இந்தியாவில் தயாரிக்கப்படும் சிப்ஸ், கூல்டிரிங்க்ஸ் மற்றும் பதப்படுத்தப்பட்ட உணவுப் பொருட்களில் சர்க்கரை, கொழுப்பு மற்றும் உப்பின் அளவு அதிகமாக இருந்தால், பாக்கெட்டின் முன்பக்கத்திலேயே ‘சிகப்பு நிற எச்சரிக்கை முத்திரை’ (Red Flag Warning) பதிக்க வேண்டும் என்ற திட்டத்திலிருந்து இந்திய உணவு பாதுகாப்பு மற்றும் தரநிலைகள் ஆணையம் (FSSAI) பின்வாங்கியுள்ளது.
முன்னணி உணவுத் தயாரிப்பு நிறுவனங்களின் கடும் எதிர்ப்பினாலும், லாபி (Lobbying) நடவடிக்கைகளினாலும் இந்தத் திட்டம் கைவிடப்பட்டதாக ‘ராய்ட்டர்ஸ்’ (Reuters) செய்தி நிறுவனம் வெளியிட்டுள்ள புலனாய்வு அறிக்கை தெரிவிக்கிறது.
ஐரோப்பாவில் ஒரு தரம்… இந்தியாவில் வேறு தரமா?
ராய்ட்டர்ஸ் ஆய்வின்படி, லண்டனில் விற்பனையாகும் ‘ஃபான்டா’ (Fanta) கூல்டிரிங்க்ஸ் கேனில் 63 கலோரிகளும் குறைவான சர்க்கரையுமே உள்ளது. ஆனால், அதே பிராண்ட் இந்தியாவில் விற்பனையாகும்போது, அதில் மூன்று மடங்கு அதிகமான சர்க்கரை சேர்க்கப்படுகிறது. மேலும், ஐரோப்பாவில் எச்சரிக்கை முத்திரையுடன் விற்பனை செய்யப்படும் சேர்க்கை நிறமிகள் (Artificial Dyes), இந்தியாவில் பாக்கெட்டின் பின்புறம் சிறிய எழுத்துக்களில் மட்டுமே குறிப்பிடப்படுகின்றன.
இந்தியாவில் விற்பனையாகும் பாக்கெட் உணவுகள் மற்றும் பானங்களில் 80 சதவீதத்திற்கும் அதிகமானவை அதிகளவில் கொழுப்பு, சர்க்கரை அல்லது உப்பைக் கொண்டுள்ளன.
உணவு நிறுவனங்களின் எதிர்ப்பு:
மார்ச் 2026-ல் நடைபெற்ற உயர்நிலை ஆலோசனைக் கூட்டத்தில், கோகோ கோலா, பெப்சிகோ உள்ளிட்ட பன்னாட்டு நிறுவனங்களின் பிரதிநிதிகள் மற்றும் இந்திய உணவு அமைப்புகள் (IFBA) இந்த எச்சரிக்கை முத்திரைக்குக் கடும் எதிர்ப்பு தெரிவித்தன:
பாக்கெட்டுகளின் முன்பக்கத்தில் சிகப்பு எச்சரிக்கை முத்திரை பதித்தால், சந்தையில் பெரும்பாலான உணவு பாக்கெட்டுகள் சிகப்பு நிறமாக மாறிவிடும் என்றும், இது நுகர்வோரை தேவையின்றி அச்சுறுத்தும் என்றும் வாதிட்டன.
இந்திய உணவுகளின் சுவை மற்றும் தயாரிப்பு முறை மேற்கத்திய நாடுகளிலிருந்து மாறுபட்டது என்பதால், சர்வதேச தரநிலைகளை இந்தியாவில் அப்படியே அமல்படுத்துவது கடினம் என FSSAI உச்ச நீதிமன்றத்தில் தெரிவித்துள்ளது.
FSSAI-ன் புதிய முடிவு & உச்ச நீதிமன்றத்தின் தலையீடு:
நிறுவனங்களின் நெருக்கடியைத் தொடர்ந்து, வண்ணமயமான எச்சரிக்கை குறியீடுகளுக்குப் பதிலாக, பாக்கெட்டின் பின்புறம் வழக்கம்போல கருப்பு-வெள்ளை அட்டவணையில் (Black-and-White Table) விவரங்களைக் குறிப்பிட்டால் போதும் என்ற நிலைக்கு FSSAI வந்துள்ளது.
இருப்பினும், மக்கள் நல ஆர்வலர்கள் தொடர்ந்த வழக்கின் அடிப்படையில் இந்திய உச்ச நீதிமன்றம் இந்த முடிவைக் கூர்மையாகக் கவனித்து வருகிறது. “இந்திய மக்களின் ஆரோக்கியத்தில் அரசு மிகுந்த அக்கறை கொண்டுள்ளது என்பதை உலகம் அறிய வேண்டும்” எனத் தெரிவித்த நீதிபதிகள், FSSAI-ன் இந்த மெத்தனப் போக்கிற்குத் தங்களது கண்டனத்தையும் பதிவு செய்துள்ளனர்.
மக்களின் உடல்நலன் அபாயத்தில்:
2050-ஆம் ஆண்டிற்குள் இந்தியாவில் சுமார் 45 கோடி மக்கள் உடல் பருமன் (Obesity) அல்லது அதிக எடையால் பாதிக்கப்படும் அபாயம் உள்ளதாக லான்செட் (Lancet) ஆய்வு எச்சரிக்கிறது. இத்தகைய சூழலில், நுகர்வோருக்குத் தெளிவான எச்சரிக்கை அளிக்கும் நடைமுறையைப் பன்னாட்டு நிறுவனங்களின் லாபத்திற்காகக் கைவிடுவது பொதுமக்களின் ஆரோக்கியத்திற்குப் பெரும் சவாலாக அமையும் என சமூக ஆர்வலர்கள் கவலை தெரிவிக்கின்றனர்.
“வந்தே பாரத் எக்ஸ்பிரஸ் ரயில் புறப்பாட்டில் தாமதம்!” — தெற்கு ரயில்வே முக்கிய அறிவிப்பு!