எந்த ஒரு குறிப்பிட்ட மதம், சாதி அல்லது இடத்தின் அடையாளமும் இன்றி, உலக அளவில் அதிக மொழிகளில் மொழிபெயர்க்கப்பட்ட பெருமைக்குரிய தனித்துவமான இலக்கியம் திருக்குறள் எனப் பிரபல எழுத்தாளரும் இயக்குநருமான பாரதி கிருஷ்ணகுமார் தெரிவித்துள்ளார். ‘உரைமொழி’ யூடியூப் சேனலுக்கு அவர் வழங்கிய சிறப்பு நேர்காணலில் திருக்குறளின் வரலாறு மற்றும் அதன் இலக்கியச் சிறப்புகள் குறித்துப் பல சுவாரஸ்யமான வரலாற்று உண்மைகளைப் பகிர்ந்துள்ளார்.
பெயர்க் காரணமும் பெருமையும்:
‘திரு’ என்பது உயர்வைக் குறிப்பதும், ‘குறள்’ என்பது அளவைக் குறிப்பதும் ஆகும். தமிழில் 20ஆம் நூற்றாண்டு வரையிலான இலக்கிய வரலாற்றில் இறைவனைப் போற்றும் சமய நூல்களுக்கு மட்டுமே ‘திரு’ என்ற அடைமொழி வழங்கும் வழக்கம் இருந்தது (எ.கா: திருப்பாவை, திருப்புகழ்). ஆனால், எந்தச் சமய அடையாளமும் இன்றி, அத்தகைய மதிப்பிற்குரிய அடைமொழியைப் பெற்ற தமிழின் ஒரே இலக்கியம் திருக்குறள் மட்டுமே என்று அவர் குறிப்பிட்டார்.
மகாத்மா காந்தியும் ரஷ்ய மேதை டால்ஸ்டாயும்:
1904ஆம் ஆண்டில் தென்னாப்பிரிக்காவில் வழக்கறிஞராகப் பணியாற்றிய காந்தி, ரஷ்ய மேதை லியோ டால்ஸ்டாயின் எழுத்துக்களால் ஈர்க்கப்பட்டார். தான் வாங்கிய பண்ணைக்கு ‘டால்ஸ்டாய் பண்ணை’ என்று பெயரிட்ட காந்தி, டால்ஸ்டாய்க்கு எழுதிய கடிதத்தில், அவரது அறக்கருத்துக்களின் மூலத்தைப் பற்றி வினவினார். அதற்குப் பதிலளித்த டால்ஸ்டாய், தனது படைப்புகளுக்குரிய மேலான கருத்துக்களைத் இந்தியாவின் தென்பகுதியில் எழுதப்பட்டு ஜெர்மன் மொழியில் மொழிபெயர்க்கப்பட்ட ‘திருக்குறள்’ மூலமாகப் பெற்றதாகக் குறிப்பிட்ட வரலாற்று நிகழ்வை பாரதி கிருஷ்ணகுமார் சுட்டிக்காட்டினார்.
ஓலைச்சுவடியில் இருந்து அச்சேறிய வரலாறு:
சுமார் 200 ஆண்டுகளுக்கு முன்பு (1812 இல்) மதுரையில் கலெக்டராக இருந்த ஹாரிங்டனிடம், கோவை மாவட்டம் உடுமலைப்பேட்டையைச் சேர்ந்த கந்தப்பன் என்பவர் சமையல் பணிகளைச் செய்து வந்தார். அப்போது, அடுப்பு எரிப்பதற்காகக் குப்பைகளோடு கொண்டுவரப்பட்ட ஓலைச்சுவடிகளில் திருக்குறள் இருந்ததைக் கண்ட கந்தப்பன், அதை எரிக்காமல் பாதுகாத்து ஹாரிங்டனிடம் வழங்கினார். அதைப் பெற்றுக் கொண்ட சென்னை மாகாண ஆளுநர் எல்லிஸ் (F.W. Ellis), தமிழ் மொழியின் சிறப்பை உணர்ந்து, அந்த ஓலைச்சுவடியை முதன்முறையாக அச்சுப் புத்தகமாக வெளியிட்டார். அந்த வரலாற்றுச் சிறப்புமிக்க பிரதி இன்று சென்னை கன்னிமரா நூலகத்தில் பாதுகாக்கப்பட்டு வருகிறது.
தமிழ்ச் சொற்கள் இல்லாவிட்டாலும் தமிழின் பெருமை:
திருக்குறளில் இல்லறம் மற்றும் துறவரம் ஆகிய இரண்டும் பேசப்பட்டுள்ளன. இதில் மிகவும் வியப்புக்குரிய விஷயம் என்னவென்றால், 1330 குறள்களிலும் ‘தமிழ்’, ‘தமிழர்’, ‘தமிழ்நாடு’ என்ற சொற்களே கிடையாது. எந்தவித பிராந்திய அல்லது மொழி அடையாள திணிப்பும் இல்லாமல், மனிதகுலத்தின் பொதுவான அறத்தைப் பேசும் உலகப் பொதுமறையாக இது திகழ்கிறது. புராணங்களில் திருமால் உலகளக்க வாமன அவதாரம் எடுத்து மூன்றடி தேவைப்பட்டதாகக் கூறப்படும் நிலையில், உலகளந்த பெருமை வாய்ந்த வள்ளுவத்திற்கு ஏழே சீர்களில், ஒன்னே முக்கால் அடிகளே போதுமானதாக இருந்தது என்று பாரதி கிருஷ்ணகுமார் பெருமிதத்துடன் கூறினார்.
தமிழின் தொன்மையும் உழைப்பின் சிறப்பும்:
உலகில் 2000 ஆண்டுகளைக் கடந்த செம்மொழிகள் ஆறு என்றாலும், அவற்றுள் நான்கு மொழிகள் தற்போது வழக்கில் இல்லாத இறந்த மொழிகளாகிவிட்டன. சீனம் மற்றும் தமிழ் ஆகிய இரண்டு மொழிகள் மட்டுமே எழுத்து, இலக்கணம், இலக்கியத்துடன் இன்றும் உயிர்ப்போடு பேசப்பட்டு வருகின்றன. மேலும், கீழடி அகழ்வாராய்ச்சி முடிவுகள் தமிழின் தொன்மையை 3500 ஆண்டுகளாக உயர்த்திக் காட்டியுள்ளன.
இறுதியாக, “தெய்வத்தால் ஆகாது எனினும் முயற்சி தன் மெய்வருத்தக் கூலி தரும்” என்ற குறளுக்கு விளக்கமளித்த அவர், வாழ்க்கையில் வெற்றி பெறவும், உயர்ந்த இடங்களை அடையவும் கடவுளை நம்பி இருப்பதை விடத் தீவிரமான உழைப்பும் முயற்சியும் மட்டுமே ஒரு மனிதனுக்குக் கை கொடுக்கும் என்று வலியுறுத்தினார்.