வீட்டு வேலை செய்யவோ, பெற்றோரைக் கவனிக்கவோ மனைவியைக் கட்டாயப்படுத்த முடியாது — குடும்ப நல நீதிமன்ற உத்தரவை உறுதிசெய்த நீதிபதி
மாமனார், மாமியாரைக் கவனித்துக் கொள்ளும் முதன்மைப் பொறுப்பு பெற்ற பிள்ளைகளுக்கே உரியது; அதை மருமகளிடம் எதிர்பார்க்கவோ கட்டாயப்படுத்தவோ முடியாது என்று கர்நாடக உயர் நீதிமன்றம் அதிரடித் தீர்ப்பு வழங்கியுள்ளது.
பெங்களூரு குடும்ப நல நீதிமன்றத்தில் தொடரப்பட்ட வழக்கு ஒன்றில், மனைவிக்கு ரூ.5 ஆயிரம் மற்றும் குழந்தைகளுக்கு ரூ.4 ஆயிரம் என மொத்தம் மாதம் ரூ.9 ஆயிரம் ஜீவனாம்சம் வழங்க வேண்டும் என்று உத்தரவிடப்பட்டிருந்தது. இந்த உத்தரவை எதிர்த்து கணவர் சார்பில் கர்நாடக உயர் நீதிமன்றத்தில் மேல்முறையீடு செய்யப்பட்டது.
கணவர் தரப்பு வாதம்:
மேல்முறையீட்டு மனு விசாரணையின் போது கணவர் தரப்பு வழக்கறிஞர் ஆஜராகி வாதாடினார்:
மனுதாரரின் மனைவி, தனது மாமனார் மற்றும் மாமியாரைச் சரியாகக் கவனித்துக் கொள்வதில்லை. வீட்டு வேலைகளையும் அவர் முறையாகச் செய்வதில்லை. கணவரின் அனுமதி பெறாமல் பலமுறை தனது பெற்றோர் வீட்டிற்குச் சென்று வருகிறார்.
உயர் நீதிமன்றத்தின் முக்கியத் தீர்ப்பு அம்சங்கள்:
இருதரப்பு வாதங்களையும் விரிவாகக் கேட்டறிந்த நீதிபதி, கணவரின் மேல்முறையீட்டைத் தள்ளுபடி செய்து மனைவியைக் கட்டாயப்படுத்த முடியாது என அதிரடி உத்தரவிட்டார்:
பிள்ளைகளுக்கே முதன்மைப் பொறுப்பு: வயதான பெற்றோரைக் கவனித்துக் கொள்ள வேண்டிய முதன்மையான கடமையும் பொறுப்பும் அவர்களின் மகன்கள் மற்றும் மகள்களுக்கே உள்ளது. அந்தப் பொறுப்பை மருமகள் அல்லது மருமகனிடம் வழங்கி வற்புறுத்த முடியாது.
வீட்டு வேலைகளுக்குக் கட்டாயமில்லை: திருமணமான பெண் வீட்டு வேலைகளை மட்டுமே செய்து கொண்டிருக்க வேண்டும் என்று அவரைக் கட்டாயப்படுத்த முடியாது.
பெற்றோர் வீட்டிற்குச் செல்ல அனுமதி தேவையில்லை: திருமணம் என்பது ஒருவரின் தனிப்பட்ட சுதந்திரத்தையும் விருப்பத்தையும் கட்டுப்படுத்துவது அல்ல. திருமணமான ஒரு பெண் தனது பெற்றோர் வீட்டிற்குச் செல்வது அவரின் அடிப்படை உரிமையாகும். இதற்கு கணவர் வீட்டிலுள்ள அனைவரிடமும் அனுமதி பெற வேண்டும் என்ற கட்டாயம் இல்லை.
மனைவி தன் விருப்பப்படி வாழ முழு உரிமை உண்டு என்றும், ஜீவனாம்சம் தொடர்பான கீழ் நீதிமன்றத்தின் உத்தரவு சரியானது என்றும் கூறி உயர் நீதிமன்றம் இந்த வழக்கை முடித்து வைத்தது.
ஆந்திராவில் நெகிழ்ச்சி: ரூ.1 வாடகையில் பிரம்மாண்ட நவீன திருமண மண்டபம்!