மத்திய அரசு நிறைவேற்றிய சட்டத்தின்படி ‘தேசிய செவிலியர் மற்றும் மகப்பேறு மருத்துவப் பணி ஆணையம்’ அமைப்பது குறித்து 2 மாதங்களுக்குள் தகுந்த முடிவை எடுக்க வேண்டும் என மத்திய சுகாதாரத் துறை அமைச்சகத்திற்கு டெல்லி உயர் நீதிமன்றம் உத்தரவிட்டுள்ளது.
வழக்கின் பின்னணி
இந்திய தொழில்முறை செவிலியர் சங்கம் சார்பில் டெல்லி உயர் நீதிமன்றத்தில் இது தொடர்பாக மனு ஒன்று தாக்கல் செய்யப்பட்டது. அம்மனுவில் தெரிவிக்கப்பட்டுள்ளவை:
சட்டத் திருத்தம்: கடந்த 2023-ம் ஆண்டு நாடாளுமன்றத்தில் ‘தேசிய செவிலியர் மற்றும் மகப்பேறு மருத்துவப் பணி ஆணையச் சட்டம்’ நிறைவேற்றப்பட்டு, 2024 பிப்ரவரி 29 அன்று மத்திய அரசால் நடைமுறைக்குக் கொண்டு வரப்பட்டது.
மனுதாரரின் கோரிக்கை: இச்சட்டத்தின்படி, செவிலியர் மற்றும் மகப்பேறு மருத்துவக் கல்வி நடைமுறைகளை ஒழுங்குபடுத்த நடைமுறையில் உள்ள ‘இந்திய செவிலியர் கவுன்சிலுக்கு’ பதிலாக ‘தேசிய செவிலியர் மற்றும் மகப்பேறு மருத்துவப் பணி ஆணையம்’ அமைக்கப்பட வேண்டும். ஆனால், இதுவரை அந்த ஆணையம் அமைக்கப்படாததால், உடனடியாக அதை அமைக்க உத்தரவிட வேண்டும் எனக் கோரப்பட்டது.
உயர் நீதிமன்றத்தின் உத்தரவு
இந்த மனுவை விசாரணை செய்த நீதிபதி ஸ்வர்ண காந்தா சர்மா பிறப்பித்த உத்தரவு:
தாக்கல் செய்யப்பட்ட மனுவையே மனுதாரரின் கோரிக்கை மனுவாகக் கருதி, 2 மாதங்களுக்குள் தேசிய செவிலியர் மற்றும் மகப்பேறு மருத்துவப் பணி ஆணையம் அமைப்பது குறித்து மத்திய சுகாதாரம் மற்றும் குடும்ப நல அமைச்சகம் உரிய முடிவை எடுக்க வேண்டும்.
ஒருவேளை மனுதாரர் கோரிய நிவாரணம் கிடைக்கப் பெறவில்லை எனில், அவர்கள் மீண்டும் டெல்லி உயர் நீதிமன்றத்தை அணுகலாம் எனத் தெரிவித்து வழக்க முடித்து வைத்தார்.
நேபாளத்தில் ஏற்பட்ட திடீர் வெள்ளம்: 45 டன் நிவாரணப் பொருட்களை அனுப்பியது இந்தியா