இந்தியாவில் பன்றிக்காய்ச்சல் (H1N1 இன்ஃப்ளூயன்ஸா) பாதிப்பு அதிகரித்து வரும் நிலையில், ராஜஸ்தான் மாநில வேளாண் துறை அமைச்சர் கிரோடி லால் மீனா (74) பன்றிக்காய்ச்சலால் பாதிக்கப்பட்டுத் தீவிர சிகிச்சைப் பிரிவில் அனுமதிக்கப்பட்டுள்ளார்.
கடந்த சில தினங்களாக உடல்நலக் குறைவால் பாதிக்கப்பட்டிருந்த அமைச்சர் மீனா, ஜெய்ப்பூரில் உள்ள மருத்துவமனையில் அனுமதிக்கப்பட்டார். அங்கு அவருக்கு மேற்கொள்ளப்பட்ட மருத்துவ பரிசோதனையில் H1N1 வைரஸ் தொற்று இருப்பது உறுதி செய்யப்பட்டது. தற்போது அவரது உடல்நிலை கவலைக்கிடமாக உள்ளதால், அவர் அவசரத் தீவிர சிகிச்சைப் பிரிவுக்கு (ICU) மாற்றப்பட்டு மருத்துவர்களின் தீவிர கண்காணிப்பில் உள்ளார்.
முதலமைச்சர் விசாரிப்பு & உத்தரவு
அமைச்சரின் உடல்நிலை குறித்து ராஜஸ்தான் முதலமைச்சர் பஜன்லால் சர்மா தொலைபேசி வாயிலாகத் தொடர்புகொண்டு விசாரித்தார். மேலும், அவரது சகோதரர் ஜக்மோகன் மீனாவிடம் பேசி தற்போதைய சிகிச்சைகள் குறித்துக் கேட்டறிந்தார். தொடர்ந்து, எஸ்எம்எஸ் (SMS) மருத்துவக் கல்லூரியின் முதல்வர் மருத்துவர் தீபக் மகேஸ்வரியைத் தொடர்புகொண்ட முதலமைச்சர், அமைச்சர் மீனாவுக்கு உயர்தர மற்றும் சிறந்த மருத்துவச் சிகிச்சைகள் கிடைப்பதை உடனடியாக உறுதி செய்யுமாறு அறிவுறுத்தினார்.
8 மடங்கு அதிகரித்த பாதிப்புகள்
ராஜஸ்தான் மாநில சுகாதாரத் துறை வெளியிட்டுள்ள தரவுகளின்படி, கடந்த ஆகஸ்ட் மாதத்தின் முதல் 15 நாட்களில் மட்டும் மாநிலத்தில் 129 பேருக்குப் பன்றிக்காய்ச்சல் பாதிப்பு கண்டறியப்பட்டுள்ளது. கடந்த ஆண்டின் இதே காலகட்டத்தில் வெறும் 16 பாதிப்புகள் மட்டுமே பதிவாகியிருந்த நிலையில், இந்த ஆண்டு பாதிப்பு எண்ணிக்கை கிட்டத்தட்ட எட்டு மடங்கு உயர்ந்துள்ளதால் மக்களிடையே பெரும் அச்சம் ஏற்பட்டுள்ளது.
முன்னெச்சரிக்கை நடவடிக்கைகள் தீவிரமடைப்பு
அண்டை மாநிலங்களான டெல்லி மற்றும் உத்தரப் பிரதேசத்திலும் காய்ச்சல் பாதிப்புகள் அதிகரித்து வருகின்றன. இதனைத் தொடர்ந்து, ராஜஸ்தான் மாநிலம் முழுவதும் சுகாதாரத் துறை அதிகாரிகள் கண்காணிப்புப் பணிகளைத் தீவிரப்படுத்தியுள்ளனர். அனைத்து அரசு மருத்துவமனைகளிலும் தனிமைப்படுத்தும் படுக்கைகள் (Isolation Beds), தேவையான மருந்துகள் மற்றும் பரிசோதனை கருவிகளைத் தயார் நிலையில் வைத்திருக்குமாறு மாநில அரசு அதிரடி உத்தரவு பிறப்பித்துள்ளது.
இந்தியாவின் சிறந்த முதலமைச்சர்கள் யார்? – CJP தலைவர் அபிஜீத் திப்கே புகழாரம்!