அமெரிக்காவின் நியூயார்க் நகரில் உள்ள புகழ்பெற்ற மேடிசன் ஸ்கொயர் கார்டனில் ஆர்.எஸ்.எஸ் (RSS) அமைப்பின் தலைவர் மோகன் பகவத் பங்கேற்கும் ‘உலகளாவிய ஒருமைப்பாடு விழா’ நிகழ்ச்சிக்கு நியூயார்க் மேயர் ஜோரான் மம்தானி (Zohran Mamdani) தனது பலத்த எதிர்ப்பைப் பதிவு செய்துள்ளார்.
ராஷ்ட்ரீய ஸ்வயம்சேவக் சங்கத்தின் (ஆர்.எஸ்.எஸ்) நூற்றாண்டு விழாவையொட்டி, அதன் தலைவர் மோகன் பகவத் அமெரிக்கா, கனடா உள்ளிட்ட நாடுகளுக்குச் சுற்றுப்பயணம் மேற்கொண்டுள்ளார். இதன் ஒருபகுதியாக, ஆகஸ்ட் 29-ஆம் தேதி நியூயார்க் மேடிசன் ஸ்கொயரில் நடைபெறும் ‘உலகளாவிய ஒருமைப்பாடு’ கூட்டத்தில் அவர் உரையாற்றவுள்ளார்.
நியூயார்க் மேயர் கூறியது என்ன?
இந்நிலையில், இந்த நிகழ்ச்சி குறித்துச் செய்தியாளர்கள் எழுப்பிய கேள்விக்குப் பதிலளித்த நியூயார்க் மேயர் ஜோரான் மம்தானி கூறியதாவது:
“நான் வளர்ந்த சூழலிலும் எனது குடும்பத்தின் வழியிலும் நான் அறிந்துகொண்ட இந்தியா என்பது, அனைத்து மக்களையும் உள்ளடக்கிய ஒரு பன்மைத்துவச் சமூகம் மற்றும் மதச்சார்பற்ற குடியரசு ஆகும். ஆனால், மனிதர்களைப் பிரித்தாளும் மற்றும் ஒதுக்கி வைக்கும் சித்தாந்தங்களை என்னால் எந்த வகையிலும் ஏற்றுக்கொள்ள முடியாது. எனவே, இந்த பேரணிக்கு என் எதிர்ப்பைத் தெரிவித்துக் கொள்கிறேன். இருப்பினும், இது ஒரு தனியார் அரங்கில் நடைபெறும் நிகழ்ச்சி என்பதால், இதை ரத்து செய்வதற்குப் மாநகராட்சிக்கு எந்த அளவுக்கு அதிகாரம் உள்ளது என்பது தெரியவில்லை” என்று அவர் பேசியுள்ளார்.
அதிகரிக்கும் எதிர்ப்புகள்
இந்திய வம்சாவளியைச் சேர்ந்த முதல் நியூயார்க் மேயரான ஜோரான் மம்தானியின் இந்த பேச்சு சர்வதேச அளவில் கவனத்தைப் பெற்றுள்ளது. இதனிடையே, ‘ஹிந்துஸ் ஃபார் ஹியூமன் రైட்ஸ்’ மற்றும் ‘இந்தியன் அமெரிக்கன் முஸ்லிம் கவுன்சில்’ உள்ளிட்ட பல மனித உரிமை அமைப்புகளும் இந்த நிகழ்ச்சிக்கு எதிர்ப்பு தெரிவித்து நியூயார்க் நகர மண்டபத்தின் முன் போராட்டம் நடத்தியதுடன், நிகழ்ச்சியை ரத்து செய்ய வேண்டும் என்றும் வலியுறுத்தி வருகின்றன.
ஏழை, நடுத்தர மக்களுக்கு ஜாக்பாட்: 24 மணி நேரத்திற்கு ரூ.1 வாடகையில் பிரம்மாண்ட ஏசி திருமண மண்டபம்!