தொடர்ந்து சீனாவிலும் டால்பின் புயல் கோரத்தாண்டவம்! 
ஜப்பானில் பெரும் பாதிப்பை ஏற்படுத்திய ‘டால்பின்’ புயல், தற்போது சீனாவின் கிழக்குக் கடற்கரைப் பகுதிகளில் கரையைக் கடந்து கடும் சேதத்தை ஏற்படுத்தி வருகிறது. இதன் காரணமாக முன்னெச்சரிக்கை நடவடிக்கையாக 10 லட்சத்திற்கும் மேற்பட்ட மக்கள் பாதுகாப்பான இடங்களுக்கு வெளியேற்றப்பட்டுள்ளனர்.
ஜப்பானில் கோரத்தாண்டவம்
கடந்த சில நாட்களுக்கு முன்பு ஜப்பானின் தெற்குத் தீவுப் பகுதிகளில் டால்பின் புயல் கடுமையான பாதிப்புகளை ஏற்படுத்தியது. அப்பகுதிகளில் மணிக்கு 162 கி.மீ முதல் அதிகபட்சமாக 216 கி.மீ வேகத்தில் சூறாவளிக் காற்று வீசியது. இதனால் மின்சாரம் துண்டிக்கப்பட்டுச் சுமார் 50,000 குடும்பங்கள் தங்களது இயல்பு வாழ்க்கையை இழந்தன.
சீனாவில் கரையைக் கடந்த டால்பின்
ஜப்பானை உலுக்கிய இந்த டால்பின் புயல் தற்போது சீனா நோக்கி நகர்ந்துள்ளது. சீனாவின் கிழக்குக் கடற்கரைப் பகுதியான இகுவான் (Yiguan) என்ற இடத்தில் இப்புயல் தனது கோரத் தாண்டவத்தைத் தொடங்கியுள்ளது. இதன் காரணமாகப் பெருவெள்ளத்தை ஏற்படுத்தும் கனமழையும், மணிக்கு 151 கி.மீ வேகத்தில் சூறாவளிக் காற்றும் வீசக்கூடும் எனச் சீனாவின் வானிலை ஆய்வு மைய அதிகாரிகள் எச்சரித்துள்ளனர். மேலும், ‘சபிர்-சிம்சன்’ (Saffir-Simpson) புயல் அளவுகோலின்படி இது முதல் ரகப் புயலாக வகைப்படுத்தப்பட்டுள்ளது.
10 லட்சம் பேர் வெளியேற்றம்
புயலின் தீவிரத்தைக் கருத்தில் கொண்டு, சீனாவின் கிழக்குப் பகுதியில் வசிக்கும் 10 லட்சத்திற்கும் அதிகமான மக்கள் வெளியேற்றப்பட்டுப் பாதுகாப்பான முகாம்களில் தங்க வைக்கப்பட்டுள்ளனர். ஜெஜியாங், ஷாங்காய், வடக்கு புஜியான், வடகிழக்கு ஜியாங்சிங், மத்திய மற்றும் தெற்கு ஆன்ஹியூய், ஜியாங்சு ஆகிய மாகாணங்களில் 250 முதல் 500 மில்லிமீட்டர் வரை மிகக் கடுமையான கனமழை பொழியும் என எச்சரிக்கப்பட்டுள்ளது. இவ்வளவு அதிகப்படியான மழைப்பொழிவு பெரும் பேரிடர் கால அபாயத்தைக் குறிப்பதாக வானிலை ஆய்வாளர்கள் தெரிவிக்கின்றனர்.
போக்குவரத்து முடக்கம்:
புயல் மற்றும் கனமழை அபாயம் காரணமாக 1,500-க்கும் மேற்பட்ட விமானச் சேவைகள் ரத்து செய்யப்பட்டுள்ளன. மேலும், பயணிகள் கப்பல்கள் இயங்கும் 55 கடல்வழிப் போக்குவரத்துத் தடங்களும் முற்றிலுமாக மூடப்பட்டுள்ளன. கிழக்குச் சீனாவில் கரையைக் கடந்த பின் மேற்கு நோக்கி நகர்ந்து, மத்திய மற்றும் தென்மேற்குச் சீனப் பகுதிகளில் இப்புயல் வலுவிழக்கும் என எதிர்பார்க்கப்படுகிறது. இருப்பினும், புயல் கரையைக் கடந்த பிறகு அதி கனமழை, வெள்ளம் மற்றும் நிலச்சரிவு போன்ற பேரிடர் அபாயங்கள் இருப்பதால் சீனாவின் பேரிடர் மேலாண்மைத் துறை முழுவீச்சில் மீட்பு மற்றும் முன்னெச்சரிக்கை பணிகளில் ஈடுபட்டுள்ளது.
ஏற்கனவே ‘நவுல்’ (Noul) புயலின் தாக்கத்திலிருந்து சீனா முழுமையாக மீளாத நிலையில், அதனை விடப் பல மடங்கு அதிக பாதிப்புகளை இந்த டால்பின் புயல் ஏற்படுத்தி வருவது குறிப்பிடத்தக்கது.