“சினிமா கவர்ச்சிக்கு ஓட்டுப்போட்டால் நாடு நாசமாகும்!” – சட்டமன்றப் போக்கையும் அரசியல் கட்சிகளையும் விளாசிய விவசாயிகள் சங்கக் கூட்டமைப்பு செயலாளர் நல்லசாமி!
சென்னையில் செய்தியாளர்களைச் சந்தித்த தமிழ்நாடு அனைத்து விவசாயிகள் சங்கங்களின் கூட்டமைப்புச் செயலாளர் நல்லசாமி, மாநிலத்தின் வாழ்வாதாரப் பிரச்சினைகள், சட்டமன்ற நடபடிகள் மற்றும் தற்போதைய அரசியல் சூழல் குறித்துப் பல்வேறு அதிரடி விமர்சனங்களையும் சவால்களையும் முன்வைத்துள்ளார்.
சட்டமன்றத்தில் பாட்டுக்கு பாட்டு போட்டி; விவசாயிகள் வேதனை
சென்னை சேப்பாக்கத்தில் உள்ள பத்திரிகையாளர் மன்றத்தில் செய்தியாளர்களைச் சந்தித்த நல்லசாமி, கள் தடை, காவிரி விவகாரம், நீட் தேர்வு ரத்து உள்ளிட்ட பல்வேறு முக்கியப் பிரச்சினைகள் குறித்துப் பேசினார். “கர்நாடக மாநிலத்தில் சாத்தியமாகும் குறுவை சாகுபடி, தமிழ்நாட்டில் ஏன் சாத்தியமாகவில்லை என்பது குறித்துச் சட்டமன்றத்தில் யாராவது பேசினார்களா?” என்று கேள்வி எழுப்பிய அவர், செங்கோட்டையன், கே.என். நேரு, எ.வ. வேலு உள்ளிட்ட மூத்த உறுப்பினர்கள் பேரவையில் இருந்தும் இது குறித்து வாய் திறக்காதது ஏன் எனக் கேட்டார். மேலும், கம்யூனிஸ்ட்டுகள் உள்ளிட்ட தேசியக் கட்சியினரும் இந்த விவகாரத்தில் கேள்வி கேட்காதது பெரும் அதிர்ச்சி அளிப்பதாகக் குறிப்பிட்டார்.
விவசாயிகளின் வாழ்வாதாரப் பிரச்சினைகள் மற்றும் கள் இறக்க அனுமதிப்பது குறித்து ஆலோசிப்பதற்குப் பதிலாக, நடப்புச் சட்டமன்றத்தில் ‘பாட்டுக்கு பாட்டு’ போட்டிதான் நடந்து கொண்டிருக்கிறது என்று அவர் கடுமையாகச் சாடினார்.
காவிரி நீர் விவகாரமும் மறுசீராய்வுக் குழு கோரிக்கையும்
கடந்த காலங்களில் காவிரி விவகார வழக்கை முந்தைய ஆட்சிகள் முறையாகத் தொடராமல் போனதாலேயே, கர்நாடகாவில் சாத்தியமான குறுவை சாகுபடி தமிழகத்தில் சாத்தியமாகாமல் போனதாகக் குற்றம் சாட்டினார்.
“கர்நாடகாவுக்கு 284.785 டி.எம்.சி, தமிழ்நாட்டிற்கு 122.25 டி.எம்.சி, கேரளாவுக்கு 2 டி.எம்.சி எனத் தினந்தோறும் தண்ணீர் சரியாக வந்திருந்தால் தமிழகத்தில் குறுவை சாகுபடி தடையின்றி நடந்திருக்கும். காவிரித் தீர்ப்பைக் கர்நாடக அரசு பின்பற்றவில்லை எனக் குற்றம் சாட்டப்படும் நிலையில், தமிழ்நாட்டில் அதை நடைமுறைப்படுத்த முறையான நடவடிக்கைகள் இல்லை. இது குறித்துத் தமிழ்நாடு அரசு நடுவர் மன்றத்தில் மறுசீராய்வுக் குழுவை நிறுவ வேண்டும்,” என அவர் கோரிக்கை விடுத்தார்.
இனோவா கார் முதல் ரூ.10 கோடி வரை… நல்லசாமியின் அதிரடி சவால்கள்!
செய்தியாளர்கள் சந்திப்பில் பல்வேறு திறந்தவெளி சவால்களை நல்லசாமி விடுத்தார்:
கள் தடை சவால்: “கள் மீதான தடை நியாயமானது எனச் சட்டமன்ற உறுப்பினர்கள் யாராவது நிரூபித்தால், அவர்களுக்கு ‘இனோவா கார்’ பரிசாக வழங்கப்படும்.”
முந்தைய அமைச்சர்களுக்கு சவால்: “முந்தைய ஆட்சிகளில் நீர்வளத்துறை அமைச்சராக இருந்தவர்களின் செயல்பாடுகள் சரியானவைதான் என நிரூபித்தால் ரூ.10 கோடி பரிசு தரப்படும்.”
நதிநீர் மாசுபாடு சவால்: “பவானி ஆற்றங்கரைகளில் உள்ள காகித தொழிற்சாலைகள், சர்க்கரை ஆலைகள் மற்றும் சாராயத் தொழிற்சாலைகளினாலேயே நதிநீர் மாசுபடுகிறது. இது உண்மைக்கு மாறானது என யார் நிரூபித்தாலும் உரிய பரிசு வழங்கப்படும்.”
“சினிமா கவர்ச்சிக்கு ஓட்டுப்போட்டால் நாடு நாசமாகும்!”
அரசியல் நிலவரம் குறித்துப் பேசிய அவர், “சினிமா கவர்ச்சியால் ஒரு நடிகரைப் பார்த்து விசில் அடித்து ஓட்டுப் போட்டால் இந்த நாடு நாசமாகத்தான் போகும். பீகார் மாநிலத்தைப் பின்பற்றித் தமிழ்நாட்டிலும் மதுக் கொள்கையை உடனடியாக மாற்றி அமைக்க வேண்டும்,” என்றார். மேலும், “வரும் இடைத்தேர்தலில் பெருந்துறை தொகுதியில் காவிரி உரிமை மீட்பு மற்றும் கள் விடுதலை வேட்பாளராகக் கூட்டமைப்பு சார்பில் ஒருவரை நிறுத்தப் போகிறோம். கள் இறக்குவதற்கான அனுமதி தொடர்பாக அமைச்சரைச் சந்தித்துக் கோரிக்கை வைத்துள்ளோம்; அது விரைவில் நிறைவேற்றப்படும் என அமைச்சர் உறுதியளித்துள்ளார். புதிய முதலமைச்சரான விஜய் எங்களைக் கண்டு ஓடி ஒளியப் போகிறாரா என்பதைப் பொறுத்திருந்து பார்ப்போம்,” என்று நல்லசாமி தெரிவித்தார்.